ARYNews.tv | Urdu – Har Lamha Bakhabar

Tag: بھارت

  • بھارت نے دریائے راوی پر قائم تھین ڈیم کے تمام گیٹ کھول دیے

    بھارت نے دریائے راوی پر قائم تھین ڈیم کے تمام گیٹ کھول دیے

    بھارت نے دریائے راوی پر قائم تھین ڈیم کے تمام گیٹ کھول دیے، دریائے چناب میں بھی پانی کے بہاؤ میں خطرناک حد تک اضافہ ہوگیا۔

    اے آر وائی نیوز کے مطابق پی ڈی ایم اے کے ترجمان نے بتایا ہے کہ بھارت نے دریائے راوی پر قائم تھین ڈیم کے تمام گیٹ کھول دیے، کوٹ نیناں سے پاکستانی حدود میں 2لاکھ 10 ہزار کیوسک پانی دریائے راوی میں داخل ہوگیا، آئندہ 24گھنٹے میں کوٹ نیناں کے مقام پر پانی کے بہاؤ میں مزید اضافہ ہوگا۔

    آئندہ 48 گھنٹے میں جسڑ شاہدرہ اور ہیڈ بلوکی سے انتہائی اونچے درجے کا سیلاب گزرےگا، کمشنر لاہور، گوجرانوالہ، ملتان، ساہیوال، فیصل آباد اور متعلقہ اضلاع کے ڈپٹی کمشنرز کو الرٹ جاری کردیا گیا۔

    پی ڈی ایم اے ترجمان نے کہا کہ دریائے راوی میں پانی کی سطح میں مسلسل اضافہ ہورہا ہے، دریائے راوی میں جسڑ کے مقام پر اونچے درجے کا سیلاب اور شاہدرہ کے مقام پر نچلے درجے کا سیلاب ہے۔

    جسڑ کے مقام پر 1لاکھ 42 ہزار کیوسک پانی مسلسل دریائے راوی میں داخل ہو رہا ہے، دریائے راوی میں شاہدرہ کے مقام پر پانی کا بہاؤ 56 ہزار کیوسک ہے۔

    پی ڈی ایم اے پنجاب کی جانب سے دریائے راوی سے ملحق اضلاع کی انتظامیہ کو ہنگامی اقدامات کرنے کی ہدایات کی گئی ہے۔

    ترجمان پی ڈی ایم اے نے مزید کہا کہ دریائے راوی کے پاٹ میں موجود شہریوں کے فوری انخلا کی ہدایات جاری کی گئی ہے، مساجد میں اعلانات کے ذریعے شہریوں کو ممکنہ صورتحال سےآگاہ کیا جائے۔

    دریں اثنا دریائے چناب میں پانی کے بہاؤ میں خطرناک حد تک اضافہ ہوگیا ہے، دریائےچناب میں ہیڈ مرالہ کے مقام پر انتہائی اونچے درجے کا سیلاب ہے۔

    دریائے چناب میں ہیڈمرالہ کے مقام پر پانی کی آمد 4لاکھ 62 ہزار کیوسک ہوگئی، بھارت کی جانب سے دریائے چناب میں آج ساڑھے 3 لاکھ کیوسک کا ریلہ چھوڑا گیا، دریائے چناب میں سیلاب سے لاکھوں ایکڑ اراضی زیرِآب آنے کا خدشہ ہے۔

  • بھارت کی طرف سے چھوڑے گئے پانی کے ریلوں نے تباہی مچانا شروع کردی

    بھارت کی طرف سے چھوڑے گئے پانی کے ریلوں نے تباہی مچانا شروع کردی

    بہاولنگر : بھارت کی طرف سے چھوڑے گئے پانی کے منہ زور ریلوں نےتباہی مچانا شروع کردی، دریائےراوی اوردریائے ستلج نے کئی گاؤں ڈوب گئے۔

    تفصیلات کے مطابق بھارت کی طرف سے دریائے راوی اور ستلج میں پانی چھوڑے جانے کے بعد پاکستان کے دو دریاؤں میں منہ زور ریلے داخل ہوگئے، جس سے قصور اور بہاول نگر کے درجنوں دیہات زیر آب آگئے، کھڑی فصلیں بہہ گئیں اور کئی علاقوں کا زمینی رابطہ منقطع ہوگیا۔

