ARYNews.tv | Urdu – Har Lamha Bakhabar

Tag: بوم بوم آفریدی

  • گلوبل ٹی ٹوینٹی لیگ، بوم بوم آفریدی کی دھوم، بولرز کی درگت بنادی

    گلوبل ٹی ٹوینٹی لیگ، بوم بوم آفریدی کی دھوم، بولرز کی درگت بنادی

    اوٹاوا: کینیڈا میں جاری گلوبل ٹی ٹوینٹی لیگ میں بوم بوم آفریدی نے دھوم مچادی، آفریدی کی دھواں دھار بیٹنگ کی بدولت برامپٹن وولوز نے مونٹریال ٹائیگرز کو 10 وکٹوں سے آؤٹ کلاس کردیا۔

    تفصیلات کے مطابق گلوبل ٹی ٹوینٹی لیگ میں شاہد خان آفریدی نے بولرز کو دھو ڈالا، بوم بوم نے پانچ بلند و بالا چھکوں اور دس چوکوں کی مدد سے صرف 40 گیندوں پر 81 رنز بنا ڈالے۔

    مونٹریال ٹائیگرز کی ٹیم 18.2 اوورز میں 101 رنز پر ڈھیر ہوگئی، ایش سودھی نے 6 رنز دے کر پانچ وکٹیں حاصل کیں۔

    وولوز نے ہدف 6.4 اوورز میں بغیر کسی نقصان کے پورا کرلیا، شاہد خان آفریدی کو شاندار اننگز کھیلنے پر میچ کا بہترین کھلاڑی قرار دیا گیا۔

    دوسرے میچ میں شاداب خان کی ٹیم ٹورنٹو نیشنلز کو ایڈمنٹن رائلز کے خلاف 2 وکٹوں سے شکست کا سامنا کرنا پڑا، شاداب خان کی آل راؤنڈ کارکردگی بھی ٹیم کو شکست سے نہ بچاسکی، محمد حفیظ نے 16 گیندوں پر 17 رنز بنائے۔

    میچ 19 اوورز تک محدود کردیا گیا تھا پہلے بیٹنگ کرتے ہوئے ٹورنٹو نیشنلز نے 6 وکٹ پر 191 رنز بنائے، شاداب خان نے 17 گیندوں پر 36 رنز کی اننگز کھیلی۔

    فاتح ٹیم نے ہدف 17.5 اوورز میں 8 وکٹ پر حاصل کرلیا، ہینریچ کلیسن 45، یووراج سنگھ 35 اور منپریت گونی نے 33 رنز بنائے، شاداب خان نے 42 رنز دے کر دو وکٹیں لیں جبکہ محمد حفیظ نے ایک کھلاڑی کو آؤٹ کیا۔

  • کتاب میں عمر سے متعلق بھارتی پبلشر نے سازش کی، شاہد آفریدی

    کتاب میں عمر سے متعلق بھارتی پبلشر نے سازش کی، شاہد آفریدی

    کراچی: بوم بوم آفریدی نے کہا ہے کہ وقار یونس سے کوئی ذاتی مسئلہ نہیں ہے، کتاب میں بھارتی پبلشر نے غلط عمر درج کردی۔

    تفصیلات کے مطابق کراچی کے شاپنگ مال میں شاہد آفریدی کی کتاب ’گیم چینجر‘ کی تقریب رونمائی ہوئی جس کے بعد انہوں نے میڈیا سے گفتگو کرتے ہوئے کہا کہ کتاب میں بھارتی پبلشر نے غلط عمر درج کردی جسے آئندہ ایڈیشن میں درست کردیا جائے گا۔

    عمر کے تنازع پر آفریدی کا کہنا تھا کہ میری پیدائش 1977 کی ہے، کتاب میں میری عمر 1975 تحریر ہے لیکن 1977 میں پیدا ہوا، کتاب کی ای کاپی میں درست عمر تحریر ہے۔

    واضح رہے کہ بوم بوم آفریدی کی پیدائش آفیشل سال 1980 ہے۔

    مزید پڑھیں: آفریدی کی کتاب ’گیم چینجر‘ کی کراچی میں رونمائی، مداح کو کتاب کا تحفہ

    سن 2010 میں ہونے والے فکسنگ تنازع کے حوالے سے آفریدی کا کہنا تھا کہ میچ فکسنگ سے متعلق ٹیم مینجمنٹ کو بتادیا تھا لیکن کسی نے اس پر کان نہ دھرے۔

