ARYNews.tv | Urdu – Har Lamha Bakhabar

Tag: بھارت

  • بھارت نے ایشیا کپ سے دستبردار ہونے کا فیصلہ کر لیا، بھارتی میڈیا

    بھارت نے ایشیا کپ سے دستبردار ہونے کا فیصلہ کر لیا، بھارتی میڈیا

    بھارت کھیل میں پھر سیاست کو لے آیا، بھارتی میڈیا کا کہنا ہے کہ پاک بھارت کشیدگی کے پیش نظر بھارت نے ایشیا کپ سے دستبردار ہونے کا فیصلہ کرلیا۔

    بھارتی میڈیا رپورٹس کے مطابق بھارتی کرکٹ بورڈ (بی سی سی آئی) نے مینز ایشیا کپ اور ویمنز ایمرجنگ ایشیا کپ سے دستبردارہونے کا فیصلہ کرلیا ہے، بھارت نے رواں برس ستمبر میں ایشیاکپ کی میزبانی کرنا تھی۔

    بی سی سی آئی کے اہلکار کے مطابق ایشین کرکٹ کونسل کے صدر چیئرمین پی سی بی محسن نقوی ہیں، بھارتی ٹیم ایک ایسے ٹورنامنٹ میں نہیں کھیل سکتی جس کے سربراہ پاکستان کے وزیر ہیں۔

    بھارتی میڈیا کے مطابق بھارت نے ویمنز ایمرجنگ ایشیا کپ بھی نہ کھیلنے کا فیصلہ کیا ہے، ویمنز ایمرجنگ ایشیا کپ جون میں سری لنکا میں کھیلا جانا ہے۔

    ذرائع کا کہنا ہے کہ بی سی سی آئی نے ایشین کرکٹ کونسل کو اپنی دستبرداری سے آگاہ نہیں کیا، بھارت کی ایشیا کپ سے دستبرداری کی تیاری کے حوالے سے اطلاعات ہیں۔

    دوسری جانب آئی سی سی کے صدر جے شاہ کی جانب سے بھارتی فوج کے حق میں کی گئی پوسٹ پر آسٹریلوی صحافی نے سوال اٹھا دیے۔

    انٹرنیشنل کرکٹ کونسل (آئی سی سی) کے چیئرمین جے شاہ نے پاک بھارت کشیدگی کے دوران سوشل میڈیا پر بھارتی فوج کے حق میں پوسٹ کیا جس میں انہوں نے بھارتی فوج کو اپنا فخر قرار دیا تھا۔

    جے شاہ کی اس پوسٹ کے بعد کرکٹ کی عالمی گورننگ باڈی کی غیرجانبداری پر سوالات اٹھ گئے، آسٹریلیا کے صحافی میلکم کون جے شاہ پر برس پڑے۔

    آسٹریلوی صحافی نے کہا کہ آئی سی سی کے بھارتی صدر جے شاہ نے افواج کے بارے میں بیان کیوں دیا، آسٹریلوی کھلاڑی عثمان خواجہ نے فلسطین میں امن پر ٹوئٹ کیا تو اسے معطل کردیا گیا تھا، کھلاڑی کو سزا اور چیئرمین کو کھلی چھوٹ، یہ منافقت ہے۔

    پی ایس ایل 10 میں پاک فضائیہ کو خراج تحسین

    واضح رہے کہ جے شاہ کی پوسٹ سوشل میڈیا پر وائرل ہونے کے ان پر خوب تنقید کی گئی، جس کے بعد آئی سی سی کے صدر نے پوسٹ کو حذف کر دیا لیکن سوشل میڈیا پر تنقید کا سلسلہ جاری ہے۔

  • طالبہ یونیورسٹی کی نویں منزل سے گر کر ہلاک

    طالبہ یونیورسٹی کی نویں منزل سے گر کر ہلاک

    بھارت کے پنجاب میں نجی یونیورسٹی کی طالبہ نویں منزل سے گر کر زندگی کی بازی ہار گئی، متوفیہ کی شناخت آکانکشا کے نام سے ہوئی ہے، جو کرناٹک کے منگلورو کے دھرمستھل کے بلیہار کی رہنے والی تھی۔

