سان سلواڈور: وسطی امریکا کا ملک ایل سلواڈور دنیا کا پہلا ملک بن گیا ہے جس کی سرکاری کرنسی بٹ کوائن ہے۔
تفصیلات کے مطابق ایل سلواڈور آج منگل کے روز بٹ کوائن کو سرکاری کرنسی کے طور پر استعمال کرنے والا دنیا کا پہلا ملک بن گیا، تاہم ملک میں امریکی ڈالر میں بھی لین دین کیا جا سکے گا۔
ایل سلواڈور رقبے کے لحاظ سے وسطی امریکا کے علاقے کا سب سے چھوٹا ملک ہے، ایل سلواڈور کے فلسطینی نژاد صدر نجیب بوکیلی نے رواں سال جون کے اوائل میں بتایا تھا کہ وہ پارلیمنٹ کو ایک قانونی بل بھیجیں گے، جس کا مقصد بٹ کوائن کو قانونی حیثیت دینا ہے۔
9 جون کو پارلیمنٹ کے 84 ارکان میں سے 62 نے اس قانون کے حق میں ووٹ دے دیا، جس کے بعد آج 7 ستمبر سے ملک میں بٹ کوائن کا قانونی کرنسی کے طور پر استعمال شروع ہو گیا ہے۔
بٹ کوائن میں سرمایہ کاری کرنے والے غیر ملکیوں کو ایل سلواڈور میں مستقل قیام کا حق بھی حاصل ہوگا، واضح رہے کہ ایل سلواڈور کے تفریحی علاقے ایل زونٹے میں 2019 سے بٹ کوائن کا استعمال ہو رہا ہے، یہاں ایک منصوبے کو Bitcoin Beach کا نام بھی دیا گیا ہے، اور یہاں موبائل فون اور کمپیوٹر کے ذریعے ادائیگی کے لیے بٹ کوائن استعمال کرنے کی اجازت ہے۔
ایل سلواڈور کا کُل رقبہ 21 ہزار مربع کلو میٹر ہے، یہاں کی آبادی 86 لاکھ نفوس پر مشتمل ہے، اور آبادی کے 70% افراد بینکوں میں کھاتے رکھتے ہیں۔
ملک کے 40 سالہ صدر نجیب بوکیلی شروع ہی سے بٹ کوائن کو قانونی شناخت دینے کے لیے پُر عزم تھے، ان کے مطابق اس کرنسی کو قانونی حیثیت دینے سے ہزاروں افراد کو مالیاتی نظام میں ملازمتوں کے مواقع ملیں گے۔
ریاض: سعودی عرب کی پیٹرولیم اور قدرتی گیس کی بڑی کمپنی آرامکو نے کہا ہے کہ وہ بٹ کوائن میں لین دین کا کوئی ارادہ نہیں رکھتی۔
تفصیلات کے مطابق پیر کو سعودی کمپنی آرامکو نے کہا ہے کہ اس کا بٹ کوائن میں لین دین کرنے کا کوئی ارادہ نہیں ہے، اور اس حوالے سے پھیلائی جانے والی خبر بے بنیاد ہے۔
مختلف میڈیا رپورٹس میں یہ خبر پھیلائی گئی تھی کہ آرامکو بٹ کوائن میں لین دین کا ارادہ رکھتی ہے، سبق ویب سائٹ کے مطابق کمپنی نے کہا ہے کہ ہم واضح کرنا چاہتے ہیں کہ یہ خبر بے بنیاد اورمکمل طور پر حقیقت سے عاری ہے۔
آرامکو سے جاری بیان میں کہا گیا ہے کہ کمپنی کا بٹ کوائن میں لین دین کا کوئی ارادہ نہیں، نہ ہی اس حوالے سے کوئی منصوبہ ہے جس پر غور کیا جا رہا ہو۔
واضح رہے کہ یوٹیوب پر پوسٹ ہونے والی، برازیلی بٹ کوائن مائنر رے نصر کے ایک انٹرویو کے بعد میڈیا رپورٹس میں یہ بات گردش کر رہی تھی کہ آرامکو ڈیجیٹل کرنسی کی کان کنی شروع کرے گی۔