    فلڈ فورکاسٹنگ ڈویژن نے بتایا کہ دریائے روای میں بھارت سے چھوڑا گیا ریلا پاکستان کی حدود میں داخل ہوگیا اور دریائے راوی میں جسڑ کے مقام پر پانی کی سطح اچانک بڑھ کر 61 ہزار کیوسک تک جا پہنچی ہے، یہاں نچلے درجے کا سیلاب ہے جبکہ یہ ریلا آج رات شاہدرہ سے گزرے گا۔

    قصور کے علاقے گنڈا سنگھ پر دریائے ستلج میں اس وقت ایک لاکھ چونتیس ہزار کیوسک کا ریلا گزر رہا ہے ، ہیڈ گنڈا سنگھ پر پانی کی آمد بڑھ کر 174,062 کیوسک ہوگئی جبکہ ہیڈ سلیمانکی پر پانی کی آمد 104,664 کیوسک ریکارڈ کی گئی، جس کے باعث دریائے ستلج کے بھوکاں پتن پل اور بابا فرید پل پر پانی کی سطح مسلسل بلند ہو رہی ہے۔

    سیلابی ریلوں کے باعث بہاول نگر اور گرد و نواح میں بڑے پیمانے پر تباہی دیکھنے میں آئی، عارضی حفاظتی بند ٹوٹنے سے 25 سے زائد آبادیاں سیلابی پانی کی لپیٹ میں آگئیں۔ ہزاروں ایکڑ پر تیار فصلیں تباہ ہوگئیں جبکہ گھروں اور ڈھیروں کو بھی نقصان پہنچا۔ متعدد دیہات کا زمینی رابطہ منقطع ہوگیا اور خوراک، ادویات اور مویشیوں کے چارے کی شدید قلت پیدا ہوگئی۔

    ضلعی انتظامیہ نے ریسکیو آپریشن شروع کر دیا ہے اور اب تک 1,720 افراد کو محفوظ مقامات پر منتقل کیا جا چکا ہے۔

    کمشنر بہاولپور نے فلڈ ریلیف کیمپس کا دورہ کیا اور متاثرین کو خوراک، طبی سہولتیں اور جانوروں کے لیے چارہ فراہم کرنے کی ہدایات جاری کیں۔

    دریں اثناء مقامی مکینوں نے شکایت کی ہے کہ بروقت ریلیف سرگرمیاں شروع نہ ہونے کے باعث انہیں اپنی مدد آپ نقل مکانی کرنا پڑی۔

  • بھارت نے سیلاب کا انتباہ سندھ طاس کمیشن کے ذریعے نہیں دیا، ترجمان دفتر خارجہ

    بھارت نے سیلاب کا انتباہ سندھ طاس کمیشن کے ذریعے نہیں دیا، ترجمان دفتر خارجہ

    اسلام آباد (26 اگست 2025): پاکستان کے دفتر خارجہ کے ترجمان نے کہا ہے کہ بھارت نے معاہدے کے مطابق سیلاب کا انتباہ سندھ طاس کمیشن کے ذریعے نہیں دیا۔

    تفصیلات کے مطابق ترجمان دفتر خارجہ نے سیلاب کی وارننگ کے سلسلے میں بھارت کی جانب سے رابطے پر کہا ہے کہ بھارت نے گزشتہ روز سیلاب کا انتباہ سندھ طاس کمیشن کے ذریعے نہیں دیا، بلکہ سفارتی ذریعے سے سیلاب کے بارے میں آگاہ کیا۔

    ترجمان دفتر خارجہ شفقت علی خان کا کہنا تھا کہ بھارت پر لازم ہے کہ وہ سندھ طاس معاہدے کی تمام شقوں پر مکمل عمل درآمد کرے، بھارت کا اس معاہدے کو یک طرفہ طور پر معطل رکھنا بین الاقوامی قانون کی سنگین خلاف ورزی ہے۔ پاکستان نے واضح کیا کہ بھارت کا یہ اقدام جنوبی ایشیا میں امن و استحکام پر انتہائی منفی اثرات مرتب کر سکتا ہے۔

    بھارت: مادھوپور ڈیم سے پانی کے اخراج کی وارننگ، دریائے ستلج میں مزید پانی چھوڑ دیا گیا

    یاد رہے کہ بھارت نے دریائے توی میں جموں پر ممکنہ بڑے سیلاب سے پاکستان کو آگاہ کیا تھا۔ تاہم سندھ طاس کمیشن کی بجائے پاکستانی وزارت خارجہ کو سیلاب کی ممکنہ صورت حال سے بھارتی ہائی کمیشن نے آگاہ کیا۔