    بھارتی میڈیا رپورٹس کے مطابق طالبہ نے اس یونیورسٹی سے اپنی تعلیم مکمل کی تھی اور وہ گذشتہ چھ ماہ سے دہلی میں ایرو اسپیس انجینئر کے طور پر کام کر رہی تھی۔ حال ہی میں اسے جاپان میں ملازمت کے لیے منتخب کیا گیا تھا۔

    جاپان جانے سے پہلے وہ اپنی پڑھائی سے متعلق کچھ سرٹیفکیٹ لینے کے لیے اپنی سابقہ یونیورسٹی واپس آئی تھی۔ بدقسمتی سے طالبہ یونیورسٹی کی نویں منزل سے گر کر ہلاک ہوگئی۔

    پولیس کے مطابق انہیں رات دیر اطلاع دی گئی کہ لڑکی ایک پرائیویٹ یونیورسٹی کی 9 ویں منزل سے گر گئی ہے۔ انہوں نے کہا کہ ابتدائی تحقیقات سے یہ بات سامنے آئی ہے کہ لڑکی دہلی میں کام کرتی تھی اور کسی کام سے یہاں آئی تھی۔ ہفتہ کی رات نویں منزل سے گرنے کے بعد جان کی بازی ہار گئی۔

    پولیس کے مطابق یونیورسٹی نے گھر والوں کو واقعہ کی اطلاع دے دی ہے۔ جب وہ آئیں گے تو ان کا بیان ریکارڈ کرکے مزید قانونی کارروائی کا آغاز کیا جائے گا۔

    یہ واضح نہیں ہے کہ طالبہ کی موت کیسے اور کن حالات میں ہوئی۔ پولیس معاملے کی سنجیدگی سے تحقیقات کررہی ہے اور اس معاملے میں مزید تفصیلات اہل خانہ کے بیانات درج کرنے کے بعد ہی مل سکے گی۔

    یاد رہے کہ اس سے قبل کینیڈا میں کچھ دنوں سے لاپتہ بھارتی طالبہ کی لاش ساحل سمندر سے برآمد ہوئی تھی، بھارتی ہائی کمیشن نے بھی لاش ملنے کی تصدیق کردی ہے۔

    اسرائیل کی غزہ پالیسی پر تنقید کرنے والی یہودی عالمہ کو قتل کی دھمکیاں

    بھارت سے تعلق رکھنے والی طالبہ ونشیکا گزشتہ کچھ دنوں سے لاپتہ تھی۔ لڑکی کی لاش ملنے کے بعد مقامی پولیس نے موت کی وجہ جاننے کیلیے تحقیقات کا آغاز کردیا ہے۔

  • بھارت بلاول کے نام سے ڈرگیا، اسے سفارتی سطح پر بدترین شکست ہوئی، شیری رحمان

    بھارت بلاول کے نام سے ڈرگیا، اسے سفارتی سطح پر بدترین شکست ہوئی، شیری رحمان

    شیری رحمان نے کہا ہے کہ بھارت بلاول بھٹو کے نام سے ڈرگیا ہے اس لیے تنقید کررہا ہے، بھارت کو پہلی مرتبہ سفارتی سطح پر بدترین شکست ہوئی ہے۔

    اے آر وائی نیوز کے پروگرام اعتراض ہے میں گفتگو کرتے ہوئے سینیٹر شیری رحمان نے کہا کہ بھارت نے اس وقت منفی رویہ اختیار کررکھا ہے، بھارت نے سفارتی محاذ پر 7 ٹیمیں بنائی ہیں جبکہ ہماری 2 ٹیمیں ہیں، ہمارے سوشل میڈیا اکاؤنٹس بھارت میں بند ہیں۔

    پیپلزپارٹی کی سینیٹر شیری رحمان نے کہا کہ بھارت سچ چھپانے کےلیے بوکھلاہٹ کا شکار ہوگیا ہے، بھارت کو شکست ہوئی ہے یہ بات دنیا سے چھپ نہیں سکتی۔