رے نصر نے کہا تھا کہ ہم آرامکو کے ساتھ بات چیت کر رہے ہیں، صحرا سے نکلنے والا سارا تیل اس کمپنی کا ہے، اور وہ گیس جو یہ کمپنی استعمال نہیں کرتی، میں اس بارے میں کہہ سکتا ہوں کہ صرف یہ بھی آج بٹ کوائن کے نصف نیٹ ورک میں جان ڈال سکتی ہے۔
دنیا بھر کی طرح پاکستان میں بھی ڈیجیٹل کرنسی کو تیزی سے مقبولیت حاصل ہوتی جا رہی ہے، آپ کو یہ جان کر حیرت ہوگی کہ پاکستان میں گھریلو خواتین کی ایک معقول تعداد سائیڈ بزنس کے طور پر بٹ کوائن یا ایسی دیگر ڈیجیٹل کرنسیز میں سرمایہ کاری کرنے کی متمنی ہیں۔
روئٹرز کے مطابق آن لائن ڈیجیٹل کرنسیاں پاکستان میں غیر قانونی نہیں ہیں، عالمی سطح پر ان کی مانگ اور مقبولیت میں روز اضافہ ہونے کے باوجود زیادہ تر لوگ اس سے متعلق کم ہی جانتے ہیں، دوسری طرف کچھ لوگوں کی کوششوں سے پاکستان میں یہ ورچوئل کرنسیاں مقبول ہوتی جا رہی ہیں۔
پاکستان میں آن لائن ڈیجیٹل کرنسی کے کاروبار سے وابستہ 38 سالہ غلام احمد ہفتے میں ایک مرتبہ لوگوں کو کرپٹوکرنسی کی ٹریڈنگ اور اس کے شئیرز کی خرید و فروخت کے حوالے سے مفت مشورے دیتے ہیں۔
اسلام آباد کے رہائشی غلام احمد نے ایک واٹس ایپ گروپ بنا رکھا ہے، جس کے ممبران کی تعداد سینکڑوں میں ہے، ڈیجیٹل کرنسیوں کے ماہر احمد ایک ہفتے میں ایک بار اس گروپ میں شریک ہوتے ہیں اور لوگ ان سے آن لائن کرنسیوں کے استعمال اور تجارت کے بارے میں مشورے لیتے ہیں۔
احمد کے واٹس ایپ گروپ میں گھریلو خواتین کی ایک معقول تعداد ہے، جو سائیڈ بزنس کے طور پر بٹ کوائن یا ایسی دیگر ڈیجیٹل کرنسیوں میں سرمایہ کاری کرنا چاہتی ہیں، تاہم بہت سی ممبران روایتی اسٹاک مارکیٹ کی پیچیدگیوں سے لاعلم ہیں لیکن عالمی بُوم کی وجہ سے اب وہ اس کاروبار میں قدم رکھنے کے لیے تیار ہیں۔
احمد کا کہنا ہے کہ واٹس ایپ گروپ میں لوگ کرپٹوکرنسی کے بارے میں بے تحاشا سوالات کرتے ہیں، لوگ اس کے بارے میں جاننا چاہتے ہیں، اور وہ کئی گھنٹوں تک لوگوں کو بنیادی معلومات کے ساتھ ساتھ مفید مشورے بھی دیتے رہتے ہیں۔
غلام احمد نے 2014 میں ملازمت کو خیرباد کہہ دیا تھا اور آن لائن ڈیجیٹل کرنسی کی صنعت میں قدم رکھا تھا، ان کو یقین تھا کی یہ ایک منافع بخش کاروبار ثابت ہوگا اور ہوا بھی ایسے ہی، آج وہ فخر کے ساتھ اپنے اس فیصلے کو اپنی زندگی کا ایک اہم موڑ قرار دیتے ہیں۔
پاکستان میں بھی تیزی کے ساتھ ڈیجیٹل کرنسیز مقبول ہوتی جا رہی ہیں، ان کی مقبولیت کا اندازہ اس بات سے بھی لگایا جا سکتا ہے کہ ان کی ٹریڈنگ اور مائننگ کے حوالے سے بنائی گئی ویڈیوز سوشل میڈیا پر ہزاروں بار دیکھی جاتی ہیں۔