    انہوں نے کہا کہ وزیراعظم عمران خان پوری قوم کی امید ہیں، تمام سینئرز کی عزت کرتا ہوں اگر کسی کے بارے میں منفی بات کی ہے تو اس کے بارے میں مثبت حقائق بھی بیان کیے ہیں، سابق کپتان وقار یونس سے میرا کوئی ذاتی مسئلہ نہیں رہا، اختلافات تو بھائیوں میں بھی ہوجاتے ہیں۔

    سابق اسٹار آل راؤنڈر نے گوتم گھمبیر کو کرارا جواب دیتے ہوئے کہا کہ گوتم کا علاج ہمارے اسپتال میں زیادہ اچھا ہوسکتا ہے۔

    ان کا کہنا تھا کہ بھارت ہمارے لوگوں کو ویزے جاری نہیں کرتا مگر میرے گوتم کو یہاں کا ویزہ لگوا کر دوں گا۔

  • آفریدی کی کتاب ’گیم چینجر‘ کی کراچی میں رونمائی، مداح کو کتاب کا تحفہ

    آفریدی کی کتاب ’گیم چینجر‘ کی کراچی میں رونمائی، مداح کو کتاب کا تحفہ

    کراچی: سابق اسٹار آل راؤنڈر شاہد خان آفریدی نے کہا ہے کہ 2015 میں کرکٹ ختم ہوئی تو صرف فینز کے لیے کتاب لکھنے کا سوچا، اپنے مداحوں کو اصل عمر بتانا مقصد تھا چاہے میرا ریکارڈ کیوں نہ چلا جائے۔

    تفصیلات کے مطابق شاہد آفریدی کی کتاب ’گیم چینجر‘ کی رونمائی کراچی کے شاپنگ مال میں ہوئی، اس موقع پر کتاب لکھنے والے وجاہت ایس خان ودیگر کھلاڑی اور مداحوں کی بڑی تعداد موجود تھی۔

    بوم بوم آفریدی نے اپنے نمبر ون فین محمد عمر کو کتاب کا تحفہ پیش کیا، شاہد آفریدی نے کہا کہ محمد عمر معذور ہونے کے باوجود میرے سب سے بڑے مداح ہیں۔

    انہوں نے کہا کہ ٹی پر میری عمر 45 بنادی گئی ہے، اپنے مداحوں کو اصل عمر بتانا مقصد تھا چاہے میرا ریکارڈ کیوں نہ چلا جائے، آن لائن بک بھی دستیاب ہے اس میں سب کچھ ملے گا۔

    مزید پڑھیں: یونس خان کے خلاف بغاوت کس نے کی؟ شاہد آفریدی نے کہانی بے نقاب کردی

    شاہد آفریدی نے اپنی کتاب گیم چینجر میں انضمام الحق کے احتجاجاً اوول ٹیسٹ کے بائیکاٹ کے فیصلے کو غلط اور سابق آسٹریلین امپائر ڈیرل ہیئر کو نسل پرست قرار دیا۔

    بوم بوم نے لکھا کہ 2006 میں انضمام کا اوول ٹیسٹ کے واک آؤٹ کا فیصلہ درست نہیں تھا، واک آؤٹ سے بہتر تھا امپائر کے فیصلے پر میڈیا یا آئی سی سی سے رجوع کیا جاتا۔

    انہوں نے کتاب گیم چینجر میں اوول ٹیسٹ کے امپائر ڈیرل ہیئر کو بھی آڑے ہاتھوں لیتے ہوئے نفرت سے بھرے ہوئے نسل پرست انسان قرار دیا۔

  • پاکستان کے بوم بوم آفریدی کی بھارت کے سپر اسٹار سلمان خان سے ملاقات

    پاکستان کے بوم بوم آفریدی کی بھارت کے سپر اسٹار سلمان خان سے ملاقات

    کراچی: قومی ٹیم کے سابق کپتان بوم بوم شاہد خان آفریدی نے کینیڈا میں ایک تقریب کے دوران بھارتی فلم انڈسٹری کے سپر اسٹار سلمان خان سے ملاقات کی۔

    تفصیلات کے مطابق جارحانہ بلے بازی کے لیے مشہور بوم بوم آفریدی کی بالی ووڈ کے بھائی جان سلمان خان کے ساتھ ملاقات کی تصاویر انٹرنیٹ پر وائرل ہوگئیں۔