    انھوں نے کہا کہ امریکی صدرڈونلڈ ٹرمپ نے بار بار پاکستان کی تعریف کی، امریکی صدر نے واضح طور پر پاکستان کا شکریہ بھی ادا کیا، امریکی صدر ٹرمپ نے کہا کہ پاکستان کےساتھ تجارت کروں گا۔

    پاکستان اور بھارت کے ڈی جی ایم اوز کے درمیان آج پھر رابطہ ہوگا

    بھارت کو غصہ ہے کہ سیزفائر مانگنے کی بات سامنے کیوں آئی، ہمارے یورپ اور واشنگٹن الگ الگ وفود جائیں گے، بھارت میں اب اپوزیشن سوال اٹھارہی ہے۔

    شیری رحمان کا کہنا تھا کہ بھارتی حکومت کے پاس اپوزیشن کو جواب دینے کےلیے کچھ نہیں، بھارت میں سوال اٹھ رہے ہیں کہ آپ کی الٹی تباہی ہوگئی، بھارت کوملٹری اورسفارتی سطح پربڑی شکست ہضم نہیں ہورہی۔

    بھارت اپنے نقصانات بتانا نہیں چاہتا اس لیے کہہ رہا ہے حالت جنگ میں ہیں، بھارت اپنے عوام کے سامنے مسلسل جھوٹ کی فلم چلا رہا ہے۔

    انھوں نے کہا کہ بھارت اپنی شکست چھپانے کےلیے کہہ رہا ہے کہ جنگ جاری ہے، بھارت اپنے ملک میں کچھ بھی بولے باہر تو سیزفائر ہی مانگا ہے۔

    https://urdu.arynews.tv/1971-we-revenge-from-enemy-federal-information-minister/

  • بھارت: حیدرآباد کی عمارت میں خوفناک آتشزدگی، 17 افراد ہلاک

    بھارت: حیدرآباد کی عمارت میں خوفناک آتشزدگی، 17 افراد ہلاک

    بھارت کے شہر حیدرآباد دکن میں تاریخی چار مینار کے قریب رہائشی عمارت میں خوفناک آتشزدگی کے نتیجے میں 17 افراد ہلاک ہو گئے۔

    بھارتی میڈیا کے مطابق آتشزدگی کا واقعہ حیدرآباد کے پرانے شہر کے علاقہ گلزار حوض میں ایک رہائشی عمارت میں اتوار کی صبح پیش آیا۔ 7 افراد زندہ جل کر ہلاک ہوئے جب کہ 10 افراد کی موت دم گھٹنے کے باعث ہوئی۔

    رپورٹ کے مطابق مرنے والوں میں 2 بچے اور چار خواتین بھی شامل ہیں۔ جب کہ متعدد افراد جھلسنے سے زخمی یا دم گھٹنے سے بے ہوش ہوئے۔ انہیں طبی امداد کے لیے مختلف اسپتالوں میں منتقل کیا گیا۔

    تلنگانہ کے وزیراعلیٰ ریونت ریڈی، وزیراعظم مودی نے حادثے پر دکھ کا اظہار کرتے ہوئے متاثرہ خاندانوں کے لیے مالی امداد کا اعلان کیا ہے۔

    دریں اثنا پرانے حیدرآباد شہر کے علاقے میلار دیوپلی میں تین منزلہ ایک اور رہائشی عمارت میں آتشزدگی کا واقعہ پیش آیا۔ تاہم عمارت کے مکین خطرہ محسوس کرتے ہوئے چھت پر چلے گئے اور سب کو بحفاظت ریسکیو کر لیا گیا۔

    ابتدائی رپورٹ کے مطابق آگ لگنے کی وجہ شارٹ سرکٹ بتائی جا رہی ہے۔ تاہم ایک ہی دن دو عمارتوں میں آتشزدگی کے واقعات کی تحقیقات جاری ہیں۔

  • بھارت پاکستان کا پانی روکنے کی ہمت نہیں کر سکتا، ڈی جی آئی ایس پی آر

    بھارت پاکستان کا پانی روکنے کی ہمت نہیں کر سکتا، ڈی جی آئی ایس پی آر

    ڈی جی آئی ایس پی آر لیفٹیننٹ جنرل احمد شریف چوہدری نے کہا ہےکہ بھارت پاکستان کا پانی روکنےکی ہمت نہیں کر سکتا۔