ڈیجیٹل کرنسی اور دہشت گردی
عالمی سطح پر ایسے متعدد کیسز سامنے آ چکے ہیں جن میں بڑے جرائم میں کرپٹوکرنسی کا کردار بھی موجود تھا، بالخصوص ہیکرز کے گروہوں نے بٹ کوائنز میں تاوان کی ادائیگی کروائی، ڈیجیٹل کرنسی ایک طرف مقبول ہو رہی ہے، دوسری طرف ایسے خدشات بھی جنم لے رہے ہیں کہ ان ورچوئل رقوم کو غلط مقاصد کے لیے بھی استعمال کیا جا سکتا ہے۔
اسی لیے منی لانڈرنگ کے واچ ڈاگ ادارے فنانشل ایکشن ٹاسک فورس (ایف اے ٹی ایف) نے اسلام آباد پر زور دیا ہے کہ وہ اس صنعت کو بہتر طریقے سے ریگولیٹ کرے تاکہ کوئی بھی انتہا پسند دہشت گردی کی مالی معاونت کے لیے اس ڈیجیٹل پلیٹ فارم کو استعمال نہ کر سکے۔
حکومت پاکستان نے اس کرنسی کی ریگولیشن کے لیے ایک کمیٹی بنائی ہے، جس میں ایف اے ٹی ایف کے ماہرین اور کچھ وفاقی وزرا کے علاوہ ملکی خفیہ ایجنسیوں کے چیف بھی شامل ہیں۔
ماہرین کا کہنا ہے کہ پاکستان میں ڈیجیٹل کرنسی کو بھرپور طریقے سے ریگولیٹ کرنے میں وقت درکار ہوگا، چوں کہ اس کی مانیٹرنگ کا طریقہ کار ابھی تک وضع نہیں کیا جا سکا ہے، اس لیے پاکستان میں کئی ادارے اس صنعت سے وابستہ لوگوں کو شک کی نگاہ سے دیکھتے ہیں۔
غلام احمد کا کہنا ہے کہ ملک کی وفاقی تحقیقاتی ایجنسی (ایف آئی اے) نے دو مرتبہ انھیں گرفتار کیا اور ان پر الزامات عائد کیے کہ وہ منی لانڈرنگ اور الیکٹرانک فراڈ کے مرتکب ہوئے ہیں، تاہم عدالت میں یہ الزامات ثابت نہ ہو سکے۔
یو ٹیوب پر دس لاکھ فالوورز رکھنے والے سابق ٹی وی اینکر وقار ذکا کئی برسوں سے حکام کو راغب کر رہے ہیں کہ وہ نہ صرف ڈیجیٹل کرنسی کی صنعت کو قانونی قرار دے، بلکہ حکومت خود بھی اس میں سرمایہ کاری کرے، جیسا کہ غلام احمد نے ہائیڈرو الیکٹرک پاور پر چلنے والا کرپٹو کرنسی مائننگ فارم بنایا ہوا ہے۔
غلام احمد کا اصرار ہے کہ پاکستان میں کرپٹو کرنسی کی مقبولیت اور کاروبار کو روکا نہیں جا سکتا، اس لیے بہتر یہی ہے کہ حکومت اس صنعت کی ریگولیشن کے لیے قواعد و ضوابط طے کرے اور دنیا کے ساتھ ہی چلے۔
آن لائن کرپٹو کرنسی ایکسچینجز، جو اکثر پاکستان سے باہر کے ہیں، جیسا کہ Localbitcoins.com، اس میں سیکڑوں پاکستان تاجر لسٹڈ ہیں، جن میں سے چند ہزاروں ٹرانزیکشنز والے ہیں۔
کراچی: پاکستان میں دہشت گردی کے لیے برطانیہ اور یورپ سے ڈیجیٹل کرنسی بٹ کوائنز سے رقم کی منتقلی کا انکشاف ہوا ہے۔