    کرکٹ اور فلم کے سپر اسٹارز کی یہ ملاقات نہایت دل چسپ رہی، دنوں نے کینیڈا میں منعقد ہونے والی ایک خصوصی تقریب میں مل بیٹھ کر خوش گوار موڈ میں گفتگو کی۔

    آخری بار ’ریس تھری‘ میں نظر آنے والے سپر اسٹار سلمان خان بھی کینیڈا کے شہر ٹورنٹو میں ہونے والی تقریب میں پہنچ گئے، تقریب میں مختلف شعبوں سے تعلق رکھنے والے اہم افراد نے شرکت کی۔

    پاکستان کرکٹ کے آل راؤنڈر شاہد خان آفریدی کی سلمان خان کے ساتھ خوش گوار ملاقات کی تصاویر نے انٹرنیٹ کی دنیا میں دل چسپی کی لہر پیدا کر دی۔

    شاہد آفریدی نے ملاقات کے بعد اپنے ٹویٹر اکاؤنٹ سے ایونٹ میں سلمان خان کے ساتھ بنائی جانے والی تصاویر بھی شیئر کر دیں۔

    بوم بوم آفریدی نے ٹویٹ کرتے ہوئے کہا کہ ایونٹ میں کمیونٹی ممبر کے ساتھ مل کر سلمان خان کے ساتھ ملاقات زبر دست رہی۔ آفریدی نے ایونٹ کے لیے نیک تمناؤں کا بھی اظہار کیا۔

    چیف جسٹس بہترین طریقے سے عوام کی خدمت کررہے ہیں، شاہد آفریدی

    ملاقات کے دوران بالی ووڈ اداکار سلمان خان نے اپنے مخصوص انداز میں پینٹ کی جیبوں میں ہاتھ ڈال رکھے تھے، جب کہ شاہد آفریدی کے چہرے پر سنجیدگی تھی۔

    سلمان خان پاکستانی اداکاروں کے حق میں بول پڑے

    شاہد آفریدی نے سلمان خان کے ساتھ ملاقات کو ایک اچھی اور خوش گوار ملاقات قرار دیا، ایونٹ میں سلمان خان نے  ”Being“ پرنٹ والی شرٹ پہنی تھی۔ واضح رہے دبنگ اداکار سلمان ان دنوں کینیڈا میں اپنی چیریٹی فاؤنڈیشن ’بی اِنگ ہیومین‘ کے سلسلے میں شو کر رہے ہیں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • بوم بوم آفریدی کے یادگار جملے

    بوم بوم آفریدی کے یادگار جملے

    کراچی : دلوں کے بادشاہ اور کراچی کنگز کے صدر شاہد آفریدی آج اپنی38 ویں سالگرہ منا رہے ہیں، بوم بوم آفریدی کے کچھ یاد گار جملے جو ہمیشہ یاد رہیں گے۔

    تفصیلات کے مطابق یکم مارچ انیس سو اسی کو خیبر ایجنسی میں پیدا ہونے والے شاہد آفریدی نے انیس سو چھیانوے میں سینتیس گیندوں پر دنیا کی تیز ترین سنچری بنا کرراتوں رات شہرت کی بلندیوں پر پہنچ گئے۔

    شاہد آفریدی کو بوم بوم آفریدی کا نام معروف کرکٹر اور روی شاستری نے دیا۔ ٹی ٹوئنٹی کا آغاز ہوا تو شاہد آفریدی کو اس کا بادشاہ تسلیم کیا گیا اور دو ہزار نو کا ٹی ٹوئنٹی ورلڈ کپ جتانے میں شاہد آفریدی کی بہترین بیٹنگ ہی وجہ بنی، آفریدی اپنی جارحانہ بلے بازی کی بدولت پوری دنیا میں جانے پہچانے جاتے ہیں۔

    بوم بوم آفریدی کے کچھ یاد گار جملے جو ہمیشہ یاد رہیں گے۔

    ’میں یقین رکھتا ہوں کہ ایک کھلاڑی کا کھیل جارحانہ ہونا چاہئے کیونکہ اس کو طاقت اسی وجہ سے دی گئی ہے تاکہ وہ مشکل ترین حالات میں اچھی کارکردگی دکھا سکے۔‘

