کیف: یوکرین میں بچوں کا اسپتال بھی روسی میزائل حملے کی زد پر آ گیا۔
یوکرینی حکام کے مطابق کیف میں بچوں کے ایک اسپتال کو روس کے ایک بڑے میزائل حملے میں نشانہ بنایا گیا، روسی میزائل بیرج نے یوکرین کے کئی شہروں کو نشانہ بنایا تھا۔
وزیر داخلہ ایہور کلیمنکوو کا کہنا ہے کہ یوکرین میں کم از کم 20 افراد ہلاک اور 50 کے قریب زخمی ہو گئے ہیں۔ یوکرین کے صدر وولودیمیر زیلنسکی کا کہنا ہے کہ روس کے 40 سے زیادہ میزائلوں کا نشانہ بننے والے پانچ شہروں میں کیف، دنیپرو، کریوی ریہ، سلوویانسک، کراماتورسک شامل ہیں۔
روس کی جانب سے اس حملے کے سلسلے میں فوری طور پر کوئی بیان جاری نہیں کیا گیا ہے، روس کا اس بات پر اصرار رہا ہے کہ اس کی افواج سویلین انفرا اسٹرکچر کو نشانہ نہیں بنائیں گی۔
عینی شاہدین نے الجزیرہ کو بتایا کہ انھوں نے 4 زور دار دھماکوں کی آوازیں سنی ہیں، جن میں آج صبح وسطی کیف میں آرٹیوم ملٹری پلانٹ کو نشانہ بنایا گیا، یہ پلانٹ بچوں کے اسپتال سے تقریباً 1 کلومیٹر کے فاصلے پر ہے۔
اسرائیلی فوج نے 7 اکتوبر کو اپنے ہی لوگوں کو ختم کرنے والے ’ہانیبل پروٹوکول‘ کا حکم دیا
یورپی کمشنر برائے کرائسز منیجمنٹ جینز لینارسک نے X پر ایک پوسٹ میں کہا کہ روس نے جنگی قوانین کو پامال کر دیا ہے، بچوں کے اسپتال کو نشانہ بنانا ظلم سے بھی بڑھ کر عمل ہے، روس کو یوکرینی عوام کے خلاف ان جرائم کے لیے جواب دہ ہونا چاہیے۔
ادھر یوکرین کے وزیر دفاع رستم عمروف نے اتحادیوں پر زور دیا کہ وہ آج کے بڑے پیمانے پر کیے گئے میزائل حملوں کو دیکھتے ہوئے یوکرین کے فضائی دفاع کو مضبوط بنانے میں مدد کے لیے جلد کوئی فیصلہ کریں۔ انھوں نے ٹیلی گرام پر کہا ’’ہماری دفاعی صلاحیتیں ابھی بھی ناکافی ہیں، ہمیں مزید فضائی دفاعی نظام کی ضرورت ہے۔‘‘
