بھارت: سمندری طوفان ہدہد نے ساحلی علاقوں میں بڑے پیمانے پرتباہی مچادی ہے، طوفان سے آٹھ افراد ہلاک ہوگئے۔
بھارتی میڈیا کے مطابق سمندری طوفان سے آندھرا پردیش کے ساحلی علاقوں میں زیادہ تباہی ہوئی، طوفان کے بعد امدادی کارروائیاں جاری ہیں، خلیج بنگال سے اٹھنے والا سمندری طوفان ’ہد ہد‘ ایک سو اسی کلو میٹر فی گھنٹہ کی رفتار سے آندھرا پردیش کے ساحلی علاقے وشاکا پٹنم سے ٹکرایا تھا،
جس کے نتیجے میں بجلی اورمواصلات کا نظام درہم برہم ہوگیا، سیکڑوں مکانوں کی چھتیں اڑ گئیں، ہزاروں درخت زمین بوس ہوگئے جبکہ چارلاکھ افراد کومحفوظ مقامات پرمنتقل ہونا پڑا۔
محکمہ موسمیات نے ریاست اڑیسہ میں مزید بارش کی پیش گوئی کی ہے، جس کی وجہ سے سیلاب کا خدشہ ہے۔
محکمہ موسمیات کے ماہرین کے مطابق طوفان ’ہد ہد‘ بڑے پیمانے پر تباہی پھیلا سکتا ہے اور اس کی شدت دو سو کلومیٹر فی گھنٹے تک جا سکتی ہے جبکہ طوفان کی شدت میں چھ گھنٹوں بعد کمی کا امکان ہے۔
حکام کی جانب سے ہنگامی حالات سے نمٹنے کے لیے بھارتی بحریہ کوالرٹ رہنے کا حکم دیا گیا ہے۔
