ممبئی : انڈین اسٹار بیٹسمین ویرات کوہلی نئی آنے والی بالی ووڈ کی فلم ’’ڈشوم‘‘ میں اغواء ہوجائیں گے۔
جی ہاں ! خبر پڑھ کر پریشان ہونے کی ضرورت نہیں کیونکہ ہم بات کررہے ہیں بھارت کے پسندیدہ کھلاڑی ویرات کوہلی کی زندگی پر بنی فلم کی جس میں ویرات کوہلی کا کردار ادا کرنے والے فنکار کوہلی اغواء ہوجائیں گے۔
انڈین میڈیا کے مطابق ساجد ندیہ والا اور روہت دھون نے انکشاف کیا ہے کہ اداکار ثاقب سلیم نے اس فلم میں ویرات کوہلی کا کردار بہت خوبصورتی اور باریک بینی سے ادا کیا ہے، جن کو فلم میں اغواء کرلیا جاتا ہے۔
فلم سازوں کے قریبی ذرائع نے اس بات کی تصدیق کی ہے کہ ثاقب سلیم اس فلم ’’ڈشوم‘‘ میں کرکٹر کا کردار ادا کررہے ہیں، وہ فلم میں عمدہ کھیل پیش کر کے اپنی ٹیم کو فتح حاصل کرواتے ہیں۔
گزشتہ چند دن قبل اداکار کی معروف کرکٹر ویرات کوہلی کے ساتھ سوشل میڈیا پر تصویر شائع ہوئی، جو سوشل میڈیا صارفین کی توجہ کا مرکز بنی تھی۔
ویرات کوہلی اپنے عمدہ کھیل کی وجہ سے دنیا بھر میں مشہور کھلاڑی کے نام سے جانے جاتے ہیں، انہوں نے خاص طور پر مشکل اوقات میں اچھی بیٹنگ کر کے اپنی ٹیم کو فتح حاصل کروائی ہے۔
واضح رہے ویرات کوہلی اور معروف اداکارہ انوشکا شرما کے حوالے سے خبریں سامنے آئی تھیں کہ دونوں ایک دوسرے سے محبت کرتے تھے مگر اب یہ سلسلہ ختم ہوگیا ہے۔