    ڈی جی آئی ایس پی آر لیفٹیننٹ جنرل احمد شریف چوہدری نے عرب نیوز کو آپریشن معرکہ حق سے متعلق تفصیلی انٹرویو دیتے ہوئے کہا ہے کہ حکومت پاکستان پانی کے معاملہ پر بھارت کو واضح کر چکی۔ فوج کی طرف سے مزید کچھ کہنے کی ضرورت نہیں ہے۔

    ڈی جی آئی ایس پی آر کا کہنا تھا کہ 24 کروڑ سے زائد لوگوں کا پانی روکنےکا کوئی پاگل ہی سوچ سکتا ہے اور بھارت ایسا کرنے کی ہمت نہیں کر سکتا۔

    انہوں نے دوٹوک الفاظ میں کہا کہ کوئی پاکستان کا پانی روکنے کی جرات نہ کرے۔ امید کرتے ہیں کہ ایسا وقت نہ آئے، لیکن آیا تو دنیا اقدامات دیکھے گی۔ بھارت نے اگر پاکستان کا پانی روکا تو دہائیوں تک اس کے نتائج محسوس کیے جائیں گے۔

    ڈی جی آئی ایس پی آر نے کہا ہے پاک فوج پروفیشنل آرمی ہے اور حکومتی اقدامات کے پابند ہیں۔ ہمارا پیغام واضح ہے کہ ہم امن چاہتے ہیں، لیکن بھارت کی طرف سے کوئی خلاف ورزی ہوئی تو ہمارا جواب تیار ہے۔ جارحیت کے خلاف ہمارا ردعمل فوری اور فیصلہ کن ہوگا۔ تاہم ہم کبھی بھی سویلینز اور ان کی آبادی کو نشانہ نہیں بناتے۔

    لیفٹیننٹ جنرل احمد شریف چوہدری نے مزید کہا کہ بھارت نے جھوٹ کی بنیاد پر پورا تنازع کھڑا کیا اور پہلگام واقعہ پر کوئی ثبوت نہیں دیا۔ بھارت نے جھوٹ کی بنیاد پر جارحیت کرتے ہوئے معصوم شہریوں اور مساجد کو نشانہ بنایا۔ بھارتی میڈیا پر معصوم بچوں اور خواتین کی شہادت پر جشن منایا جا رہا تھا۔ کبھی ایسا نہیں دیکھا کہ معصوم بچوں کے قتل پر اپنی سینہ ٹھوک کر فخر کیا جائے۔ بھارت میں اب جو کچھ ہورہاہے یہ نیا ہے دنیا کو دیکھنا چاہیے۔

    انہوں نے کہا کہ بھارتی میڈیا جھوٹی خبریں چلا کر سمجھ رہا تھا کہ دنیا بےوقوف ہے اور آج تک وہ اپنے جھوٹ کے پیچھے ہی چھپ رہی ہے۔ اس نے خود ہی اپنے ان علاقوں پر میزائل فائر کیے جہاں سکھ آبادی رہتی ہے۔ بھارت نے بے انتہا پروپیگنڈا کر کے اپنے لوگوں کو گمراہ کیا۔

    ڈی جی آئی ایس پی آر پاکستان نے محدود پیمانے پر بھارت کو جواب دیا، جس کے بعد بھارت جارحیت سے رکنے پر مجبور ہوا۔ میں تصدیق کرتا ہوں کہ بھارت کے 6 طیارے گرائے ہیں۔ پاکستان کی جانب سے بھارتی میراج طیارہ بھی گرایا گیا ہے۔

    انہوں نے کہا کہ ہم نے جس طرح جواب دیا، یہ ہماری صلاحیت کا صرف ایک حصہ ہے۔ پاکستان نے اپنی کچھ ٹیکنالوجی اور محدود کارروائی سے اپنی صلاحیت دکھا دی۔ دنیا جان چکی ہے کہ ہم اپنی خودمختاری کا دفاع کر سکتے ہیں۔ کوئی شک میں نہ رہے ہم ہمیشہ ملک کے دفاع کے لیے تیار ہیں۔ پاکستان کی سلامتی اور خود مختاری کا ہر قیمت پر دفاع کیا جائے گا۔

