کوئٹہ : نواب اکبر بگٹی قتل کیس میں جنرل (ر) پرویز مشرف کی میڈیکل رپورٹ انسدادِ دہشتگردی کی عدالت میں پیش کردی گئی، ڈاکٹرز نے سابق صدر کی صحت کو سفر کے ناقابل قرار دے دیا۔
نواب اکبر بگٹی قتل کے مقدمے کی سماعت انسدادِ دہشتگردی کی عدالت ون کے جج آفتاب احمد لون نے کی، سندھ حکومت کی جانب سے بلوچستان حکومت کو موصول ہونے والی میڈیکل رپورٹ ڈی جی ہیلتھ بلوچستان فاروق اعظم جان نے عدالت میں پیش کی۔
رپورٹ کے مطابق سابق صدر کی ریڑھ کی ہڈی کی مہروں میں تکلیف ہے، جس کے باعث وہ چند گز بھی نہیں چل سکتے جبکہ دل کی تین شریانیں بھی بند ہیں، جس سے ان کے ایک پاؤں میں بھی تکلیف ہے۔
پیش کی جانے والی میڈیکل رپورٹ پر آئندہ سماعت میں بحث ہوگی جبکہ عدالت نے سابق صدر کی پیشی سے ایک دن کی حاضری کی استثنیٰ منظور جبکہ سابق وفاقی وزیر داخلہ آفتاب شیر پاؤ اور سابق صوبائی وزیر داخلہ شعیب احمد نوشیروانی کی جانب سے مقدمے سے بریت کی حوالے سے دائر درخواست مسترد کردی ۔
مقدمے کی آئندہ سماعت اب 22اپریل کو ہوگی۔
