مظفرآباد : بھارتی فورسز کی لائن آف کنٹرول پر بلااشتعال فائرنگ سے ایک جوان شہید اور ایک شہری شدید زخمی ہوگیا۔
پاک فوج کے ترجمان کے مطابق بھارتی فورسز نے ایک بار پھر لائن آف کنٹرول کی خلاف ورزی کرتے ہوئے پانڈو سیکٹر میں بلا اشتعال فائرنگ کی اور مارٹرگولے برسائے۔
ترجمان پاک فوج کے مطابق بھارتی فائرنگ سے ایک جوان شہید اور ایک شہری زخمی ہوگیا، بھارتی پروپیگنڈے کیخلاف وزیراعظم نوازشریف کے بیان کے کچھ دیر بعد ہی بھارتی فورسز کی جانب سے بلااشتعال فائرنگ کا واقعہ پیش آیا ہے ۔
پونچھ: بھارت کی جانب سے لائن آف کنٹرول کی خلاف ورزیوں کا سلسلہ تھم نہ سکا، بھارتی فوج کی ایک بار پھر پونچھ سیکٹر پر بلااشتعال فائرنگ سے مکین خوفزدہ ہوگئے۔
بین الاقوامی ردِعمل کے باوجود بھارتی جارحیت تھمنے کا نام نہیں لے رہی، بارہ روز گزرنے کے بعد بھی بھارتی توپوں کے منہ بند نہ ہوسکے، پونچھ سیکٹرمیں نیزا پیر کے مقام پر بھارتی فوج کی بلااشتعال فائرنگ کا سلسلہ جاری ہے۔ فائرنگ کی وجہ سے علاقہ میں خوف وہراس کی فضا پھیل گئی ہے اورعلاقہ مکین گھروں میں محصورہوکررہ گئے ہیں۔
دواکتوبر سے ایل او سی اور ورکنگ باؤنڈری پر بھارتی فوج کی جارحیت سے کئی مکانات تباہ اور درجنو ں مویشی مارے گئے ہیں، متاثرہ علاقوں سے لوگوں کی بڑی تعداد نے نقل مکانی بھی کرلی ہے۔
اس سے قبل کوٹلی کے نکیال سیکٹر پر بھارتی فوج کی بلا اشتعال فائرنگ کے نتیجے میں چار بچے زخمی ہوگئے۔
آئی ایس پی آر ترجمان کے مطابق نکیال سیکٹر کے گاؤں کنتھی گالا پر بھارتی فوج کی جانب سے فائر کئے گئے مارٹر شیل کے گولے گرنے سے چار بچے زخمی ہوگئے جنہیں علاج کیلئے قریبی اسپتال منتقل کردیا گیا ہے۔
ذرائع کے مطابق زخمی ہونے والوں میں فیصل منیر، مہوش، یاسر منیر اور سمیر شامل ہیں، جنہیں گردن پر زخم آئے ہیں ۔
دوسری جانب پاکستان کی جانب سے بھارتی شیلنگ کا بھرپور جواب دیا گیا ہے