    ’جب بھی تم اپنے آپ کو کمزور سمجھو تو ہمیشہ یاد رکھو کہ اللہ تعالی نے تمھارے لئے بہتر سوچ رکھا ہوگا۔‘

    ’اس دنیا میں لاکھوں لوگ ہیں. تو آپ کیوں پیدا ہوئے ہیں وجہ یہ ہے کہ، اللہ آپ سے کچھ توقع کر رہا ہے، جو لاکھوں لوگوں سے ممکن نہیں ہے۔‘

    ’ایک کھلاڑی کو کبھی بھی خود عرض نہیں ہونا چاہئے اور ہمیشہ ٹیم کی کامیابی کا حصہ بننا چاہئے۔‘

    مزید پڑھیں : شاہد خان آفریدی کو 38ویں سالگرہ مبارک

    ’میرے خاندان کے بہت سارے افراد پاک فوج میں ہیں، ان کا يونيفارم اور ان کی طرز زندگی میں نظم و ضبط دیکھ کر ہمیشہ میرے اندر ایک حوصلہ اور جذبہ پیدا ہوتا تھا، اگر مجھے کرکٹ سے دیوانگی کی حد تک لگاؤ نہیں ہوتا، تو میں اپنے ملک کے لئے ایک فوجی بن گیا ہوتا۔‘

    ’ہمیشہ سب سے پہلے اپنے آپ کو سمجھانے اور تعلیم دینے کی کوشش کریں کہ کیا وجہ جو اللہ نے آپ کو زندگی بخشی ہے، اس کے بعد باقی زندگی سے لطف اٹھائیں۔‘

    ’مجھے کرکٹ سے محبت ہے اور ریٹائر ہونے کا کوئی ارادہ نہیں ہے۔‘

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • لارڈز گراؤنڈ کا آفریدی کو خصوصی خراج تحسین

    لارڈز گراؤنڈ کا آفریدی کو خصوصی خراج تحسین

    لندن: لارڈز کرکٹ اسٹیڈیم نے پاکستانی اسٹار کرکٹر شاہد خان آفریدی کو خراج تحسین پیش کرنے کےلیے خصوصی ویڈیو جاری کی ہے جس میں اُن کی 2009 ورلڈ کپ کی پرفارمنس دکھائی گئی ہے۔

    سماجی رابطے کی ویب سائٹ ٹوئٹر پر لارڈز گراؤنڈ کی جانب سے جاری کردہ ویڈیو میں شاہد خان آفریدی کی 2009 کے ورلڈ کپ میں کھیلی جانے والی شاندار اننگز کو دکھایا ہے۔

    ہوم آف گراؤنڈ (لارڈز اسٹیڈیم) کی آفیشل آئی ڈی سے جاری اس ویڈیو کے بعد بین الاقوامی کرکٹر بھی ویڈیو پر تاثرات دے رہے ہیں جبکہ لالا کے مداح بھی مستقبل میں ان کی کمی کا شکوہ کرتے نظر آرہے ہیں۔

    یاد رہے شاہد آفریدی نے گزشتہ اتوار شارجہ اسٹیڈیم میں شاندار بیٹنگ کا مظاہرہ کرنے کے بعد پریس کانفرنس کے ذریعے انٹرنیشنل کرکٹ سے ریٹائرمنٹ کا باضابطہ اعلان کرتے ہوئے کہا تھا کہ اب وہ صرف مداحوں کے لیے کرکٹ کھیل رہے ہیں اُن کا مقصد ٹیم میں جگہ بنانا نہیں ہے۔

    واضح رہے شاہد آفریدی کو 1996 میں بوم بوم کا لقب دیا گیا تھا جب انہوں نے سری لنکا کے خلاف کھیلے جانے والے میچ میں 37 گیندوں کا سامنا کرتے ہوئے انٹرنیشنل کرکٹ کی پہلی تیز ترین سینچری بنانے کا اعزاز اپنے نام کیا تھا۔

    علاوہ ازیں شاہد خان آفریدی نے کرکٹ کی دنیا میں صرف بیٹنگ ہی نہیں بلکہ باؤلنگ اور فیلڈنگ میں بھی اپنی صلاحیتوں کا لوہا منوایا اور 2009 میں پاکستان کو ٹی ٹوئٹی ورلڈکپ جتوانے میں اہم کردار ادا کیا۔