تفصیلات کے مطابق یورپ اور برطانیہ سے پاکستان میں دہشت گردی کے لیے بٹ کوائنز سے رقم کی منتقلی میں ملوث ملزم نعمان صدیقی کے خلاف ایف آئی آر درج کر لی گئی ہے۔
ایف آئی اے کا کہنا ہے کہ منتقل ہونے والی رقم کا کچھ حصہ دہشت گردی کی مالی اعانت میں بھی استعمال ہوا۔
ایف آئی اے کے مطابق گرفتار ملزم نعمان صدیقی کا بانی ایم کیو ایم گروپ سے تعلق ہے، سلیم بیلجیئم نے 2018 میں گلستان جوہر میں دھماکے کی منصوبہ بندی کی تھی، اس دھماکے کے لیے رقم نعمان صدیق نے دی تھی۔
ایف آئی اے نے یہ انکشاف بھی کیا ہے کہ ادارے کی وِنگ سی ٹی ڈبلیو کے 2 انسپکٹرز 10 کروڑ ادائیگی کے خلاف ملزم کی رہائی کے لیے ڈیل کر رہے تھے، تاہم دونوں انسپکٹرز کوگرفتار کر لیا گیا ہے۔
ایف آئی اے ذرائع نے بتایا کہ مذکورہ انسپکٹرز کے خلاف بھی اینٹی کرپشن ایکٹ کے تحت مقدمہ درج کر لیا گیا ہے۔
کیپ ٹاؤن: جنوبی افریقا میں دو بھائی سرمایہ کاری کا جھانسا دے کر اربوں ڈالر مالیت کے بٹ کوائن لے کر غائب ہو گئے۔
تفصیلات کے مطابق دو جنوبی افریقی بھائی مبینہ طور پر 3 ارب 60 کروڑ ڈالر مالیت کے بٹ کوائن لے کر بھاگ گئے ہیں، بٹ کوائن ان کے کرپٹو کرنسی انویسٹمنٹ پلیٹ فارم پر رکھوائے گئے تھے۔
میڈیا رپورٹس کے مطابق متاثرین نے ایک قانونی فرم سے مدد مانگ لی ہے، متاثرین کا کہنا ہے کہ سرمایہ کاری کمپنی ایفریکرپٹ کے مالکان امیر کاجی اور رئیس کاجی بٹ کوائنز لے کر کہیں غائب ہو چکے ہیں۔
قانونی فرم نے دنیا بھر میں کرپٹو ایکسچینجز کو خبردار کر دیا ہے کہ ان کے پلیٹ فارمز پر کوئی ڈیجیٹل کرنسی فروخت کرنے آ سکتا ہے۔
کہا جا رہا ہے کہ دونوں بھائی 69 ہزار بٹ کوائنز لے کر برطانیہ بھاگ گئے ہیں، سافٹ ویئر کمپنی بلومبرگ کے مطابق اس مسئلے کے آثار اپریل سے نظر آنا شروع ہو گئے تھے، جب ایفریکرپٹ نے کلائنٹس کو نقصان سے متعلق خبردار کیا، حالاں کہ اس وقت بٹ کوائن بلندی پر جا رہا تھا۔
ایفریکرپٹ نے کلائنٹس سے یہ بھی کہا کہ وہ قانون نافذ کرنے والے حکام کو خبردار نہ کریں، اس سے نقصان کی بحالی کا سلسلہ سست ہونے کا خطرہ ہے۔ بلومبرگ کے مطابق قانونی کارروائی سے روکنے کا اعلان ہی معاملہ مشکوک ہونے کی نشانی تھی، دراصل ایفریکرپٹ کے کلائنٹس مبینہ نقصان کی خبر آنے سے 7 دن قبل اپنے اپنے پلیٹ فارمز تک رسائی کھو چکے تھے۔
رپورٹ کے مطابق کیپ ٹاؤن کی قانونی فرم بھی بھاگے ہوئے بھائیوں کو تلاش کرنے میں ناکام رہی ہے، اور جنوبی افریقی پولیس کے خصوصی یونٹ ہاکس کو رپورٹ درج کرا دی گئی ہے، جو منظم جرائم کی تفتیش کرتی ہے۔