    ڈی جی آئی ایس پی آر بھارت نے اس پورے تنازع میں غیر ذمہ داری کا مظاہرہ کیا۔ بھارت نے کہا کہ جن ممالک نے پاکستان کو اسلحہ فراہم کیا، اس کا بائیکاٹ کریں گے۔ بھارت کے پاس بھی روس اور فرانس کے جدید ہتھیار تھے۔ اس کے پاس بھی بہترین سسٹم اور اسلحہ ہے لیکن اہم یہ ہے کہ اس کو استعمال کون اور کیسے کر رہا ہے۔

  • روہنگیا مسلمانوں کو سمندر میں پھینکنے کا معاملہ ، بھارت سے جواب طلب

    روہنگیا مسلمانوں کو سمندر میں پھینکنے کا معاملہ ، بھارت سے جواب طلب

    نیویارک : اقوام متحدہ نے روہنگیا مسلمانوں کیساتھ انسانیت سوزسلوک پر بھارت سے جواب طلب کرلیا اور کہا روہنگیا پناہ گزینوں کو بحری جہازوں سے سمندر میں پھینکنا اشتعال انگیزی سےکم نہیں۔

    تفصیلات کے مطابق روہنگیا مسلمانوں کیساتھ انسانیت سوزسلوک پر اقوام متحدہ نے بھارت سے جواب طلب کرلیا ، بھارت خطے میں امن کوتہہ و بالاکرنے کےساتھ ساتھ انسانیت سوزمظالم بھی ڈھا رہا ہے۔

    مقبوضہ کشمیرمیں 8 لاکھ سےزائدفوج نہتے کشمیریوں کے ساتھ بدترین سلوک کر رہی ہے ، بھارتی حکومت نے روہنگیا مسلمانوں کے ساتھ بھی بدترین سلوک روارکھا ہوا ہے۔

    اقوام متحدہ نے کہا کہ گزشتہ ہفتے بھارتی حکام نے دہلی سےدرجنوں روہنگیا پناہ گزینوں کوانڈمان منتقل کیا، کشتی کے ذریعے بحیرہ انڈمان عبور کروا کر زبردستی میانمار کے جزیرے میں اتاراگیا تاہم پناہ گزین ساحل تک پہنچنے میں کامیاب ہوئے مگران کےبچ جانےکی خبرنہیں آئی۔

    میانمار میں اقوام متحدہ کے انسانی حقوق کےخصوصی نمائندےٹام اینڈریوز نے بیان میں کہا کہ روہنگیاپناہ گزینوں کوبحری جہازوں سے سمندر میں پھینکنااشتعال انگیزی سےکم نہیں، واقعے کی مزیدمعلومات حاصل کررہے ہیں،بھارتی حکومت سے بھی کہاہےحساب دیں۔

    ٹام اینڈریوز کا مزید کہنا تھا کہ ایسےاقدامات پرگہری تشویش ہےجوبین الاقوامی تحفظ کےاصولوں کی خلاف ورزی ہے۔

    یاد رہے 3 مارچ کو اینڈریوز نے بھارت کو مراسلہ بھیجا، روہنگیا پناہ گزینوں کی زبردستی واپسی پرتشویش ظاہر کی گئی۔

    اقوام متحدہ نے کہا کہ ٹام اینڈریوز نےبھارت سے حراستوں کے خاتمے اور حراستی مراکز تک رسائی کا مطالبہ بھی کیا۔

  • پاکستان کے ہاتھوں شکست ، بھارت نے اپنی ساکھ بچانے کیلئے ارکان پارلیمنٹ کا سہارا لے لیا

    پاکستان کے ہاتھوں شکست ، بھارت نے اپنی ساکھ بچانے کیلئے ارکان پارلیمنٹ کا سہارا لے لیا

