بھارت میں اگلے ماہ 9 ستمبر کو نائب صدر کا انتخاب ہو رہا ہے جس کے لیے ایک مسلمان طالب علم نے بھی کاغذات نامزدگی جمع کرا دیے ہیں۔
بھارتی میڈیا کےمطابق گزشتہ ماہ جگدیپ دھنکھر کے مستعفی ہونے کے بعد نائب صدر کا عہدہ خالی ہو گیا تھا۔ نئے نائب صدر کا انتخاب 9 ستمبر کو ہوگا جس کے لیے امیدوار کاغذات نامزدگی جمع کرا رہے ہیں۔
رپورٹ کے مطابق راجھستان کے علاقے جیسلمیر سے تعلق رکھنے والے صحافت کے طالب علم جلال الدین گزشتہ روز کاغذات نامزدگی جمع کرانے ضلع کلکٹر کے دفتر پہنچ گئے۔ اس اہم عہدے کے لیے ایک طالبعلم کی جانب سے امیدوار بننا سب کو حیران کر گیا۔
جلال الدین نے کلکٹر کے دفتر میں کاغذات نامزدگی جمع کرانے کے لیے ضروری اپنی نامزدگی کے لیے ضروری رسمی کارروائیاں مکمل کر لی ہیں اور 15000 روپے نقد جمع کروانے کے بعد ایک رسید حاصل کر چکے ہیں۔
تاہم جلال الدین کو باضابطہ طور پر الیکشن لڑنے کا اہل ہونے کے لیے دیگر دستاویزات کے ساتھ اگلے تین روز میں ایک تجویز کنندہ اور ایک حمایتی بھی پیش کرنا ہوگا۔ اس کے علاوہ فارم کی دیگر شرائط کی تکمیل بھی کرنا ہوگی۔
نوجوان پر امید ہے کہ تمام رسمی کارروائیاں مکمل کرنے کے بعد وہ الیکشن کمیشن میں اپنا کاغذات نامزدگی جمع کرا دیں گے جس کے بعد ان کی امیدواری کو سرکاری سمجھا جائے گا۔ رسمی کارروائیوں کے لیے وہ دارالحکومت دہلی بھی جائیں گے۔
جلال الدین نے میڈیا سے گفتگو میں کہا کہ ان کی توجہ جیت یا ہار پر نہیں بلکہ ہندوستان کے جمہوری عمل میں حصہ لینے پر ہے۔ انہوں نے یہ بھی بتایا کہ نائب صدر کے عہدے کے لیے یہ نامزدگی ان کا پہلا بڑا سیاسی قدم نہیں ہے، بلکہ ایک طویل مدتی عزم کا حصہ ہے۔ میں چاہتا ہوں کہ عام شہری سیاست میں حصہ لینے کے لیے حوصلہ افزائی ہو۔
واضح رہے کہ جے پور کی ہری دیو جوشی یونیورسٹی میں صحافت کے طالبعلم جلال الدین طلبہ سیاسی سرگرمیوں میں بھی بڑھ چڑھ کر حصہ لیتے ہیں۔ وہ پہلی مرتبہ الیکشن نہیں لڑ رہے بلکہ اس سے قبل انہوں نے وارڈ پنچ، ریاستی اسمبلی اور لوک سبھا انتخابات کے لیے بھی کاغذات نامزدگی داخل کر چکے ہیں۔ تاہم اس بار ان کی نظریں نائب صدر کے انتخاب پر ہیں۔
