نگراں وزیر آبپاشی سندھ ایشور لال نے محکمہ آبپاشی سندھ کی زمینوں پر قبضہ کے خاتمے کے لیے اہم قدم اٹھایا ہے۔
تفصیلات کے مطابق محکمہ آبپاشی سندھ نے روہڑی سرکل حیدرآباد اور خیرپور ایریگیشن سرکل سکھر میں سرکاری زمینوں سے غیر قانونی انکروچمنٹ و قبضے کے خاتمے کے لیے کمیٹیاں قائم کردی۔
ترجمان کے مطابق روہڑی کینال سرکل حیدرآباد کی سربراہی سپرنٹنڈنٹ انجینئر ظہیر احمد میمن کریں گے جبکہ خیرپور ایریگیشن سرکل سکھر کی سربراہی سپرنٹنڈنٹ انجینئر اشفاق نوح میمن کریں گے۔
ترجمان کا کہنا ہے کہ کمیٹیاں محکمہ آبپاشی کی قبضہ شدہ زمینوں کی نشاندہی کریں گی، کمیٹیاں تمام قابضین و ملزمان کے ناموں بمعہ شناختی کارڈ کی فہرستیں تیار کریں گی۔
سرکاری زمینوں پر قبضہ میں ملوث محکمہ آبپاشی کے افسران و ملازمین کی فہرست بھی کمیٹیاں تیار کریں گی، کمیٹیاں قبضہ شدہ زمینوں سے متعلق عدالتوں میں زیر التواء کیسز کا بھی جائزہ لیں گی۔
کمیٹیاں پندرہ روز میں محکمے کو اپنی سفارشات کے ساتھ رپورٹ جمع کروائیں گی جس کے بعد نگراں وزیر آبپاشی سندھ کمیٹیوں کی سفارشات کی پر مبنی رپورٹ کی روشنی میں اگلے لائحہ عمل کا اعلان کریں گے۔