    نئی دہلی : پاکستان کے ہاتھوں شکست اور جھوٹا پروپیگنڈا کرنے پر بھارت کودنیا بھرمیں اپنی عزت بچانا مشکل ہوگئی، بھارت نے اپنی ساکھ بچانے کیلئے ارکان پارلیمنٹ کا سہارا لے لیا۔

    تفصیلات کے مطابق پاکستان سے جنگی اور سفارتی محاذ پر شکست نے بھارت کو بے بس کردیا اور بھارت بین الاقوامی سطح پر تنہائی کا شکار ہوگیا۔

    مودی نے اپنی ڈوبتی کشتی بچانے اور سفارتی سطح پر اپنی ساکھ کی بحالی کیلئے ارکان پارلیمنٹ کو دنیا بھر میں بھیجنے کا فیصلہ کیا ہے۔

    بھارتی میڈیا نے بتایا کہ اراکین پارلیمنٹ کے آٹھ گروپ اکیس مئی سے امریکا،برطانیہ، جنوبی افریقا،یورپ ،روس اور جاپان سمیت دیگر ممالک جائیں گے۔

    ان وفود میں حکمراں اتحاد این ڈی اے کے علاوہ اپوزیشن پارٹیوں کے ایم پی بھی موجود ہوں گے، پارلیمانی امور کے وزیر کرن رجیجو ارکان پارلیمنٹ کے غیر ملکی دوروں کو منظم کریں گے۔

    ذرائع کے مطابق ارکان پارلیمنٹ کا یہ سفر 22 مئی 2025 کے بعد شروع ہوسکتا ہے ، اراکین پارلیمنٹ آپریشن سندور سے متعلق آگاہی دیں گے اور اپنی حکومت کا نقطہ نظر واضح کرنے کی کوشش کریں گے۔

    بھارتی حکومت نے اپنے سفیروں کو بھی متحرک ہونے کا احکامات دیے ہیں۔

    بھارتی جارحیت کے خلاف پاکستان کے ذمہ دارانہ کردار کو عالمی برادری نے سراہا تھا اور پہلگام فالس فلیگ آپریشن کے بھارتی پروپیگنڈے کو سنجیدہ نہیں لیا گیا تھا۔

  • افواجِ پاکستان کے ترجمانوں کے منفرد انداز نے دنیا کو اپنا گرویدہ بنا دیا ، بھارت کو منہ توڑ جواب ٹاپ ٹرینڈ بن گیا

    افواجِ پاکستان کے ترجمانوں کے منفرد انداز نے دنیا کو اپنا گرویدہ بنا دیا ، بھارت کو منہ توڑ جواب ٹاپ ٹرینڈ بن گیا

    اسلام آباد : پاک بھارت کشیدگی کے دوران افواجِ پاکستان کے ترجمانوں کے انداز نے دنیا کو اپنا گرویدہ بنا دیا اور بھارت کو منہ توڑ جواب ٹاپ ٹرینڈ بن گیاا۔

    تفصیلات کے مطابق پاک بھارت جنگ کے دوران سوشل میڈیا پر مختلف ویڈیوز ٹرینڈ کرتی رہیں لیکن جن دو ایونٹس کی سب سے زیادہ گونج رہی، اس میں ایک تو وہ رافیل طیارے تھے جو پاکستان ایئر فورس نے مار گرائے اور دوسری تھیں افواجِ پاکستان کے ترجمانوں کی نیوز کانفرنس۔

    سوشل میڈیا پر افواجِ پاکستان کے ترجمانوں کی پریس کانفرنسز کو بڑی پزیرائی ملی۔

    ان پریس کانفرنسز میں جہاں اس جنگ سے متعلق سب تفصیلات تھیں وہیں افواجِ پاکستان کے ترجمانوں کے انداز نے دنیا کو ان کا گرویدہ بنا دیا۔

    دنیا بھر میں مقیم پاکستانیوں نے ڈی جی آئی ایس پی آر لیفٹینٹ جنرل احمد شریف چوہدری، ایئر وائس مارشل اورنگزیب احمد اور وائس ایڈمرل پاک نیوی راجا رب نواز کے بھارت کو منہ توڑ جواب ایکس پر ٹاپ ٹرینڈ بنا دیا۔

