Tag: بچوں کی حفاظت

  • انسٹا گرام نے والدین کی مشکل آسان کردی، بچوں کے لیے نئی سہولت کا آغاز

    انسٹا گرام نے والدین کی مشکل آسان کردی، بچوں کے لیے نئی سہولت کا آغاز

    انسٹاگرام نے بچوں کی آن لائن حفاظت کے لیے "ٹین اکاؤنٹس” ایک نیا فیچر متعارف کروادیا ہے، جس کے تحت 16 سال تک کے بچوں کے لیے کانٹینٹ اور ان سے رابطے کو محدود کیا جاسکے گا۔

    غیر ملکی خبر رساں ادارے کی رپورٹ کے مطابق انسٹاگرام ترجمان نے اپنے بیان میں کہا ہے کہ 16 سال تک کے بچوں کے اکاؤنٹس خود بخود ٹین اکاؤنٹس میں تبدیل ہو جائیں گے اور اگر وہ سیٹنگز کو تبدیل کرکے رسٹرکشنز کم کرنا چاہیں تو انہیں اپنے والدین کی اجازت درکار ہوگی۔

    اس فیچر میں والدین کو یہ سہولت فراہم کی گئی ہے کہ وہ اپنے بچوں کی آن لائن سرگرمیوں کی نگرانی کرسکیں گے جیسے کہ وہ کس قسم کا مواد دیکھ رہے ہیں اور کن لوگوں سے بات چیت کر رہے ہیں۔

    دوسری جانب بچوں کو بھی ایک ایسا فیچر ملے گا جو صرف ان کے لیے بنایا گیا ہے اور جس کے ذریعے وہ اپنی پسند کے موضوعات پر مثبت کانٹینٹ دیکھ سکیں گے۔

    اس حوالے سے میٹا کی عالمی حفاظتی سربراہ اینٹیگونی ڈیوس نے کہا ہے کہ ہم اپنی ایپ پر لاکھوں نو عمر بچوں کے آن لائن تعلق کو دوبارہ ترتیب دے رہے ہیں تاکہ والدین بہتر طریقے سے اپنے بچوں کی نگرانی کر سکیں۔

    رپورٹ کے مطابق یہ اقدامات ایک ایسے وقت میں متعارف کروائے گئے ہیں جب امریکی کانگریس بچوں کی آن لائن حفاظت کے قوانین پر بحث کر رہی ہے، اگر نئے قوانین منظور ہوجاتے ہیں تو یہ بچوں کی آن لائن حفاظت سے متعلق قوانین میں سب سے بڑی تبدیلی ہوگی۔

    ٹین اکاؤنٹس میں کس قسم کی پابندی ہوگی؟

    انسٹاگرام کے "ٹین اکاؤنٹس” پر کچھ مخصوص پابندیاں اور حفاظتی اقدامات لاگو کیے گئے ہیں تاکہ بچوں کو آن لائن محفوظ رکھا جا سکے۔ یہ سیٹنگز اور پابندیاں درج ذیل ہیں۔

    پرائیویٹ اکاؤنٹس

    ٹین اکاؤنٹس کی سیٹنگ ڈیفالٹ طور پر پرائیویٹ ہوگی، یعنی بچے کے اکاؤنٹ پر موجود مواد کو صرف وہی لوگ دیکھ سکیں گے جو ان کے فالوورز ہیں۔ اس کے علاوہ، جو لوگ انہیں فالو نہیں کرتے، وہ ان سے رابطہ بھی نہیں کر سکیں گے۔

    پیغام رسانی کی پابندی

    سخت میسجنگ سیٹنگز لاگو کی جائیں گی تاکہ بچوں کو صرف وہی لوگ پیغام بھیج سکیں جنہیں وہ خود فالو کرتے ہیں یا جن سے پہلے سے رابطے میں ہیں۔

    حساس مواد کی پابندی

    بچوں کے اکاؤنٹس پر حساس مواد کے کنٹرول کی سخت ترین سیٹنگز لگائی جائیں گی۔ یہ سیٹنگز محدود کریں گی کہ بچے کے سامنے کس قسم کا مواد آئے، جیسے لڑائی جھگڑے یا کاسمیٹک پروسیجرز کی تشہیر کرنے والی پوسٹس یا ریلز۔

    محدود انٹریکشنز

    صرف وہی لوگ بچے کو ٹیگ یا مینشن کر سکیں گے جنہیں وہ فالو کرتے ہیں۔ انسٹاگرام پر اینٹی بلیئنگ فیچر بھی موجود ہوگا، جو غیر مناسب الفاظ کو کمنٹس اور ڈائریکٹ میسجز سے حذف کر دے گا۔

