لبنانی دارالحکومت بیروت میں خوفناک دھماکے کے فوراً بعد پیدا ہونے والے بچے کی تصاویر نے سوشل میڈیا صارفین کا دل موہ لیا۔
بیروت میں ہونے والے خوفناک دھماکے کے وقت جہاں ایک دلہن اپنی شادی کے فوٹو شوٹ میں مصروف تھی تو دوسری طرف ایک خاتون عین اسی وقت بچے کو جنم دینے جارہی تھیں۔
بچے کے والد اپنے بیٹے کے دنیا میں آنے سے قبل کے لمحات کو بھی عکسبند کر رہے تھے اور اسی دوران لبنان کی تاریخ کا خوفناک دھماکہ ہوا جو اس ویڈیو میں ریکارڈ ہوگیا۔
ویڈیو میں دیکھا جاسکتا ہے کہ خاتون ڈلیوری روم کی طرف جاتی ہیں اور چند لمحوں بعد ہی قیامت خیز دھماکے سے سارا منظر الٹ پلٹ ہوتا دکھائی دیتا ہے، اسپتال کے مذکورہ حصے میں شیشے ٹوٹ کر بکھر جاتے ہیں۔
دھماکے سے اسی اسپتال کے عملے کے متعدد افراد بھی جاں بحق اور زخمی ہوئے۔
تاہم ایسے موقع پر بھی طبی عملے نے اپنے حواس بحال رکھے اور درد زہ میں مبتلا خاتون کی ڈلیوری کا عمل بخیر و خوبی انجام دیا۔
مذکورہ بچے کا نام بعد ازاں میریکل (معجزہ) بے بی جارج رکھا گیا، اب اسی کی پیدائش کے چند روز بعد والد نے اس کی تصاویر سوشل میڈیا پر شیئر کی ہیں جو وائرل ہورہی ہیں۔
بچے کی معصومیت نے سوشل میڈیا صارفین کا دل موہ لیا ہے اور وہ ایک طرف تو اس کی صحت و زندگی کے لیے دعائیں کر رہے ہیں تو دوسری طرف بیروت دھماکے کے متاثرین کے لیے بھی افسردہ ہیں۔
