Tag: بھارتی وزیر دفاع

اسلام آباد: وزیر خارجہ شاہ محمود قریشی نے کہا ہے کہ بھارت یکطرفہ اقدامات سے امن کو خطرات سے دوچار کرنا چاہتا ہے۔

تفصیلات کے مطابق وزیر خارجہ شاہ محمود قریشی نے بھارتی وزیر دفاع کے بیان پر ردعمل دیتے ہوئے کہا ہے کہ مقبوضہ کشمیر کے مکینوں کا بلاجواز محاصرہ انتہائی قابل مذمت ہے۔

شاہ محمود قریشی نے کہا کہ بھارتی وزیر دفاع کا بیان بھارت کی بدترین صورت حال کی عکاسی کرتا ہے، مقبوضہ کشمیر میں محاصرے کی مزید طوالت بہت بڑا انسانی المیہ ہوگا۔

وزیر خارجہ نے کہا کہ اقوام متحدہ سیکیورٹی کونسل نے غیرمستحکم صورت حال کا نوٹس لیا ہے، عالمی قوانین، یو این چارٹر کے مطابق اپنے موقف پر قائم ہیں۔

مزید پڑھیں: فاشسٹ اور جنگی جنون میں مبتلا ریاستیں کامیاب نہیں ہوسکتیں: وزیر خارجہ

انہوں نے کہا کہ پاکستان مذاکرات چاہتا تھا لیکن بھارت نے خود مذاکرات کو ٹھکرایا، مقبوضہ کشمیر میں زمینی حقائق اس وقت سامنے آئیں گے جب بھارت کرفیو ہٹائے گا۔

واضح رہے کہ گزشتہ روز شاہ محمود قریشی کا کہنا تھا کہ سنہ 1965 کے بعد پہلی بار سلامتی کونسل نے کشمیر معاملہ متنازع ہونے کی تصدیق کی ہے، تاریخ بتاتی ہے فاشسٹ اور جنگی جنون میں مبتلا ریاستیں کامیاب نہیں ہوسکتیں۔

خیال رہے کہ بھارتی وزیر دفاع راج ناتھ نے ایٹمی حملے میں پہل کرنے کا عندیہ دینے کے بعد ایک اور بیان میں کہا تھا کہ پاکستان سے مذاکرات صرف آزاد کشمیر پر ہوسکتے ہیں۔

یاد رہے کہ بھارت نے مقبوضہ کشمیر پر فوجی طاقت کے ذریعے اپنا تسلط قائم کیا ہوا تھا اور رواں ماہ پانچ اگست کو وہاں کی خصوصی حیثیت ختم کرتے ہوئے وادی کو بھارت کا ہی حصہ بنا ڈالا جس پر عالمی دنیا نے بھی شدید احتجاج کیا۔

لاہور: پاکستان تحریک انصاف کے رہنما ہمایوں اخترخان کا کہنا ہے کہ اپوزیشن اپنے سیاسی مفادات کو پس پشت ڈال کرقوم کی آواز میں اپنی آواز کو شامل کرے تاکہ ہم کشمیر کا مقدمہ بھرپور انداز میں دنیا کے سامنے رکھ سکیں۔

تفصیلات کے مطابق پاکستان تحریک انصاف کے سینئر مرکزی رہنما ہمایوں اختر خان نے کہا ہے کہ پاکستان بھارت کی گیدڑ بھبھکیوں سے پہلے خوفزدہ ہوا ہے اور نہ آئندہ ہوگا۔

ہمایوں اختر خان نے کہا کہ وزیراعظم عمران خان کی خاصیت ہے کہ وہ جس کام کا عزم کرلیں اسے مکمل کرتے ہیں۔ انہوں نے کہا کہ بھارت صرف بوکھلاہٹ کا شکار ہے اور370 اور 35 اے کو ختم کرنا اس کا منہ بولتا ثبوت ہے۔

تحریک انصاف کے رہنما نے کہا کہ وزیر اعظم عمران خان کے کامیاب دورہ امریکہ کے بعد بھارت میں کھلبلی مچی ہوئی ہے اور 370 اور 35 اے کوختم کرنے کا اقدام اس کی بوکھلاہٹ کا منہ بولتا ثبوت ہے اور اس نے بہت بڑی اسٹرییٹجک غلطی کی ہے۔

انہوں نے کہا کہ پاکستان کی حکومت نے اپنے کشمیری بھائیوں کی مدد سے پیچھے نہ ہٹنے کا نہ صرف واضح اعلان کیا ہے بلکہ اپنے اقدامات سے عملی طور پر ثابت بھی کیا ہے۔

ہمایوں اختر خان نے کہا کہ بھارت کے وزیر دفاع کا بیان انتہائی غیر ذمہ دارانہ ہے، پاکستان بھارت کی گیدڑ بھبھکیوں سے پہلے خو فزدہ ہوا ہے اور نہ آئندہ ہوگا بلکہ بھارت کی کسی بھی جارحیت کا جواب دینے کی ہر ممکن تیاری کر رکھی ہے اور بھارت اس سے بخوبی آگاہ ہے۔