ARYNews.tv | Urdu – Har Lamha Bakhabar

Tag: بڑی پیش رفت

  • اساتذہ کی بھرتی کے لیے بڑی پیش رفت

    اساتذہ کی بھرتی کے لیے بڑی پیش رفت

    (26 اگست 2025): نئے اساتذہ کی بھرتی کے سلسلے میں امیدواروں کی اسناد کی جانچ پڑتال کے لیے اسکروٹنی کمیٹی قائم کر دی گئی ہے۔

    اے آر وائی نیوز کے مطابق صوبہ سندھ میں نئے اساتذہ کی بھرتی کے سلسلے میں پیش رفت ہوئی ہے اور وزیر اعلیٰ سندھ کی ہدایت پر امیدواروں کی جانچ پڑتال کے لیے اسکروٹنی کمیٹی قائم کر دی گئی ہے۔ اس سلسلے میں اسکول ایجوکیشن ڈیپارٹمنٹ نے نوٹیفکیشن بھی جاری کر دیا ہے۔

    یہ کمیٹی امیدواروں کی ڈگری، ڈومیسائل اور پی آر سی کی تصدیق کرے گی اور اس کی رپورٹ ڈسٹرکٹ ایجوکیشن آفیسرز کو پیش کرے گی۔

    اسکروٹنی کمیٹی میں ڈائریکٹر اسکول ایجوکیشن، چیف مانیٹرنگ آفیسر اور ایل ایس یو کوآرڈینیٹر شامل ہیں۔ جانچ پڑتال ایس ٹی ایس سکھر آئی بی اے کے ٹیسٹ پاس امیدواروں کی ہوگی۔

    جانچ پڑتال کا عمل مکمل ہونے کے بعد نئے اساتذہ کی بھرتی 2021 کی پالیسی کے مطابق عمل میں لائی جائے گی۔

    واضح رہے کہ سندھ حکومت کے 90 ہزار اساتذہ بھرتی کرنے پر عملدرآمد کرتے ہوئے اب تک 83 ہزار اساتذہ بھرتی کیے جا چکے ہیں اور چند ماہ قبل آئی بی اے ٹیسٹ پاس اساتذہ کو صوبائی وزیر تعلیم سردار شاہ نے آفر لیٹر بھی جاری کیے تھے۔

    بعد ازاں سندھ کے سینئر وزیر شرجیل انعام میمن نے اعلان کیا تھا کہ صوبائی حکومت اگلی سہ ماہی میں مزید 4400 نئے اساتذہ بھرتی کرے گی۔

  • ایف بی آر کے 10 ہزار نان فائلرز ملازمین کے معاملے میں بڑی پیش رفت

    ایف بی آر کے 10 ہزار نان فائلرز ملازمین کے معاملے میں بڑی پیش رفت

    اسلام آباد: فیڈرل بورڈ آف ریونیو کے 10 ہزار نان فائلرز ملازمین کے معاملے میں بڑی پیش رفت سامنے آگئی ہے۔

    تفصیلات کے مطابق ایف بی آرکے 10 ہزار نان فائلرز ملازمین کی بڑی تعداد نے فائلر اسٹیٹس حاصل کرلیا ہے۔ 9820 ملازمین نے ٹیکس ریٹرنز فائل کردیے ہیں جس کے بعد نان فائلر ملازمین کی تعداد 180 رہ گئی ہے۔

    چیئرمین ایف بی آر امجد ٹوانہ نے اس حوالے سے بتایا کہ ایک دو دن میں باقی ملازمین بھی ٹیکس ریٹرن فائل کردیں گے۔

    امجد ٹوانہ کا کہنا تھا کہ 10 ہزارنان فائلر ملازمین 50 ہزار سے کم تنخواہ لینے والے تھے۔ ایف بی آر کے 17 ہزارملازمین میں سے 10 ہزار کے نان فائلرز ہونے کا انکشاف ہوا تھا۔

    واضح رہے کہ اس سے قبل خبر آئی تھی کہ فیڈرل بورڈ آف ریونیوکے 300 سے زائد ملازم جو اہم عہدوں پر تعینات تھے نان فائلرز نکلے تھے۔

    ایف بی آر نے کمشنرز کو ہدایت کی تھی کہ توسیع کی مدت ختم ہونے کے بعد بھی ریٹرن فائل نہ ہونے پر ایف بی آر افسران سمیت نان فائلرز کو نوٹس جاری کریں۔

    چیف کمشنر آر ٹی او ون نے ایف بی آر کے 307نان فائلر افسران اور اہلکاروں کو نوٹسز جاری کیے تھے، جس میں تمام ایف بی آر کے نان فائلر افسران اور اہلکاروں کو فوری انکم ریٹرن فائل کرنے کا کہنا گیا تھا۔

    خیال رہے کہ دوسروں کو فائلر بننے کی ترغیب دینے والے ادارے ایف بی آر آر ٹی او ون کے خود اپنے ملازمین بھی انکم ٹیکس ریٹرن کے نان فائلرز نکلے تھے۔