    ڈی جی آئی ایس پی آری کے فقرے بھی گردش کرتے رہے جبکہ ایئر وائس مارشل اورنگزیب احمد کے اسکور بتانے کے چرچے رہے۔

    وائس ایڈمرل راجہ رب نوازوائس ایڈمرل رب نواز کا ایک جملہ ہی کئی لوگوں کا سوشل میڈیا اسٹیٹس بن گیا اور وائس ایڈمرل راج رب نواز کو صارفین خوب سراہا رہے ہیں۔

    واضح رہے بھارت نے سات اور آٹھ مئی کی درمیانی شب پھر دراندازی کی کوشش کی اور اسے ‘آپریشن سندھور’ کا نام دیا گیا ، جس میں شہری آبادی کو نشانہ بنایا گیا اور 31 شہری شہید اور کئی زخمی ہوئے تھے۔

    بعد ازاں پاک فوج کی جانب سے بھارت کے کیخلاف آپریشن بنیان المرصوص کا آغاز کیا ، جس میں پاک فضائیہ کے جے ایف سیونٹین تھنڈر نے جدید ترین ایس فور ہنڈریڈ ایئر ڈیفنس سسٹم تباہ کرکے بھارت کی فضائی ڈھال پاش پاش کردی جبکہ ناگروٹا میں براہموس میزائل کا ذخیرہ بھسم کردیا اور پاکستان کے عوام پر حملہ کرنے والی ایئربیسز کو ملیامیٹ کردیا گیا تھا۔

  • بھارت سے جنگ بندی 18 مئی تک بڑھا دی گئی ہے، نائب وزیراعظم

    بھارت سے جنگ بندی 18 مئی تک بڑھا دی گئی ہے، نائب وزیراعظم

    پاکستان کے نائب وزیراعظم اسحاق ڈار نے کہا ہے کہ جنگ بندی 18 مئی تک بڑھا دی گئی ہے اور اب بھارت کے ساتھ جامع مذاکرات ہوں گے۔

    اے آر وائی نیوز کے مطابق نائب وزیر اعظم اور وزیر خارجہ اسحاق ڈار نے سینیٹ میں پاکستان کے خلاف بھارتی جارحیت کے حوالے سے اظہار خیال کرتے ہوئے ایوان کو بتایا ہے کہ 10 مئی کو سیز فائر کی بات 12 مئی تک ہوئی تھی۔ بعد میں یہ مدت بڑھا کر 14 مئی اور 18 مئی تک جنگ بندی کی مدت بڑھا دی گئی ہے۔ بھارت کے ساتھ جامع مذاکرات ہوں گے۔ یہ مذاکرات کسی کی برتری تسلیم کرنے نہیں بلکہ برابری کی بنیاد پر ہوں گے۔

    اسحاق ڈار نے کہا کہ حالیہ کشیدگی میں امریکی صدر ٹرمپ نے بھی مسئلہ کشمیر کے حل کا لکھ دیا ہے جس کے بعد اب بھارت کی کشمیر ہڑپ کرنے کی کوشش ناکام ہو گئی ہے۔

    اسحاق ڈار نے کہا کہ اس بار دنیا میں بھارت کا بیانیہ نہیں بلکہ ہم نے عالمی برادری کو بتایا کہ بھارت کس طرح کا پروپیگنڈا کر رہا ہے۔ بھارت سے معرکہ میں اللہ کے فضل سے ہمارے ایک بھی جہاز کو نقصان نہیں پہنچا جب کہ بہادر پاک فضائیہ نے بھارت کے پانچ طیارے اور ایک یو اے وی مار گرایا۔

    انہوں نے ایوان کو بتایا کہ بھارت نے نیا ڈراما کرتے ہوئے 80 سے زائد ڈرونز پاکستان بھیجے انہیں بھی تباہ کر دیا گیا جب کہ پاکستان نے عالمی قوانین کے تحت اپنے دفاع میں بھارت کو فوری جواب دیے۔

