خان پور: دن دیہاڑے اسکول جاتے ہوئے دو بچوں کو اغوا کرلیا گیا ، دونوں بچے سابق ایم ایس ٹی ایچ کیواسپتال خان پور ڈاکٹر حسن محمود کے ہیں۔
تفصیلات کے مطابق رحیم یار خان کی تحصیل میں خان پور میں نامعلوم اغوا کاروں نے اسلحہ کے زور پر سرعام دو بچوں کواغوا کرلیا، دونوں بچے گاڑی میں ڈرائیور کے ساتھ اسکول جارہے تھے۔
واقعہ تھانہ سٹی کی حدود چغتائی ہوٹل کے قریب ماڈل ٹاؤن بی روڈ پر پیش آیا، جہاں پر اسکول چھوڑنے جانے والی گاڑی کو 3 نامعلوم مسلح اغوا کاروں نے زبردستی روکا اور 11 سالہ شایان اور 7 سالہ سبحان کو اغوا کر کے اپنی گاڑی میں ڈال کر فرار ہو گئے۔
پولیس کا کہنا ہے کہ مغوی بچے ڈاکٹر حسن محمود سابق ایم ایس ہیں اور ان کی اہلیہ بھی ڈاکٹر ہیں۔
واردات کی سی سی ٹی وی فوٹیج بھی منظر عام پر آگئی ہے ، جس میں اغوا کاروں کی گاڑی کو واضح طور پر دیکھا جا سکتا ہے۔
واقعہ کی اطلاع ملنے پر ایس ایچ او سٹی اور صدر موقع پر پہنچے اور نامعلوم اغوا کاروں کی تلاش شروع کر دی گئی ہے۔
ڈی پی او رحیم یارخان رضوان عمر گوندل نے واقعہ کا نوٹس لیتے ہوئے پولیس کو ملزمان کی ہر صورت گرفتاری یقینی بنانے کی ہدایات کردی۔
ایس ایچ او کا کہنا تھا کہ سٹی سرکل بھرکی ناکہ بندی کردی،ملزمان کی تلاش جاری ہے، شک کی بنیاد پرڈرائیورکوگرفتارکرکےتفتیش کی جا رہی ہے۔
ڈی پی او رحیم یارخان نے کہا کہ خان پورمیں پہلی دفعہ اس طرح کا سانحہ ہوا ہے ، پولیس کی ٹیمیں تحقیقات کررہی ہیں ہیں ، جلد بچوں کو بازیاب کرا کر ملزمان کو کیفر کردار تک پہنچائیں گے۔