واضح رہے کہ دو برسوں میں یہ جنوبی افریقی کرپٹو کرنسی سرمایہ کاروں کو پہنچنے والا دوسرا بڑا نقصان ہے، اس سے قبل ایک ٹریڈنگ پلیٹ فارم کے سی ای او جوہان اسٹینبرگ 23 ہزار بٹ کوائنز لے غائب ہو گیا تھا۔
بیجنگ: ایلون مسک کی ٹوئٹس سے بٹ کوائن کی قیمت میں ایک بار پھر اضافہ ہو گیا تھا، تاہم اب چین کی جانب سے سخت اقدام کے بعد بٹ کوائن کی قیمت پھر کم ہو گئی ہے۔
تفصیلات کے مطابق چین کے سخت ضابطہ اخلاق پر عمل درآمد سے بٹ کوائن کی قیمت میں پھر کمی آ گئی، گزشتہ ہفتے ٹیسلا کے بانی ایلون مسک کی ٹوئٹس کے بعد بٹ کوائن کی قیمت میں اضافہ ہو گیا تھا، لیکن چین کی جانب سے بٹ کوائن کے حوالے سے کریک ڈاؤن میں توسیع کی وجہ سے اس کی قیمت میں پھر کمی آگئی ہے۔
خبر رساں ادارے روئٹرز کے مطابق کرپٹو کرنسی مارکیٹ میں پیر کے روز بٹ کوائن کی قیمت میں تقریباً 10 فی صد کمی دیکھی گئی، بٹ کوائن اب 32،288 ڈالرز میں فروخت ہو رہا ہے، جب کہ یہ قیمت 12 روز کی کم ترین سطح ہے۔
ماہرین کا کہنا ہے کہ اگر بٹ کوائن کی قیمت میں یہ کمی برقرار رہتی ہے تو رواں ماہ میں کرپٹو کرنسی کی قدر میں یہ سب سے زیادہ کمی ہوگی۔
یاد رہے کہ 18 جون کو چین کے جنوب مغربی صوبے سیچوان میں حکام نے کرپٹو کرنسی مائننگ کے پروجیکٹس کو بند کرنے کا حکم دیا تھا، گزشتہ ماہ مالی خطرات پر قابو پانے کے اقدامات کے تحت چینی کابینہ اور ریاستی کونسل نے بٹ کوائن کی مائننگ اور تجارت پر پابندی عائد کرنے کا بھی عزم کیا تھا۔
اس پس منظر میں چین کے موجودہ کریک ڈاؤن کو سمجھنے کے لیے یہ خیال رہے کہ چین میں بٹ کوائن کی پیداوار، بٹ کوائن کی عالمی پیداوار کے نصف حصے سے بھی زیادہ ہے، جب کہ بٹ کوائن مائننگ کے لحاظ سے سیچوان چین کا دوسرا بڑا صوبہ ہے۔
لندن میں مقیم کرپٹو فرم بی سی بی گروپ کے بین سیبلی نے اس صورت حال پر کہا ہے کہ چینی مائنرز کے خلاف کریک ڈاؤن کا مطلب یہ ہو سکتا ہے کہ وہ کوائن کا ذخیرہ کم کر رہے ہیں، اور اس طرح ہمیں نچلی سطح پر لے کر جا رہے ہیں۔
دراصل وہ کمپنیاں جو بٹ کوائن کی کان کنی کرتی ہیں، ان کا کوئی بھی قدم قیمتوں میں بڑی کمی کا باعث بنتا ہے، گزشتہ 6 روز میں بٹ کوائن کی قیمت پانچویں بار کم ہوئی ہے، جب کہ رواں برس اس کی قیمت میں مجموعی طور پر 10 فی صد سے زیادہ اضافہ ہوا۔
کرپٹو کرنسی بٹ کوائن کی قیمت میں ایک بار پھر اضافہ ہوگیا اور اس کی وجہ ٹیسلا کے بانی ایلن مسک کی ایک اور ٹویٹ ہے، ان کی ٹویٹ نے ایک بار پھر اس کرنسی کی قدر میں اضافہ کردیا۔
بین الاقومی ویب سائٹ کے مطابق ٹیسلا کے بانی ایلن مسک کی ٹویٹس کے بعد ایک مرتبہ پھر بٹ کوائن کی قیمت میں اضافہ سامنے آیا ہے اور اس کی قیمت دو ہفتوں کی بلند ترین سطح پر پہنچ گئی ہے۔
