واشنگٹن: بھارت میں کرونا وبا کے دوران کو وِڈ نائنٹین سے ہلاک ہونے والوں کی اصل تعداد سے متعلق ایک سنگین انکشاف سامنے آیا ہے۔
یونیورسٹی آف واشنگٹن کے انسٹیٹیوٹ فار ہیلتھ میٹرکس اینڈ ایویلویشن کا کہنا ہے کہ بھارت میں مرنے والوں کی تعداد 10 لاکھ سے زیادہ ہو سکتی ہے، جو کہ رپورٹ کی گئی تعداد سے تقریباً 3 گنا زیادہ ہے۔
رپورٹ تیار کرنے والے ماہر شماریات نے کہا ہے کہ بھارت میں کرونا سے ہلاک لاکھوں افراد کی گنتی ہی نہیں ہوئی، اموات سے متعلق 3 لاکھ 96 ہزار کا سرکاری ڈیٹا وبا سے ہوئی اموات کی حقیقی تعداد سے بہت کم ہے۔
بھارت میں اپنے چاہنے والوں سے محروم ہونے والے لوگوں، ماہرین صحت اور ماہر شماریات کا کہنا ہے کہ یہ حقیقی نمبر سے بہت کم ہے، اس سلسلے میں وال اسٹریٹ جرنل کی ایک رپورٹ میں کہا گیا ہے کہ اصل تعداد دس لاکھ سے بھی زیادہ ہو سکتی ہے۔
انسٹیٹیوٹ کے ڈائریکٹر کرسٹوفر مُرے نے بتایا کہ جیسے ہی اپریل میں پورے بھارت میں کرونا وائرس کے کیسز تیزی سے بڑھنے لگے، اسی دوران مشرقی ریاست بہار میں ایک 70 سالہ خاتون شیلا سنگھ کی اس کے گھر پر موت ہو گئی۔
جب کرونا وائرس کے لیے ایک ریپڈ انٹیجن ٹیسٹ کیا گیا تو یہ مثبت آیا، ساتھ میں ایک پھیپھڑے کے اسکین میں وائرل نمونیا اور کو وِڈ انفیکشن کے امکان کا اشارہ بھی ملا، تاہم شیلا سنگھ کی موت کو بھارت میں کو وِڈ سے ہونے والی اموات میں شمار ہی نہیں کیا گیا۔