    واضح رہے کہ بھارت کی جانب سے گزشتہ رات مادھوپور ڈیم سے بھی پانی کے اخراج کی وارننگ جاری کردی گئی ہے، جب کہ دریائے ستلج میں مزید پانی چھوڑ دیا گیا ہے۔ ادھر بھارت کی طرف سے دریائے چناب میں بھی پانی چھوڑے جانے کی اطلاع پر الرٹ جاری کر دیا گیا ہے۔

  • ٹیرف جنگ کے لیے مودی نے امریکا میں لابنگ فرموں کا سہارا لے لیا

    ٹیرف جنگ کے لیے مودی نے امریکا میں لابنگ فرموں کا سہارا لے لیا

    ٹیرف جنگ کے لیے بھارتی وزیر اعظم نریندر مودی نے امریکا میں لابنگ فرموں کا سہارا لے لیا۔

    تفصیلات کے مطابق مودی سرکار کی عالمی تنہائی کی وجہ سے لابنگ فرموں پر ان کا انحصار بڑھ گیا ہے، ٹرمپ انتظامیہ کی ناراضگی پر مودی حکومت نے لابنگ فرموں سے رجوع کیا۔

    دی ہندوستان ٹائمز کے مطابق بھارت نے مرکری پبلک افیئرز ایل ایل سی کی خدمات حاصل کر لی ہیں، بھارت مرکری کو ماہانہ 75,000 ڈالر ادا کرے گا، اس معاہدے میں میڈیا حکمت عملی اور امریکی حکام سے براہِ راست رابطے شامل ہیں۔

    بھارت میں ڈونلڈ ٹرمپ کے خلاف احتجاج

    سابق ریپبلکن سینیٹر ڈیوڈ وِٹر اور برائن لانزا کو نمائندگی کی ذمہ داری سونپی گئی ہے، اخبار کے مطابق مرکری کے امریکا میں 14 دفاتر اور دنیا بھر میں 550 کلائنٹس ہیں، بھارت کے لابنگ اخراجات 275,000 ڈالر ماہانہ تک جا پہنچے ہیں، اس سے قبل بھارت نے بی جی آر پارٹنرز کو بھی ماہانہ 50,000 ڈالر پر ہائر کر رکھا ہے، جو واشنگٹن ڈی سی کی تیسری بڑی لابنگ فرم ہے۔

    دی ہندوستان ٹائمز کا کہنا ہے کہ 27 اگست سے بھارتی مصنوعات پر 25 فی صد ٹیرف پینلٹی لاگو ہونے جا رہی ہے، پاکستان کے بڑھتے اثر و رسوخ نے بھارت کو واشنگٹن میں تشویش میں مبتلا کر دیا ہے، پاکستان نے فیلڈ مارشل عاصم منیر کی صدر ٹرمپ سے کامیاب ملاقات کرائی، اسلام آباد نے امریکا کو معدنیات، تیل اور دہشتگردی کے خلاف شراکت داری کی پیشکش کی، مودی کی ناکام خارجہ پالیسی نے بھارت کو عالمی سطح پر کمزور کر دیا ہے۔

  • بھارت: مادھوپور ڈیم سے پانی کے اخراج کی وارننگ، دریائے ستلج میں مزید پانی چھوڑ دیا گیا

    بھارت: مادھوپور ڈیم سے پانی کے اخراج کی وارننگ، دریائے ستلج میں مزید پانی چھوڑ دیا گیا

    اسلام آباد (26 اگست 2025): بھارت کی جانب سے گزشتہ رات مادھوپور ڈیم سے پانی کے اخراج کی وارننگ جاری کی گئی ہے، جب کہ دریائے ستلج میں مزید پانی چھوڑ دیا گیا ہے۔

    تفصیلات کے مطابق بھارت نے مادھوپور ڈیم سے پانی کے اخراج کی وارننگ جاری کی ہے اور دریائے ستلج میں مزید پانی چھوڑ دیا ہے، این ڈی ایم اے کا کہنا ہے کہ صورت حال کا مشاہدہ کر رہے ہیں۔

    ترجمان کے مطابق ہماچل پردیش، اتراکھنڈ، پنجاب اور مقبوضہ جموں و کشمیر میں شدید بارشیں متوقع ہیں، این ڈی ایم اے اس صورت حال کا مشاہدہ کر رہی ہے، بھارت کی جانب سے دریائے راوی میں چھوڑا گیا سیلابی ریلا پاکستان کی حدود میں داخل ہو چکا ہے، اور جسڑ کے مقام پر پانی کی سطح اچانک بلند ہو گئی ہے۔