ٹیسلا کی جانب سے فروری میں ڈیڑھ ارب ڈالر کے عوض بٹ کوائن کی خریداری اور ادائیگی کے لیے کرپٹو کرنسی کے اعلان کے بعد سے اس حوالے سے کی جانے والی کوئی بھی ٹویٹ بٹ کوائن کی قیمت میں اضافے اور کمی پر اثر انداز ہوتی ہے۔
گاڑیوں کی خریداری کے لیے بٹ کوائن کے استعمال کے اعلان کے بعد ایلن مسک نے یہ بھی کہا تھا کہ الیکٹرک گاڑیاں بٹ کوائن قبول نہیں کریں گی اور ان کا یہ بیان بھی اس کی قیمت پر اثر انداز ہوا تھا۔
گزشتہ روز سماجی رابطے کی ویب سائٹ ٹویٹر پر کی گئی ایک ٹویٹ میں ایلن مسک نے کہا کہ جب مائنرز کی جانب سے مستقبل کے مثبت رجحان کی حامل صاف توانائی کے استعمال کی تصدیق ہوگی تو ٹیسلا کمپنی بٹ کوائن ٹرانزیکشنز کو بحال کردے گی۔
ایلن مسک کے اس بیان کے بعد بٹ کوائن کی قیمت میں 9 فیصد اضافہ دیکھنے میں آیا اور اس کی قیمت 39 ہزار 8838 ڈالر کی سطح تک پہنچ گئی۔
کرپٹو اینالیٹکس ویب سائٹ کوائن جیکو کے شریک بانی بوبی اونگ نے کہا کہ مارکیٹ کو سافٹ ویئر کمپنی نے بھی سپورٹ کیا اور بٹ کوائن کی حمایت کرنے والے مائیکرو اسٹریٹیجی نے بھی بٹ کوائن خریدنے کے لیے نصف ارب ڈالر جمع کیے۔
رواں برس بٹ کوائن کی قیمت میں تقریباً 33 فیصد اضافہ ہوا تھا اور 60 ہزار ڈالر کی ریکارڈ سطح پر پہنچنے کے بعد چین کی جانب سے کریک ڈاؤں اور ایلن مسک کے بدلتے بیانات سے اس کی قیمت میں بڑی کمی آئی تھی۔
واشنگٹن: دنیا کی سب سے بڑی گوشت کمپنی کو سائبر حملے کے نتیجے میں ایک کروڑ ڈالر سے زیادہ کا تاوان بٹ کوائن میں ادا کرنا پڑا۔
تفصیلات کے مطابق دنیا کی سب سے بڑی گوشت فراہم کرنے والی برازیلی جے بی ایس کمپنی نے تصدیق کی ہے کہ کمپنی پر سائبر حملے کے بعد انھوں نے ہیکرز کو بٹ کوائن میں 11 ملین ڈالر کا تاوان ادا کیا ہے۔
جے بی ایس امریکا نے بدھ کو کہا کہ کریمینل ہیکرز کو تاوان کی ادائیگی اس وقت کی گئی جب کمپنی کی اکثر فیکٹریوں نے آن لائن کام شروع کر دیا تھا۔
جے بی ایس امریکا ڈویژن کے چیف ایگزیکٹو آفیسر آندرے نوگویرا کا کہنا تھا کہ کمپنی نے حملے سے متعلق کسی غیر متوقع مسائل کو روکنے اور ڈیٹا باہر نہیں جانے کو یقینی بنانے کے لیے یہ فیصلہ کیا۔
آندرے نوگویرا نے وال اسٹریٹ جرنل کو انٹرویو میں کہا کہ مجرموں کو رقم کی ادائیگی بہت تکلیف دہ تھی، لیکن ہم نے اپنے صارفین کے حق میں یہ قدم اٹھایا، رقم تب ادا کی گئی جب کمپنی کے اکثر پلانٹس نے دوبارہ کام شروع کر دیا تھا۔
