پدم شری ایوارڈ یافتہ اور ہندوستانی سنیما کی ایک مشہور شخصیت اداکار کوٹا سرینواسا راؤ چل بسے۔
بھارتی میڈیا کے مطابق 2 دن قبل ہی اپنی 83ویں سالگرہ منانے والے کوٹا سرینواسا راؤ کی موت اتوار کی صبح حیدرآباد دکن میں واقع ان کی رہائش گاہ پر ہوئی، اداکار کافی عرصے سے بیمار تھے۔
کوٹا سری نواسا 10 جولائی 1942 کو کنکی پاڈو، آندھرا پردیش میں پیدا ہوئے انہوں نے اپنے فلمی کیریئر کا آغاز 1978 میں کیا، اداکار کوٹا سرینواسا راؤ نے 4 دہائیوں پر مشتمل اپنے شاندار کیریئر کے دوران 700 سے زائد فلموں میں اداکاری کی، جن میں تیلگو، تامل، کنڑ اور ہندی فلمیں شامل تھیں۔
کوٹا سرینواسا راؤ خصوصاً منفی کرداروں اور کیریکٹر رولز میں اپنی بہترین اداکاری کے لیے مشہور تھے، انہیں بھارتی سنیما کے لیے خدمات پر کئی اعزازات سے نوازا گیا، جن میں 2015 میں ’پدما شری‘ ایوارڈ بھی شامل ہے۔
بھارتی میڈیا کے مطابق اداکاری کے علاوہ کوٹا سرینواسا راؤ نے سیاست میں بھی قدم رکھا اور 1999 سے 2004 تک بھارتیہ جنتا پارٹی کے ایم ایل اے کے طور پر خدمات انجام دیں۔
