سابق ترجمان پینٹاگون ڈینا ڈبلیو وائٹ نے کہا ہے کہ پاکستان نے کہہ دیا ہے پانی روکنا جنگ کے مترادف ہوگا، کسی ملک کا پانی روکنا جنگی جرائم میں شامل ہوتا ہے۔
اے آر وائی نیوز کے پروگرام آف دی ریکارڈ میں گفتگو کرتے ہوئے پینٹاگون کی سابق ترجمان ڈینا ڈبلیو وائٹ کا کہنا تھا کہ بھارت کی جانب سے پانی روکنے کے اقدام کو نظرانداز نہیں کیا جاسکتا، پاکستان اور بھارت دونوں ایٹمی طاقتیں ہیں، دونوں جانب سے یکطرفہ اقدامات مسائل پیدا کرسکتے ہیں، ایٹمی طاقتوں میں کشیدگی خطے کی بجائے عالمی مسئلہ ہے۔
ڈینا ڈبلیو وائٹ نے کہا کہ پاکستان نے تحقیقات کی پیش کش کی جو اچھی بات ہے، پاکستان اور بھارت کےدرمیان بات چیت ہونی چاہیے، 9/11 کے بعد پاکستان نے امریکا کی بھرپورسپورٹ کی، کشیدگی کے دوران امریکی صدر ٹرمپ نے بہترین کردار ادا کیا۔
سابق ترجمان پینٹاگون نے کہا کہ ٹرمپ دنیا میں امن چاہتے ہیں، امریکی وزیرخارجہ کی گفتگو کی وجہ سے امن کا نتیجہ نکلا، عالمی برادری کو پاک بھارت کشیدگی کم کرنے کیلئے کردار ادا کرنا چاہیے۔
ڈیناڈبلیووائٹ نے کہا کہ کسی بھی واقعے سے متعلق ثبوت دنیا کے سامنے رکھنے چاہئیں، پاکستان نے کشیدگی کے دوران ذمہ دارانہ رویہ اختیار کیا، امریکا اپنے مفادات کے مطابق کردار ادا کرتا ہے۔
انھوں نے کہا کہ امریکا پاکستان کو اسٹریٹجک پارٹنر کے طور پر دیکھتا ہے، امریکا اور پاکستان میں گزشتہ 25سال سے اسٹریٹجک تعلقات رہے ہیں۔
سابق ترجمان پینٹاگون ڈینا ڈبلیو وائٹ کا کہنا تھا کہ پاکستان اور بھارت میں جو بھی صورتحال ہو پوری دنیا متاثر ہوسکتی ہے، صدر ٹرمپ تنازعات کے حل کےلیے لیڈر شپ سے بات کررہے ہیں۔
