Tag: بھارتی کسان

نئی دہلی: عجیب سنگھ صرف نام کی ہی منفرد شخصیت نہیں بلکہ وہ ایک ایسے معالج ہیں جو ٹوٹی ہڈیوں کا بغیر آپریشن علاج کر کے لوگوں کو حیران کر دیتے ہیں۔

میڈیا رپورٹس کے مطابق ہوشیار پور کے یہ بابا اب کسانوں کا مفت علاج کرنے کے لیے غازی پور بارڈر پر پہنچ گئے ہیں، ان کا کہنا ہے کہ وہ ڈسک، سروائیکل یا ٹوٹی ہڈی کا فوری طور پر علاج کر دیتے ہیں، جن مریضوں کو ڈاکٹر آپریشن کے لیے بول دیتے ہیں ان کے علاج سے وہ بغیر آپریشن صحت یاب ہو جاتے ہیں۔

اب پنجاب کے ہوشیار پور سے غازی پور کی سرحد پر پہنچنے والے بابا عجیب سنگھ زرعی قانون کے خلاف احتجاج کرنے والے کسانوں کا مفت علاج کر رہے ہیں، وہ گزشتہ 20 سالوں سے لوگوں کا علاج کر رہے ہیں۔

بابا کا علاج مکمل طور پر دیسی نسخوں پر منحصر ہے، ایکیوپریشر سے بھی لوگوں کا علاج کرتے ہیں، بابا کا کہنا ہے کہ وہ کسانوں کی تحریک کی حمایت کے لیے سرحد پر پہنچے ہیں اور وہ سنگھو بارڈر سے ہو کر آ رہے ہیں۔

گھر کے اخراجات کے سلسلے میں انھوں نے بتایا کہ ان کا ایک کاروبار بھی ہے، کھیتی باڑی اور دیگر وسائل بھی موجود ہیں اس لیے کوئی پریشانی نہیں ہے، اور وہ کسانوں کا مفت علاج کرنے پر خوش ہیں، ان کا کہنا تھا کہ وہ اس طرح احتجاج کرنے والوں کو اپنی حمایت دے رہے ہیں۔

یاد رہے کہ بھارت کی مختلف سرحدوں پر کسان گزشتہ سال 26 نومبر سے نئے نافذ کردہ زرعی قوانین کے خلاف سراپا احتجاج ہیں، اس دوران حکومت اور کسانوں کے مابین 11 ادوار کی بات چیت ہو چکی ہے لیکن کوئی نتیجہ نہیں نکل سکا۔

نئی دہلی: بھارت کی ریاست اترکھنڈ کے گاؤں میں کسان نے خودکشی کرلی، اُس نے اپنے الوداعی پیغام میں سب کو تلقین کی کہ وہ بی جے پی کو ووٹ نہ دیں۔

بھارتی میڈیا رپورٹ کے مطابق بھارتی ریاست اتر کھنڈ کے ضلع ہردوار کے گاؤں دادکی میں 65 سالہ ایشو چند شرما نامی بزرگ کسان نے زہر پی کر خودکشی کی۔ خودکشی کرنے والے کسان نے زہر خوانی سے قبل ایک پیغام تحریر کیا جس میں اُس نے لکھا کہ ’بھارتیہ جنتا پارٹی نے پانچ سال میں کسانوں کو تباہ کردیا، ہمارے معاملات حل ہونے کے بجائے اور خراب ہوئے لہذا میرے دوستوں اور عزیزوں ایسی جماعت کو ووٹ نہیں دینا ورنہ آنے والے سالوں میں حکومت ہر شخص کو چائے پینے پر مجبور کردے گی‘۔

مزید پڑھیں: بھارت: 50 ہزار سے زائد کسان سڑکوں پر نکل آئے، لانگ مارچ کا آغاز

ایشو چند شرمانے الزام عائد کیا کہ انہوں نے ایک شخص کی مدد سے بینک سے 5 لاکھ روپے قرض لیا تھا، اب وہی شخص بینک عملے کے ساتھ مل کر انہیں ذہنی تشدد کررہا ہے جس کے باعث وہ اپنی زندگی کا خاتمہ کررہے ہیں۔ کسان نے لکھا کہ میں نے بینک کو جس وقت قرض کے لیے درخواست دی تو ایک شخص کی ضمانت درکار تھی، میں نے اُس شخص کو اپنا دستخط شدہ خالی چیک بھی دیا تھا، بینک کو رقم واپس کرنے کے بعد اُس شخص نے چیک استعمال کیا اور اکاؤنٹ میں جمع ہونے والی فصل کی آمدنی نکالنے کی دھمکی بھی دی۔

دوسری جانب پولیس نے مؤقف اختیار کیا ہے کہ وہ ایشو چند شرمان کے آخری پیغام کی تحقیقات کررہی ہے اور تصدیق کے بعد ہی اس حوالے سے کچھ کیا جاسکتا ہے۔ پولیس افسر لکسرور یندرا سنگھ کا کہنا تھا کہ ’ابتدائی تحقیقات میں یہ بات سامنے آئی کہ خودکشی کرنے والے کسان نے ایک شخص کی مدد سے بینک سے پانچ لاکھ روپے کی رقم بطور قرض حاصل کی، وہ شخص چار لاکھ روپے کا مطالبہ کررہا تھا‘۔

یہ بھی پڑھیں: بھارت: ہزاروں کسان مودی حکومت کے مظالم سے تنگ، برہنہ احتجاج کی دھمکی

پولیس حکام کا کہنا تھا کہ ابھی ہم اس بات کی تحقیقات کررہے ہیں کہ آیا یہ پیغام ایشو چند شرما نے ہی لکھا ہے یا نہیں، اگر اُس نے ہی لکھا ہوا تو مذکورہ شخص اور بینک کے خلاف کارروائی عمل میں لائی جائے گی۔