جلالپوربھٹیاں: بھارت نے آبی دہشت گردی کا ایک اور وار کر دیا، سلال ڈیم سے پونے 3 لاکھ کیوسک پانی چھوڑ دیا۔
تفصیلات کے مطابق بھارت نے سلال ڈیم سے پونے 3 لاکھ کیوسک پانی چھوڑ دیا ہے، جس کی وجہ سے دریائے چناب میں پانی کی سطح بلند ہو گئی اور سیلابی کیفیت پیدا ہو گئی ہے۔
گزشتہ روز ہی ضلعی انتظامیہ نے دریائے چناب میں اونچے درجے کے سیلاب کی وارننگ جاری کر دی تھی۔
بھارت کی جانب سے پانی چھوڑے جانے کے بعد جلالپوربھٹیاں میں دریائے چناب میں پانی کی سطح میں اضافہ ہو گیا ہے، فلڈ کنٹرول قادرآباد بیراج کے مطابق ہیڈ مرالہ پر پانی کی آمد 1 لاکھ 18 ہزار 754 کیوسک، اخراج 1 لاکھ 93 ہزار 854 کیوسک ریکارڈ کیا گیا ہے، گزشتہ روز آمد اور اخراج 2 لاکھ سے زائد تھی، خیال رہے کہ ہیڈ مرالہ کے مقام سے 11 لاکھ کیوسک پانی گزر سکتا ہے۔
پاکستان نے بھارت سے متنازعہ آبی منصوبوں کے معائنہ کا شیڈول مانگ لیا
ہیڈ خانکی پر پانی کی آمد گزشتہ روز سے بڑھ کر ایک لاکھ 90 ہزار 80 کیوسک اور اخراج ایک لاکھ 83 ہزار 569 کیوسک ریکارڈ کیا گیا، ہیڈ قادرآباد پر پانی کی آمد 2 لاکھ 10 ہزار 280 کیوسک، جب کہ اخراج ایک لاکھ 91 ہزار 280 کیوسک ریکارڈ کیا گیا۔
محکمہ انہار کے مطابق جھنگ میں بھی دریائے چناب میں سیلاب آ گیا ہے، جس کی وجہ سے سرگودھا روڈ کو ٹریفک کے لیے بند کر دیا گیا ہے۔
تریموں بیراج پر پانی کا بہاؤ بڑھ کر ایک لاکھ کیوسک تک پہنچ گیا، محکمہ انہار کا کہنا ہے کہ دریائے چناب میں آنے والا سیلابی ریلا 2 دن تک جھنگ پہنچے گا۔
