راولپنڈی : جہلم سے گرفتار دہشت گرد مجید کے موبائل اورڈرون کے فرانزک میں پاکستان میں دہشت گردی میں بھارتی فوج اور ایجنسیوں کے ملوث ہونے کے ناقابل تردید شواہد سامنے آگئے۔
تفصیلات کے مطابق پاکستان میں دہشت گردی کے پیچھے بھارتی فوج اور ایجنسیاں پوری طرح متحرک ہیں ، جہلم سے گرفتار دہشت گرد مجید کے موبائل اور ڈرون فرانزک کے بعد ناقابل تردید شواہد سامنے آگئے۔
دہشت گرد مجید بھارتی فوج کے آ فیسرز اور ہینڈلرز کیساتھ رابطے میں تھا اور آئی ای ڈیزنصب کرنے کے بدلے بھارتی فوج سے پیسہ وصول کررہا تھا۔
ذرائع نے بتایا کہ دہشت گرد مجید اور بھارتی آرمی افسران میں واٹس ایپ گفتگو سے ہوشربا انکشافات بھی سامنے آئے، مجید سےگفتگو میں 4بھارتی آرمی افسران کی نشاندہی ہوتی ہے، بھارتی افسران میں میجر سندیپ ورما، صوبیدار سکھوندر، حوالدار امیت اور ایک سپاہی شامل ہیں۔
ذرائع کا کہنا تھا کہ گفتگو میں ہینڈلر دہشت گرد مجید سے کہہ رہا ہے پاکستان میں شہریوں کی لاشیں چاہئیں، دہشتگرد کو بھارتی میجر سندیپ نے کہا لاہور سے لیکر بلوچستان تک نیٹ ورک موجود ہے، ہم نہ ہی بچے ہیں نہ ہی پاکستان میں یہ پہلی دہشتگردکارروائی ہے، ہم کبھی بھی نہیں چاہیں گے کہ ہمارا بندہ پکڑا جائے، ایک لاکھ بھی بھیج سکتا ہوں مگر آپ پاکستانی ایجنسیز کی نظر میں آسکتے ہیں، آپ کو بھی باقاعدگی سے پیسے ملتے رہیں گے۔
ٹریس کال میں بھارتی آرمی کے صوبیدار سکھوندر کی دہشتگرد مجید سے گفتگو سامنےآئی ، سکھوندر نے مجیدکو کہا گیا دھماکے میں جتنے لوگ مرے فی کس 10لاکھ روپے ملیں گے۔
آڈیو کالز میں آئی ای ڈیز کی وصولی ، نصب کرنے کے مقامات کی بھی نشاندہی کی گئی ، یہ آئی ای ڈیز بذریعہ ڈرون دہشتگرد مجید کو فراہم کی جاتی تھیں۔
24ستمبر کو سکھوندر نےدہشتگرد مجیدکو برنالہ بھمبر میں بارودی موادکی نشاندہی کی اور 13 اکتوبر کو دہشتگرد مجید نے باغ میں فوجی گاڑی پربم حملہ کیا، جس میں 3 جوان زخمی ہوئے، 13اکتوبر کے بم حملے کیلئے دہشت گرد مجید کو بھارتی ہینڈلر نے 1 لاکھ 80 ہزار روپے دیئے۔
22 نومبر کو سکھوندر نے مجید کوہیڈ مرالہ پرتباہ شدہ ڈرون اور آئی ای ڈی کی نشاندہی کی جبکہ 30 نومبر کو دہشت گرد نےجلالپور جٹاں میں فوجی گاڑی پربم لگایا ، جس میں 4جوان زخمی ہوئے، مجید نے ٹاسک مکمل ہونے پر 6 لاکھ 56 ہزار روپے حاصل کئے۔
دہشتگرد مجید،بھارتی فوجی افسرآئی ای ڈیز کیلئے مٹھائی کے ڈبے کا لفظ استعمال کرتےرہے، 22 اپریل 2025 کو سکھوندر نے ندالہ کے قریب آئی ای ڈی پہنچائی اور 23 اپریل کو سکھوندر نے دہشتگرد کو مصروف بس اسٹینڈ پر بم حملے کا ٹاسک دیا۔