ان کا کہنا تھا کہ تاوان اس لیے ادا کیا گیا تاکہ جے بی ایس کے گوشت پلانٹس کو مزید خلل سے بچایا جا سکے، اور ریسٹورنٹس، گروسری اسٹورز اور کسانوں پر مرتب ہونے والے اثرات کو محدود کیا جا سکے۔
واضح رہے کہ JBS فروخت کے لحاظ سے گوشت فراہم کرنے والی دنیا کی سب سے بڑی کمپنی ہے، اور یہ آسٹریلیا سے لے کر جنوبی امریکا اور یورپ تک گوشت سپلائی کرتی ہے، امریکا میں یہ سب سے بڑا بیف پروسیسر، اور چکن اور پورک میں سرفہرست سپلائر ہے۔
سائبر اٹیک سے شمالی امریکا اور آسٹریلیا میں کمپنی کے آئی ٹی سپورٹنگ سسٹمز متاثر ہوئے تھے، امریکی حکومت نے اس ransomware (نقصان دہ سافٹ ویئر کے ذریعے تاوان کی وصولی) کے لیے مجرموں کے ایک گروہ REvil کو ذمہ دار قرار دیا ہے، جس کے بارے میں یہ خیال کیا جاتا ہے کہ اس کا تعلق روس یا مشرقی یورپ سے ہے۔
خیال رہے کہ جے بی ایس پر یہ حملہ تاوانی سافٹ ویئر کے ذریعے ہونے والے حملوں کا حصہ تھا، جن میں کمپنیوں کو ان کے آپریٹنگ سسٹم پر دوبارہ کنٹرول دینے کے لیے لاکھوں ڈالرز کی ادائیگی کا مطالبہ کیا گیا۔ گزشتہ ماہ مئی میں ہیکرز نے امریکا میں ایسٹ کوسٹ میں ایک گیس کمپنی کی پائپ لائن بند کر دی تھی، جسے اپنے آپریشنز اور سروس پر کنٹرول واپس حاصل کرنے کے لیے ہیکرز کو بٹ کوائن میں 44 لاکھ ڈالرز ادا کرنے پڑے تھے، جن میں سے 23 لاکھ ڈالرز مالیت کی کرپٹو کرنسی کی تاوانی رقم ایف بی آئی نے ایک ورچوئل کرنسی ویلٹ سے واپس ضبط کر لی تھی۔
یہ حملے بتاتے ہیں کہ سائبر مجرموں نے اپنے اہداف بدل دیے ہیں، پہلے وہ ڈیٹا سے مالا مال کمپنیوں جیسا کہ ری ٹیلرز، بینکس اور انشوررز کو نشانہ بناتے تھے، لیکن اب ان کا ہدف اہم سروس فراہم کرنے والے ادارے بن گئے جیسا کہ اسپتال، ٹرانسپورٹ آپریٹرز اور فوڈ کمپنیاں۔
واشنگٹن: امریکا میں ایک گیس پائپ لائن کو تاوان کے لیے کمپیوٹر کے ذریعے ہیک کرنے والے ہیکرز سے تاوان کی بٹ کوائنز رقم واپس لے لی گئی۔
تفصیلات کے مطابق امریکی محکمہ انصاف نے ہیکرز سے 2.3 ملین ڈالرز مالیت کی کرپٹو کرنسی کی تاوانی رقم واپس حاصل کر لی ہے، یہ رقم کالونیل پائپ لائن نامی کمپنی نے ہیکرز کو ادا کی تھی۔
ہیکرز نے ایک سائبر اٹیک کے ذریعے گزشتہ ماہ مذکورہ کمپنی کی ایسٹ کوسٹ پائپ لائن کو بند کر دیا تھا، جس کی وجہ سے ایسٹ کوسٹ میں گیس کی شدید قلت پیدا ہو گئی تھی۔
امریکی محکمہ انصاف کا کہنا ہے کہ انھوں نے پائپ لائن بند کرنے کے بعد تاوان کی صورت میں دی جانے والی رقم واپس حاصل کر لی ہے، ہیکرز کو رقم بٹ کوائن میں دی گئی تھی جسے اب ایف بی آئی نے ایک ورچوئل کرنسی ویلٹ سے ضبط کر لیا ہے۔