  • آئی ایم ایف سے ہونے والے مذاکرات میں بڑی پیش رفت

    آئی ایم ایف سے ہونے والے مذاکرات میں بڑی پیش رفت

    اسلام آباد : نگراں حکومت اور آئی ایم ایف کے درمیان ہونے والے مذاکرات میں بڑا بریک تھرو سامنے آیا ہے، جس کے مطابق عوام پر کوئی نیا ٹیکس نہیں لگایا جائے گا۔

    اے آر وائی نیوز کے مطابق نگراں حکومت نے آئی ایم ایف کو آمادہ کیا ہے کہ وہ کوئی نیا ٹیکس نہیں لگائے گی، ٹیکس ہدف 9415 ارب روپے پر ہی برقرار رہے گا۔

    ذرائع کے مطابق ایف بی آر نے 9415 ارب کے ٹیکس ہدف کے حصول کا تحریری پلان دے دیا ہے، ایف بی آر نے 9415 ارب ٹیکس ہدف حاصل کرنے کی یقین دہانی کروادی ہے۔ اس کے علاوہ رئیل اسٹیٹ سیکٹر سے ٹیکس چوری کے خاتمے کی بھی یقین دہانی کروائی گئی ہے۔

    ایف بی آر کا کہنا ہے کہ ریئل اسٹیٹ سیکٹر میں ٹیکس چوری کا خاتمہ معیشت کی ضرورت ہے، آئی ایم ایف کو یقین دہانی کرادی گئی ہے کہ ٹیکس آمدن بڑھانے کیلئے ٹیکس حکام انتظامی اقدامات بہتر بنائیں گے۔

  • پنجاب میں 56 کمپنیز اسکینڈل، تحقیقات میں بڑی پیش رفت، جلد اہم گرفتاریوں کا امکان

    پنجاب میں 56 کمپنیز اسکینڈل، تحقیقات میں بڑی پیش رفت، جلد اہم گرفتاریوں کا امکان

    لاہور : پنجاب میں 56 کمپنیز اسکینڈل میں لاہور ویسٹ مینجمنٹ کمپنی کی تحقیقات میں بڑی پیش رفت ہوئی ، جس کے بعد جلد اہم گرفتاریوں کا امکان ہے جبکہ نیب کو شہباز شریف سمیت سیاستدانوں کے خلاف اہم ریکارڈ مل گیا ہے۔

    تفصیلات کے مطابق نیب ذرائع کا کہنا ہے لاہور ویسٹ مینجمنٹ کمپنی کی تحقیقات میں بڑی پیش رفت سامنے آئی ہے، لاہور میں صفائی کے نام پر قومی خزانے کو 53 ارب روپے کا نقصان پہنچائے جانے کا انکشاف ہوا ہے۔

    ذرائع کا کہنا ہے کہ صفائی کمپنی میں 9 سیاستدانوں،7 بیوروکریٹس سمیت 22 افراد کے گرد گھیرا تنگ ہو گیا ہے جبکہ شہباز شریف سمیت سیاستدانوں کے خلاف بھی نیب کو اہم ریکارڈ مل گیا ہے۔

    [bs-quote quote=”صفائی کمپنی میں 9 سیاستدانوں،7 بیوروکریٹس سمیت 22 افراد کے گرد گھیرا تنگ” style=”style-6″ align=”left”][/bs-quote]

    ذرائع کے مطابق سابق ڈی سی اوز اور بورڈ آف ڈائریکٹرز بھی لوٹ مار میں ملوث ہے، بعض سیاستدانوں اور بیوروکریٹس نے تحقیقات میں نیب کیساتھ تعاون نہیں کیا۔ ذرائع نے اس کیس میں جلد اہم گرفتاریوں کا امکان ظاہر کیا ہے۔

    یاد رہے رواں سال اپریل میں نیب لاہور نے 56 کمپنیوں کے ریکارڈ کے حوالے سے رپورٹ سپریم کورٹ میں جمع کرائی تھی، نیب رپورٹ میں کہا گیا تھا کہ آڈٹ انکوائری میں ان کمپنیوں میں قانون کی خلاف ورزی کی نشاندہی کی گئی۔ ان کمپنیوں میں پنجاب سلورلینڈ بائیو ٹیکنالوجی کمپنی، بورڈ آف انویسٹمنٹ اینڈ ٹریڈ پنجاب، قائداعظم ونڈ پاور کمپنی شامل ہیں۔

    سپریم کورٹ رجسٹری میں پنجاب کمپنیزاسکینڈل میں چیف جسٹس نے ریمارکس دیے تھے کہ اگرریفرنس بنتا ہے تو فائل کریں، 3 لاکھ سے زائد تنخواہ لینے والے افسران نیب کے روبرو پیش ہوں گے۔

    واضح رہے کہ نیب نے جولائی میں شہبازشریف کو پنجاب پاور کمپنی اسکینڈل سے متعلق پوچھ گچھ کیلئے طلب کیا تھا، جس کے احکامات سابق وزیر اعلیٰ پنجاب نے ہوا میں اڑا دیئے تھے۔

    خیال رہے نیب لاہور نے5 اکتوبر کو شہبازشریف کو صاف پانی کیس میں طلب کیا تھا تاہم ان کی پیشی پر انہیں آشیانہ ہاؤسنگ اسکینڈل میں کرپشن کے الزام میں گرفتار کرلیا گیا تھا، جس کے بعد سے شہبازشریف نیب کی تحویل میں ہیں۔