Tag: بھارتی ٹیم

سابق بھارتی کرکٹر ہربھجن سنگھ نے سلیکٹرز کو سپر اسٹارز سے پیچھا چھڑانے کا مشورہ دے دیا۔

بارڈر گواسکر ٹرافی میں بھارت کو آسٹریلیا کے خلاف پانچ میچوں کی سیریز میں 3-1 سے شکست ہوئی اور بھارتی ٹیم ٹیسٹ چیمپئن شپ کے فائنل سے بھی باہر ہوگئی، سڈنی ٹیسٹ میں شکست نے کوچ گمبھیر اور ٹیم کی مشکلات بڑھا دی ہیں۔

یوٹیوب چینل پر سابق کرکٹر ہربھجن سنگھ نے گمبھیر سے پہلے اور بعد کے دور کا موازنہ کیا اور سوال کیا کہ بھارتی ٹیم کے لیے چیزیں کہاں غلط ہورہی ہیں۔

ہربھجن نے کہا کہ راہول ڈریوڈ تک سب کچھ ٹھیک تھا، بھارت نے ورلڈ کپ جیتا اور سب کچھ ٹھیک تھا لیکن اچانک کیا ہوا؟ پچھلے چھ ماہ میں ہم سری لنکا سے ہار گئے، نیوزی لینڈ کے خلاف سیریز میں وائٹ واش ہوا اور اب آسٹریلیا میں سیریز 3-1 سے ہار گئے۔

انہوں نے کہا کہ سلیکٹرز اور بورڈ کو مشورہ دیا کہ وہ سپر اسٹار پر انحصار کرنا چھوڑ دیں جو کافی عرصے سے ختم ہورہی ہے اور ان کی رائے تھی کہ صرف پرفارم کرنے والے کھلاڑیوں کو ہی بھارت کی اگلی ریڈ بال ٹیم کے لیے شارٹ لسٹ کیا جائے۔

سابق کرکٹر نے کہا کہ ہر کھلاڑی کی ایک ساکھ ہوتی ہے اگر یہ بات ہے تو پھر کپل دیو، انیل کمبلے یا ان لوگوں کو شامل کریں جو ہندوستان کے سب سے برے میچ ونر رہے ہیں، آپ کو ساکھ کی بنیاد پر کھلاڑیوں کا انتخاب نہیں کرنا چاہیے۔

بھارتی ٹیم کے کپتان روہت شرما کو 100 رنز پر پوری ٹیم کا آؤٹ ہونا منظور تھا مگر وہ بنگلہ دیش سے ٹیسٹ کسی قیمت پر بھی ڈرا نہیں کرنا چاہتے تھے۔

دوسرے ٹیسٹ میں بارش کے باعث تقریباً ڈھائی دن کا کھیل نہ ہوسکا اور پہلے تین دنوں میں صرف 35 اوورز ہی پھینکے جاسکے تھے، اس کے باوجود روہت شرما اپنے ذہن میں اس ٹیسٹ میچ کو نتیجہ خیز بنانے کا پلان کیے بیٹھے تھے جس کے لیے انھوں نے نہایت جارحانہ طرز عمل بھی اپنایا۔

میچ کے بعد پریس کانفرنس کرتے ہوئے روہت شرما نے کہا کہ میچ کو نتیجہ خیز بنانے کے لیے ہم تیزی سے رنز اسکور کرنا چاہتے تھے تاکہ اوورز بچیں، میں اس بات کے لیے بھی تیار تھا کہ پہلی اننگز میں پوری ٹیم 100 اور 120 رنز پر آؤٹ ہوجائے۔

روہت شرما کا مزید کہنا تھا کہ یہ ایک رسک تھا جو ہم نے لیا جبکہ اس ٹیسٹ میچ میں بھارت کے نوجوان کھلاڑیوں نے بھی اپنا بھرپور کردار ادا کیا۔

روی چندرن ایشون کا کہنا تھا کہ روہت شرما ہر صورت میں یہ ٹیسٹ میچ نتیجہ خیز بنانا چاہتے تھے اس کے لیے انھوں نے ہمیں کچھ ٹاسک دیے تھے، کپتان جب گراؤن میں بیٹنگ کے لیے اترے تو انھوں نے چھکے سے شروعات کی جس سے ان کی ذہنیت کا اندازہ ہوگیا تھا۔

بنگلہ دیش نے اپنی پہلی اننگز میں 233 رنز اسکور کیے تھے، جس کے جواب میں بھارتی بیٹرز نے نہایت تیز بیٹنگ کی اور محض 10.1 اوورز میں ٹیم کی سنچری اسکور کرکے ورلڈ ریکارڈ بنا ڈالا۔

بھارت نے 34.4 اوورز میں 8.22 فی اوور کی اوسط سے رنز بنائے اور 285 رنز 9 کھلاڑی آؤٹ پر اپنی اننگز ڈیکلیئر کردی، بعدازاں بنگلہ دیش کی ٹیم دوسری اننگز میں 146 پر محض 47 اوورز میں ڈھیر ہوگئی۔

بھارت کو میچ جیتنے کے لیے 97 رنز کا معمولی ہدف ملا جو اس نے محض 3 وکٹوں کے نقصان پر پور کیا اور تاریخی جیت اپنے نام کی۔

واضح رہے کہ بنگلہ دیش کے خلاف دوسرے ٹیسٹ میں فتح کے ساتھ ہی بھارت ورلڈ ٹیسٹ چیمپئن شپ کے فائنل سے مزید ایک قدم قریب ہوگیا ہے اور یہ مسلسل تیسری بار ہوگا کہ بھارتی ٹیم ورلڈ ٹیسٹ چیمپئن شپ کا فائنل کھیلے گی۔