    ٹائم لمٹ ریمائنڈر

    بچوں کو نوٹیفکیشنز موصول ہوں گے جو انہیں یہ بتائیں گے کہ انہوں نے دن میں ایک گھنٹے کے لیے انسٹاگرام استعمال کر لیا ہے اور اب انہیں ایپ بند کر دینی چاہیے۔

    سلیپ موڈ

    رات 10 بجے سے صبح 7 بجے تک سلیپ موڈ آن ہوگا، جس دوران نوٹیفکیشنز میوٹ ہوں گے اور میسجز پر خودکار جواب دینے کا فیچر فعال ہو جائے گا۔

    والدین کی نگرانی

    والدین کو اجازت ہوگی کہ وہ اپنے بچوں کے اکاؤنٹ پر حفاظتی سیٹنگز اور رسٹرکشنز لگا سکیں۔ بچے سیٹنگز میں تبدیلی کر سکیں گے، لیکن والدین کی اجازت سے۔ اس کے لیے پیرنٹس سپروژن سیٹنگز کو فعال کرنا ہوگا۔

    والدین کا کنٹرول

    والدین اپنے بچوں کے اکاؤنٹس کو کنٹرول کر سکیں گے، جیسے یہ دیکھنا کہ بچوں نے پچھلے سات دنوں میں کن لوگوں کو میسجز کیے ہیں (لیکن میسجز نہیں پڑھ سکیں گے)۔
    والدین بچوں کے انسٹاگرام استعمال پر ٹائم لمٹ لگا سکیں گے اور اس کے بعد بچے ایپ استعمال نہیں کر سکیں گے۔

    والدین یہ بھی دیکھ سکیں گے کہ بچے کن موضوعات پر مواد دیکھ رہے ہیں اور کیا وہ مواد ان کی عمر کے مطابق ہے یا نہیں۔

    اطلاق

    یہ سیٹنگز نئے اکاؤنٹس پر فوراً لاگو ہوں گی، جبکہ پہلے سے موجود اکاؤنٹس کو انسٹاگرام نوٹیفکیشنز بھیجے گا اور اگلے ہفتے سے یہ سیٹنگز ان پر بھی لاگو ہونا شروع ہو جائیں گی۔

  • ماں کا اونچی ایڑھیوں والی سینڈل پہننے کا شوق: بچہ جان سے ہاتھ دھو بیٹھا

    ماں کا اونچی ایڑھیوں والی سینڈل پہننے کا شوق: بچہ جان سے ہاتھ دھو بیٹھا

    ممبئی: اونچی ایڑھیوں والی سینڈل پہننے کا شوق بچے کی زندگی لے گیا، سیڑھیاں اترتے ہوئے ماں کا توازن بے قابو ہوا اور بچہ گر کر جاں بحق ہوگیا۔

    تفصیلات کے مطابق یہ افسوس ناک واقعہ بھارتی ریاست مہاراشٹر کے ایک علاقے میں پیش آیا۔ شادی میں شرکت کے لیے بن ٹھن کر جانے والی ماں اپنے بچے کو کپڑوں اور جوتوں سے زیادہ بہتر طور پر نہ سنبھال سکیں۔

    مہاتما پھولے پولیس اسٹیشن کا کہنا تھا کہ محمد شیخ نامی بچے کے گھر والے کلیان کے علاقے رام بوگ کے ایک شادی ہال میں شادی میں شرکت کے لیے آئے ہوئے تھے جہاں یہ حادثہ رونما ہوا۔

    چھ ماہ کے بچے کی ماں فہمیدہ شیخ نے اونچی ایڑھیوں والی سینڈل پہنے ہوئے تھے اور ان کی گود میں بچہ تھا، سیڑھیاں اترتے ہوئے وہ لڑکھڑائیں اور ان کا توازن بے قابو ہوگیا۔

    بچہ ماں کے ہاتھوں سے پھسل کر سیڑھیوں پر گرگیا جس کی وجہ سے بچے کی ریڑھ کی ہڈی پر شدید چوٹ آئی، اس سے قبل کہ اسے طبی امداد کے لیے اسپتال لے جایا جاتا، وہ راستے ہی میں دم توڑ گیا۔

    مہاتما پھولے پولیس اسٹیشن کے اسسٹنٹ پولیس انسپیکٹر نے بتایا کہ ہمیں جیسے ہی واقعے کی اطلاع ملی، ہم فوراً وہاں پہنچ گئے اور بچے کو رکھمنی اسپتال لے گئے جہاں ڈاکٹروں نے بتایا کہ بچہ مرچکا ہے۔

    بھارت:16سالہ لڑکی کو زیادتی کے بعد زندہ جلانے والا ملزم گرفتار

    پولیس کے مطابق واقعے کی تفصیل بچے کی ماں اور دیگر رشتے داروں نے بتائی جس کے بعد حادثاتی موت کی رپورٹ درج کی گئی اور لاش والدین کے حوالے کی گئی۔


    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