Tag: بڑا اعزاز

پاکستان نے صنعتی ترقی میں اہم سنگ میل عبور کیا جس کا اعتراف عالمی برادری بھی کر رہی ہے اور پاکستان کو ایک بڑا اعزاز مل گیا ہے۔

پاکستان اقوام عالم میں تیزی سے اپنا کھویا ہوا مقام حاصل کر رہا ہے اور عالمی برادری کا اس پر اعتماد بڑھ رہا ہے جس نے پاکستان کو ایک اور بڑا اعزاز دلا دیا ہے۔

عالمی برادری کے اسی اعتماد کا مظہر ہے کہ پاکستان کو اقوام متحدہ انڈسٹریل ڈیولپمنٹ بورڈ کے 53 ویں اجلاس کا صدر منتخب کر لیا گیا ہے اور اقوام متحدہ میں پاکستان کے مستقل مندوب کامران اختر اجلاس کے صدر ہوں گے۔ پاکستان پہلی بار اس بورڈ کی سربراہی کرے گا۔

پاکستان نے آج اقوام متحدہ انڈسٹریل ڈیولپمنٹ (یونیڈو) بورڈ اجلاس کی نئی ذمہ داریاں سنبھال لی ہیں۔ پاکستان کے یونیڈو میں 350 ملین ڈالرز کے جاری اور طے شدہ منصوبے بھی شامل ہیں۔

سفارتی ذرائع اس فیصلے کو پاکستان کی صنعتی ترقی میں ایک اہم سنگ میل اور عالمی سطح پر پاکستان کی کامیابیوں کا اعتراف قرار دے رہے ہیں۔

واضح رہے کہ اس سے قبل رواں ماہ جون میں پاکستان کو طالبان پر عائد پابندیوں کے نفاذ کی نگرانی کرنے والی اقوام متحدہ سلامتی کونسل کی کمیٹی کا چیئرمین اور اقوام متحدہ کی انسداد دہشتگردی کمیٹی کا نائب چیئرمین مقرر کیا گیا تھا۔

اس کے علاوہ پاکستان کو اقوام متحدہ کی سلامتی کونسل کے غیر رسمی ورکنگ گروپ برائے دستاویزات (آئی ڈبلیو جی) اور حال ہی میں قائم ہونے والے غیر رسمی ورکنگ گروپ برائے پابندیوں کا شریک چیئرمین بھی مقرر کیا گیا ہے۔

پاکستان کے دل شہر لاہور نے بڑا اعزاز حاصل کر لیا اور مستند عالمی ایجنسی نمبیو   اس حوالے سے اہم رپورٹ جاری کر دی ہے۔

کرائم اینڈ سیفٹی انڈیکس 2025 کی رپورٹ میں پاکستان کے دل شہر لاہور نے بڑا اعزاز حاصل کر لیا ہے اور اس کو دنیا کے ترقی یافتہ ممالک کے شہروں واشنگٹن، نیویارک، لندن، برلن، پیرس اور استنبول سے زیادہ محفوظ شہر قرار دیا گیا ہے۔

مستند عالمی ایجنسی نمبیو کی رپورٹ میں لاہور کے کرائم انڈیکس میں بہتری آئی ہے اور اس کو گلوبل 249 شہروں میں سب سے زیادہ محفوظ قرار دیا گیا ہے۔

عالمی کرائم انڈیکس میں لاہور کا 37 واں جب کہ محفوظ شہروں میں 63 واں نمبر ہے۔

عالمی ایجنسی رپورٹ کے مطابق کرائم فائٹنگ کی بہتر حکمت عملی کی بدولت لاہور محفوظ شہروں میں سر فہرست ہے اور لاہور کی تاریخ میں پہلی بار کرائم میں واضح کمی آئی ہے جس کی وجہ سے ہی لاہور کو نیویارک، لندن، واشنگٹن، برلن، استنبول، پیرس سے زیادہ محفوظ قرار دیا گیا ہے۔

اعداد وشمار کے مطابق گزشتہ ایک سال میں لاہور میں جرائم کی شرح میں واضح کمی ہوئی ہے۔ ڈکیتی میں قتل کی وارداتوں میں 64 فیصد جب کہ ڈکیتی کی وارداتوں میں 55 فیصد کمی ہوئی ہے۔

موٹر سائیکل چوری کی وارداتوں میں 33 اور چھیننے کی وارداتوں میں 42 فیصد کمی ہوئی ہے۔ اسی طرح کار چوری میں 33 اور دیگر گاڑیوں کی چوری کی وارداتوں میں 39 فیصد کمی ہوئی ہے۔

اعداد وشمار میں بتایا گیا ہے کہ محکمانہ احتساب میں 400 سے زائد افسران اور اہلکاروں کو سزائیں دی گئیں جب کہ جرائم ثابت ہونے پر 4 ایس ایچ اوز کو ان ہی کے تھانوں میں لاک اپ بھی کیا گیا۔