بھارتی ویمنز کرکٹ ٹیم کی کپتان آسٹریلیا کے خلاف واحد اور تاریخی ٹیسٹ میچ کے دوران بدمعاشی پر اتر آئیں جس کی ویڈیو وائرل ہوگئی۔
آسٹریلوی اور بھارتی خواتین کرکٹ ٹیموں کے درمیان ہونے والے تاریخی ٹیسٹ میچ میں دونوں ٹیموں کے کپتان کے درمیان فیلڈ میں گرما گرمی دیکھنے میں آئی۔ ہرمن پریت کور نے غصے سے بال آسٹریلوی کپتان ایلیسا ہیلی کی طرف پھینک دی۔
مذکورہ واقعہ ٹیسٹ میچ کے 80 ویں اوور کے دوران پیش آیا، جب آسٹریلیا کی ایلیسا ہیلی اور اینابیل سدرلینڈ دوسری اننگز کے دوران بیٹنگ کر رہی تھیں۔
بھارتی ٹیم شدت سے آسٹریلوی بیٹرز کی پارٹنرشپ توڑنے کی متمنی تھی، اس دوران کپتان ہرمن پریت خود بولنگ کرنے کے لیے آئیں، ان کی بال ایلیسا نے سیدھ ڈرائیو کی۔
گیند جیسے ہی ہرمن پریت کے پاس پہنچی انھوں نے بال اچک کر بیٹر کی طرف تھرو کردی۔ اس دوران بیٹر ایلیسا نے بیٹ سے اپنی طرف آتی گیند روکی اور ہاتھ کے اشارے سے ہرمن سے پوچھا کہ یہ کیا حرکت تھی۔
اس کے بعد آسٹریلوی ویمنز کپتان نے ہرمن کو چوکا لگادیا۔ اگلی گیند کو بھی ایلیسا نے سوئپ کرنے کی کوشش کی تاہم وہ اس گیند پر ایل بی ڈبلیو ہوگئیں۔
Full badmashi from harmanpreet #INDvAUS https://t.co/Z7duSof2th
— Amit Dubey (@AmitHellboyz143) December 23, 2023
ان کے آؤٹ ہونے کے بعد بھارتی کپتان حرمن پریت کور نے بھرپور خوشی کا اظہار کیا۔ ایلیسا نے 101 گیندوں کا سامنا کرتے ہوئے 32 رنز کی مزاحمتی اننگز کھیلی۔
واضح رہے کہ ممبئی میں ہونے والے واحد ٹیسٹ میچ کے چوتھے دن آسٹریلین ویمنز ٹیم کو بھارت کے ہاتھوں آٹھ وکٹوں سے شکست کا سامنا کرنا پڑا تھا۔