لاہور کے چلڈرن اسپتال میں بون میرو ٹرانسپلانٹ کے 150 کامیاب آپریشن ہوچکے ہیں اس آپریشن کےاخراجات پنجاب حکومت خود ادا کر رہی ہے۔
اے آر وائی نیوز کے مطابق لاہور کے چلڈرن اسپتال میں بون میرو ٹرانسپلانٹ کے 150 کامیاب آپریشن ہوچکے ہیں۔ یہ اسپتال پاکستان بھر میں بون میرو ٹرانسپلاٹ آپریشن کرنے والا پہلا سرکاری ادارہ ہے اور آپریشن پر آنے والے 42 لاکھ سے زائد اخراجات پنجاب حکومت خود ادا کر رہی ہے۔
چلڈرن اسپتال میں بون میرو ٹرانسپلانٹ آپریشن میں کامیابی کا تناسب عالمی معیار کے مطابق 89 فیصد سے زائد ہے۔ یہاں سندھ، بلوچستان اور دیگر صوبوں کے مریض بچے بھی بون میرو ٹرانسپلانٹ کرانے والوں میں شامل ہیں جب کہ افغانستان سے آنے والے آنے والے مریض بچوں کی بھی مفت بون میرو ٹرانسپلانٹیشن کی گئی۔
لاہور چلڈرن اسپتال کے کینسر وارڈ میں ایک سال میں دو ہزار مریضوں کا علاج کیا گیا جو جاری ہے جب کہ اس کی او پی ڈی سے 25 ہزار سے زائد کینسر کے مریض بچے مستفید ہوئے۔
وزیر اعلیٰ پنجاب مریم نواز جلد بون میرو ٹرانسپلانٹ کارڈ کا اجرا کریں گی۔ ان کا کہنا ہے کہ مفت علاج ہر مریض بچے کا حق ہے اور ریاست اپنا یہ فرض ضرور نبھائے گی۔ بچوں کی صحت پر کوئی سمجھوتہ نہیں ہوگا اور اس کے لیے تمام وسائل مہیا کرینگے۔