    انہوں نے کہا کہ جب بھارت نے سکھوں کو پاکستان کے خلاف اکسانے کے لیے امرتسر پر بھی خود میزائل داغے تو برداشت سے باہر ہو گیا اور 9 مئی کو میٹنگ ہوئی جس میں پلان ترتیب دیا گیا۔

    اسحاق ڈار نے کہا کہ ہم نے کسی سے سیز فائر کی درخواست نہیں کی اور نہ ہی کسی نے ہم سے جنگ روکنے کی کہا۔ ہم نے جنگ میں پہل نہیں کی اور صرف بھارتی جارحیت کا جواب دیتے ہوئے اقوام متحدہ کے چارٹر کے مطابق اپنے دفاع کا حق استعمال کیا کیونکہ ملکی خودمختاری اور سالمیت کے خلاف اقدامات کسی صورت قبول نہیں کرسکتے۔

    نائب وزیر اعظم نے بتایا کہ 10مئی کو سوا دس بجے امریکی وزیر خارجہ مارکو روبیو کا فون آیا۔ ہم نے امریکی وزیر خارجہ کو واضح کر دیا کہ اگر بھارت تیار ہے تو ہم بھی تیار ہیں۔ بھارت جنگ روکے گا تب ہی ہم بھی روک دیں گے۔ پاکستان کے اس جواب پر امریکی وزیر خارجہ نے کہا کہ وہ بھارتی ہم منصب جے شنکر کو اطلاع کر دیتے ہیں۔

    اسحاق ڈار نے کہا کہ سعودی ہم منصب کو بھی کہا تھا کہ جنگ ہم نے شروع نہیں کی۔ انہوں ںے بتایا کہ ان کی بھارتی ہم منصب سے بات ہو گئی ہے اور بھارت سیز فائر پر تیار ہے۔ ساڑھے چار بجے سیز فائر ہوا تو یہ گھنٹوں میں بھاگ گئے۔

    https://urdu.arynews.tv/pahalgam-operation-bunyanun-mursus-success-announcement-of-a-day-of-thanksgiving-across-the-pakistan-tomorrow/

  • بھارت نے پاکستانی پرچم کی آن لائن فروخت پرپابندی لگا دی

    بھارت نے پاکستانی پرچم کی آن لائن فروخت پرپابندی لگا دی

    نئی دہلی : بھارت نے پاکستانی پرچم کی آن لائن فروخت پرپابندی لگا دی اور اس حوالے سے آن لائن اور ای کامرس کمپنیز کو نوٹس جاری کردیئے۔

    تفصیلات کے مطابق مودی سرکار پاکستانی پرچم سے بھی خوفزدہ ہوگیا اور پاکستانی پرچم کی آن لائن فروخت پرپابندی لگا دی۔

    بھارت کی سنٹرل کنزیومر پروٹیکشن اتھارٹی نے آن لائن اور ای کامرس کمپنیز کو نوٹس جاری کردیئے ہیں، جس میں کہا ہے کہ پاکستانی پرچم اور اس کی تصاویر والی اشیا آن لائن پلیٹ فارمزسے ہٹالی جائیں۔

    خفت مٹانے کے لئے مودی سرکار آن لائن کمپنیز کو تنگ کرنے لگی ، نوٹسز سے پتہ چلتا ہے کہ پاکستانی مسلح افواج نے بھارت کو کتنی تکلیف پہنچائی ہے۔

    یاد رہے اس ہفتے کے شروع میں کنفیڈریشن آف آل انڈیا ٹریڈرز (CAIT) نے وزیر تجارت پیوش گوئل اور امور صارفین کے وزیر پرہلاد جوشی کو خط لکھا تھا، جس میں مطالبہ کیا گیا کہ پاکستانی جھنڈوں اور پاکستان کے قومی نشان والی کسی بھی چیز کی آن لائن فروخت پر پابندی لگائی جائے۔ تاجر تنظیم نے ایسی اشیاء کی دستیابی کو توہین آمیز اور ناقابل قبول قرار دیا۔

    دریں اثنا، امکان ہے کہ یہ مسئلہ حکومتی اسٹیک ہولڈرز اور ڈیجیٹل کامرس پلیٹ فارمز کے درمیان آنے والی بات چیت میں نمایاں ہو گا۔