چھتیس گڑھ: بھارت میں ماؤ نواز باغیوں کے خلاف جنگل میں آپریشن کے دوران بڑی تعداد میں بھارتی فوجی ہلاک ہو گئے۔
بھارتی میڈیا کے مطابق ریاست چھتیس گڑھ میں ماؤ نواز باغیوں کے حملوں میں 22 بھارتی فوجی اہل کار ہلاک ہو گئے ہیں، جب کہ 32 زخمی ہوگئے۔
بھارتی حکام کے حوالے سے میڈیا رپورٹس میں بتایا گیا ہے کہ آپریشن باغیوں کے سرگرم رکن مادوی ہڈما کی موجودگی کی خفیہ اطلاع پر شروع کیا گیا تھا۔
گزشتہ روز باغیوں اور پولیس کے درمیان فائرنگ کا سلسلہ شروع ہوا، جو 4 گھنٹے تک جاری رہا، اس آپریشن میں 2 ہزار اہل کاروں نے حصہ لیا، رپورٹس میں کہا جا رہا ہے کہ ہلاکتوں کے علاوہ ایک فوجی اہل کار لاپتا بھی ہے۔
حملے کے بعد سیکیورٹی فورسز کے مزید دستے جوناگوڑا گاؤں میں پہنچ گئے، جب کہ زخمیوں کو اسپتال منتقل کیا جا چکا ہے۔
فوجی اہل کاروں پر ماؤ نواز باغیوں نے اس وقت زبردست حملہ کیا جب انھوں نے جنگل میں گھسنے کی کوشش کی، بھارتی حکام کے مطابق آپریشن میں ماؤ باغیوں کو بھی شدید جانی نقصان کا سامنا کرنا پڑا، تاہم حملے کی جگہ سے صرف ایک خاتون کی لاش برآمد ہوئی ہے۔
بھارتی فوجیوں کی ہلاکت پر وزیر اعظم نریندر مودی نے اظہار افسوس کرتے ہوئے ان کے اہل خانہ سے تعزیت کی۔
