اسلام آباد : عمران خان کی سابق اہلیہ ریحام خان نے کہا ہے کہ عمران خان کا صرف ایک ایجنڈا ہے کہ وہ کسی طرح وزیراعظم بن جائیں، چاہے ووٹ حاصل کرنے کیلئے کوئی بھی طریقہ استعمال کیا جائے۔
ان خیالات کا اظہار انہوں نے ایک بھارتی ٹی وی چینل کو انٹریو دیتے ہوئے کیا، عمران خان کی سابقہ اہلیہ ریحام خان کی کتاب اس وقت پاکستان میں اور بین الاقوامی سطح پر بھرپور بحث کا موضوع بنی ہوئی ہے۔
اسی حوالے سے بھارتی ٹی وی نے بھی آج ان کا خصوصی انٹرویو نشر کیا جس میں الیکشن سے پہلے بھارتی چینل پر کپتان کی کردارکشی کی گئی اس انٹرویو سے قبل بھارتی ٹی وی نے یکم جون کو معنی خیزاشتہار چلایا جس میں عمران خان کے لیے دھماکہ خیز اور’’ڈنک‘‘کا لفظ لکھا گیا تھا۔
اپنے انٹرویو میں ریحام کا عمران خان پر الزام تراشی کرتے ہوئے مزید کہنا تھا کہ چیئر مین تحریک انصاف اقرباء پروری اور جنسی ہراسگی کے معاملات میں بھی براہ راست ملوث ہیں، انہوں نے کہا کہ عمران خان نے پاکستانی عوام کو مایوس کیا اور وہ قوم کی امیدوں پر پورا نہیں اترے۔
واضح رہے کہ بھارتی چینل پر ریحام خان کا انٹریو آنے سے پہلے ہی حمزہ علی عباسی کے ٹویٹ نے بھانڈا پھوڑ دیا تھا، کتاب کے کئی اقتباس سامنے آگئے، جو ڈنک بھارتی چینل پربیٹھ کر مارا جانا تھا اس پر لعن طعن ہونے لگی۔
اس حوالے سے تجزیہ نگاروں کا کہنا ہے کہ نوازشریف کے بااثر بھارتیوں سے خاص تعلقات، ریحام خان اور حسین حقانی کی ملاقاتیں اور بھارتی ٹی وی کا معنی خیز اشتہار ایسے سوالات کو جنم دیتا ہے کہ ملک میں عام انتخابات سے قبل ڈوریاں کہاں سے ہلائی جارہی ہیں؟
واضح رہے کہ پاکستان تحریک انصاف کے سربراہ عمران خان ایک ایسے سیاسی رہنما ہیں، جن کی نجی زندگی میں نہ صرف پاکستانی عوام بلکہ بھارتیوں کی بہت بڑی اکثریت گہری دلچسپی رکھتی ہے۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
