گائے کے بچھڑے کی زندگی بچانے کے لیے 5 افراد نے اپنی جان قربان کر دی جب کہ ایک شخص زندگی اور موت کی کشمکش میں مبتلا ہے۔
انسان کی بہترین صفات میں سے ایک احساس ہے حساس دل رکھنے والا شخص انسان تو انسان جانور کو بھی تکلیف میں نہیں دیکھ سکتا۔ ایسا ہی ایک واقعہ بھارت میں پیش آیا ہے جہاں ایک گائے کے بچھڑے کی زندگی بچانے کے لیے 5 لوگوں نے اپنی جان دے دی جب کہ ایک زندگی اور موت کی کشمکش میں ہے۔
بھارتی میڈیا کے مطابق یہ دلخراش واقعہ ریاست مدھیہ پردیش کے ایک گاؤں میں پیش آیا۔ جہاں صبح کے وقت گائے کا بچھڑا ٹہلتا ہوا آم کے باغ میں آیا اور اچانک باغ میں موجود کنوئیں میں گر گیا۔
اس وقت باغ میں ٹھیکیدار کے 6 ملازم موجود تھے۔ انہوں نے بچھڑے کی جان بچانے کے لیے یکے بعد دیگرے کنوئیں میں اترے مگر وہ بچھڑے کو کیا بچاتے اپنی جانیں بھی نہ بچا سکے اور لاشوں کی صورت باہر نکالا گیا۔
رپورٹ کے مطابق ہلاکتوں کی وجہ کنوئیں میں موجود زہریلی گیس بتائی جا رہی ہے، کیونکہ کنوئیں میں اترنے والے افراد کی نیچے اترتے ہی حالت غیر ہوگئی اور سانس لینے میں دقت کے چیخ وپکار مچ گئی۔
علاقے کے لوگوں نے واقعہ کی اطلاع پولیس اور ایس ڈی ایف آر ایف کو دی۔ جس کے بعد پولیس اور ریسکیو ادارے جائے وقوعہ پر پہنچ گئے اور عملے نے ایک، ایک کر کے لاشوں کو کنوئیں سے باہر نکالا۔ کنوئیں سے 5 افراد کی لاشیں نکالی گئیں جب کہ ایک شخص کی حالت تشویشناک ہے۔ لاشوں اور متاثرہ شخص کو اسپتال منتقل کر دیا گیا ہے۔
حادثہ کے حوالے سے گُنا کے کلکٹر کشور کمار کنیال نے بتایا کہ کنویں میں غالباً کاربن مونوآکسائیڈ گیس کا رساؤ ہوا ہے۔ لیکن حقیقت کا پتہ لیب سے ٹیسٹنگ کے بعد ہی چل پائے گا۔
