Tag: بٹگرام

بٹگرام : خیبرپختونخوا کے ضلع بٹگرام میں سیلابی ریلےمیں 30افراد بہہ گئے ، جس میں 10 افراد کی لاشیں نکال کی گئیں اور دیگر کی تلاش جاری ہے۔

تفصیلات کے مطابق خیبرپختونخوا کے مختلف علاقوں میں موسلادھار بارش، آسمانی بجلی اور کلاؤڈ برسٹ کے باعث شدید سیلابی صورتحال پیدا ہوگئی۔

ضلع بٹگرام کے نیل بند گاؤں میں آسمانی بجلی گرنے اور بارش سے پانچ مکانات منہدم ہوگئے، جبکہ سیلابی ریلے میں بہہ جانے سے کم از کم 30 افراد لاپتہ ہوگئے۔

ریسکیو حکام نے بتایا کہ اب تک 10 افراد کی لاشیں نکال لی گئی ہیں جن میں 6 مرد، 2 خواتین اور ایک بچی شامل ہیں، جبکہ مزید 18 افراد کی تلاش جاری ہے۔

ریسکیو 1122، پولیس، رضاکار اور مقامی افراد امدادی کارروائیوں میں مصروف ہیں۔ متاثرین نے حکومت سے مطالبہ کیا ہے کہ امدادی سرگرمیوں میں تیزی لائی جائے اور بے گھر ہونے والوں کے لیے فوری رہائش کا انتظام کیا جائے۔

مانسہرہ میں بھی آسمانی بجلی اور کلاؤڈ برسٹ سے سیلاب آیا، جس کے باعث مزید جانی و مالی نقصان کی اطلاعات ہیں۔

دوسری جانب سوات کے مینگورہ، ملابابا، حاجی بابا، خوازہ خیلہ اور مرغزار سمیت نشیبی علاقے زیرِ آب آ گئے، سینکڑوں گھروں میں پانی داخل ہوگیا اور متعدد علاقوں کا زمینی رابطہ منقطع ہو گیا۔

متاثرہ علاقوں میں لوگ گھروں کی چھتوں پر پناہ لینے پر مجبور ہیں، جن میں خواتین اور بچے بھی شامل ہیں، جبکہ بعض مقامات پر اپنی مدد آپ کے تحت انخلا کیا جا رہا ہے۔

بٹگرام : اسلام آباد کے بعد ایک اور شہر میں گدھے کا گوشت برآمد ہوا، فوڈ اتھارٹی نے دو افراد کو گرفتار کر لیا اور شبہ ظاہر کیا اسے مقامی مارکیٹوں میں فروخت کے لیے سپلائی کیا جانا تھا۔

تفصیلات کے مطابق اسلام آباد میں حالیہ دنوں ہونے والی بڑی کارروائی کے بعد اب خیبر پختونخوا میں بھی غیر قانونی گدھے کے گوشت کا اسکینڈل سامنے آ گیا ہے۔

ایڈیشنل اسسٹنٹ کمشنر بٹگرام نے کوزہ بانڈہ کے علاقے میں کارروائی کے دوران ذبح شدہ گدھا برآمد کرلیا، جس نے نہ صرف مقامی افراد کو خوفزدہ کر دیا بلکہ ملک بھر میں صحت عامہ اور خوراک کے معیار پر شدید تحفظات کو جنم دیا ہے۔

کارروائی خفیہ اطلاع پر کی گئی جس میں دو افراد کو گرفتار کر لیا گیا، گرفتار ملزمان کا تعلق مانسہرہ سے ہے، اور وہ لائسنس یافتہ قصائی نہیں تھے۔

حکام نے شبہ ظاہر کیا اسے مقامی مارکیٹوں میں فروخت کے لیے سپلائی کیا جانا تھا تاہم واقعے کی مکمل تفتیش شروع کر دی گئی ہے اور فوڈ ڈیپارٹمنٹ کو بھی مطلع کر دیا گیا ہے۔

پولیس یہ بھی جاننے کی کوشش کررہی ہے کہ برآمد شدہ گوشت کہاں اور کس کو سپلائی کیا جانا تھا، اور اس جرم میں مزید کون کون شریک ہے۔

گرفتار افراد کے خلاف پاکستان پینل کوڈ کی دفعات 272 اور 273 کے تحت مقدمہ درج کیا گیا ہے، جو مضر صحت اشیاء کی تیاری اور فروخت جیسے سنگین جرائم سے متعلق ہیں۔

بٹگرام پولیس نے مقدمہ درج کر کے مزید گرفتاریوں کا عندیہ دیا ہے۔ پولیس ترجمان کا کہنا ہے کہ یہ جانچ جاری ہے کہ آیا گوشت انسانی کھپت کے لیے فروخت کیا جانا تھا یا نہیں۔

مزید پڑھیں : کیا اسلام آباد میں گدھے کا گوشت سپلائی کیا گیا؟ پولیس کا اہم بیان آگیا

اس افسوسناک واقعے نے ایک بار پھر عوامی صحت، خوراک کی حفاظت اور غیر انسانی کاروباری رویوں پر سوالات اٹھا دیے ہیں۔

یاد رہے چند روز قبل اسلام آباد کے علاقے ترنول میں ایک خفیہ فارم ہاؤس پر چھاپے کے دوران 1,000 کلوگرام گدھے کا گوشت اور 50 سے زائد زندہ گدھے برآمد کیے گئے تھے جبکہ اس کارروائی میں ایک غیر ملکی شہری کو بھی گرفتار کیا گیا تھا.