امریکی حکام نے 63.7 بٹ کوائنز واپس لیے ہیں جن کی قیمت 2.3 ملین ڈالرز ہے، یہ رقم پائپ لائن کمپنی نے گزشتہ ماہ سائبر اٹیک کے بعد ہیکرز کو ادا کی تھی، امریکی حکام نے مشتبہ افراد کے ذریعے استعمال شدہ ورچوئل والٹ کی نشان دہی کی تھی۔
کالونیل پائپ لائن کے مالکان کا کہنا ہے کہ انھوں نے ہیک ہوئی پائپ لائن تک دوبارہ رسائی کے لیے ہیکرز کو تقریباً 5 ملین ڈالرز ادا کیے تھے، لیکن حالیہ ہفتوں میں بٹ کوائن کی قیمت میں کمی واقع ہوئی ہے، جو اپریل میں 63 ہزار ڈالر تھی وہ اب 36 ہزار ڈالر ہو چکی ہے۔
سائبر حملے کا علم ہونے کے بعد کالونیل پائپ لائن نے اپنے سسٹم بند کر دیے تھے تاکہ حملے کے اثرات کو محدود رکھا جا سکے، کمپنی کا کہنا تھا کہ سائبر حملے سے کچھ سرگرمیاں روکنا پڑیں اور چند آئی ٹی سسٹم متاثر ہوئے۔
نیویارک: الیکٹرک گاڑیوں کی امریکی کمپنی ٹیسلا کے مالک ایلون مسک کو ہیکرز نے دھمکیاں دی ہیں۔
تفصیلات کے مطابق اپنے ایک ٹویٹ سے ڈیجیٹل کرنسی کے شئیرز اٹھانے اور گرانے والے سرمایہ دار ایلون مسک کو ہیکرز نے دھمکیاں دی ہیں کہ بٹ کوائن کی ویلیو گرانے اور اٹھانے کے کھیل میں کیا صرف آپ ہی اسمارٹ ہیں، لیکن اب آپ کو ہمارا سامنا کرنا ہوگا۔
اینانیمس (نامعلوم) کے نام سے ہیکرز کے اس گروپ نے اپنے پیغام میں ایلون مسک کی کرپٹو کرنسی پر اجارہ داری کو عام شہریوں کی تضحیک کے مترادف قرار دیا، ہیکرز کا کہنا ہے کہ لاکھوں افراد اپنی زندگی کو بہتر بنانے کے لیے کرپٹو کرنسی میں سرمایہ کاری کر کے رسک لے رہے ہیں، لیکن آپ کی ٹویٹس ان افرد کے لیے توہین آمیز ہوتی ہیں۔
ہیکرز کا یہ پیغام ملنے کے 20 منٹ بعد ہی اسپیس ایکس کے بانی نے ایک ٹوئٹ میں کہا کہ جس سے نفرت ہے اسے ختم کرنے کی بجائے جس سے محبت ہے اسے بچانے کی کوشش کرو۔
خیال رہے کہ ہیکرز نے ایلون مسک کے کمپنیوں کو نشانہ بنانے کی دھمکی ہے، ہیکرز نے ان سے کہا ہے کہ کئی برس سے آپ ارب پتی طبقے میں پسندیدہ ساکھ سے لطف اندوز ہو رہے ہیں، اور اس کی وجہ صرف یہ ہے کہ ہم میں سے بہت لوگ الیکٹرک کاروں اور خلا میں جانے کی جستجو رکھتے ہیں، اور آپ نے اس کا فائدہ بھی اٹھایا۔
ہیکرز نے ایلون مسک کی شخصیت پر تنقید کرتے ہوئے کہا ہے کہ اب ان میں ایک ایسا امیر آدمی نظر آتا ہے جو توجہ حاصل کرنے کے لیے کچھ بھی کر سکتا ہے۔
گزشتہ ماہ سے ایلون مسک نے ایک بار پھر اپنے ٹوئٹ کے ذریعے کرپٹو کرنسی کی مارکیٹ کو ہلا کر رکھا ہوا ہے، انھوں نے ٹوئٹ کیا تھا کہ ان کی کمپنی تمام بٹ کوائنز فروخت کر سکتی ہے، اس ٹوئٹ کے بعد بٹ کوائن 10 فی صد نیچے آ گیا۔