    نارووال میں دریائے راوی کے کنارے کھیتوں میں کام کرتے 56 افراد کو ریسکیو کر لیا گیا، جسڑ کے مقام پر درمیانے درجے کا سیلاب ہے، ریلا آج شاہدرہ سے گزرے گا۔

    ادھر بھارت نے دریائے ستلج میں مزید پانی چھوڑ دیا ہے، گنڈا سنگھ والا کے مقام پر پہلے ہی اونچے درجے کا سیلاب ہے، اُوچ شریف، عارف والا، پاکپتن میں مکانات اور سیکڑوں ایکڑ رقبے پر کاشت فصلیں زیر آب آ چکی ہیں، وزیر اعلیٰ پنجاب مریم نواز نے آبادیوں کا بروقت انخلا یقینی بنانے کا حکم دے دیا ہے۔

    فلڈ فورکاسٹنگ ڈویژن کا کہنا ہے کہ لاہور میں دریائے راوی اور دریائے ستلج میں پانی کی سطح میں مسلسل اضافہ ہو رہا ہے، دریائے ستلج میں گنڈا سنگھ والا کے مقام پر بہاؤ میں مزید اضافہ ہوا ہے اور انتہائی اونچے درجے کا سیلاب ہے، پانی کا بہاؤ ایک لاکھ 95 ہزار کیو سک ہو گیا ہے۔ دریائے راوی میں جسڑ کے مقام پر درمیانے درجے کا سیلاب ہے، اور پانی کا بہاؤ 88 ہزار کیوسک ہو گیا ہے۔

    دریائے چناب میں بھی پانی چھوڑنے کی اطلاع

    بھارت کی طرف سے دریائے چناب میں پانی چھوڑے جانے کی اطلاع پر الرٹ جاری کر دیا گیا ہے، پھالیہ میں ریسکیو 1122 ممکنہ متاثر ہونے والے دیہاتوں میں امدادی کارروائیوں کے لیے تیار ہے، پی ڈی ایم اے کے مطابق تحصیل پھالیہ کے 22 دیہات متاثر ہونے کا خطرہ ہے، اور شہریوں کو محفوظ مقامات پر جانے کے لیے آگاہ کر دیا گیا ہے۔

    ریسکیو حکام کے مطابق کسانوں نے مال مویشی محفوظ مقامات پر منتقل کرنا شروع کر دیا ہے، کسی بھی ہنگامی صورت حال سے نمٹنے کے لیے پوری طرح تیار ہیں، ریسکیو ٹیمیں کالا شادیاں، جوکالیاں قادر آباد سمیت متعدد مقامات پر موجود ہیں۔

  • نوجوان بیٹر کو چھکا مارتے ہی دل کا دورہ پڑ گیا، ویڈیو

    نوجوان بیٹر کو چھکا مارتے ہی دل کا دورہ پڑ گیا، ویڈیو

    ٹیپ بال کرکٹ میچ میں ایک افسوسناک واقعہ پیش آیا ہے، نوجوان بیٹر کو چھکا مارتے ہی دل کا دورہ پڑا اور وہ گرکر ہلاک ہوگیا۔

    بھارتی ذرائع ابلاغ پر ایک چونکا دینے والا واقعہ زیرگردش ہے جس میں کرکٹ کے شائقین کے سامنے یہ افسوسناک واقعہ پیش آیا، ایک بلے باز مقامی میچ کے دوران چھکا لگانے کے بعد دل کا دورہ پڑنے سے وہیں پچ پر گر کر انتقال کرگیا۔

    میچ کے دوران بنائی گئی ویڈیو وائرل ہوگئی، ویڈیو کے آغاز میں مذکورہ کھلاڑی اعتماد کے ساتھ ایک زبردست چھکا لگاتا ہے جبکہ اسکا بیٹنگ پارٹنر اس آکر شاباش بھی دیتا ہے۔

    تاہم اسی دوران اچانک وہی بیٹر دھڑام سے زمین پر گرتا ہوا نظر آتا ہے، جس سے وہاں موجود کھلاڑی، امپائر اور تماشائی دنگ رہ جاتے ہیں۔

    اسے فوری طور قریبی اسپتال لے جانے کی کوشش کی گئی تاہم وہاں پہنچنے پر بیٹر کو مردہ قرار دے دیا گیا، اس دل دہلا دینے والی ویڈیو کلپ نے آن لائن صارفین میں اب نئی بحث چھیڑ دی ہے۔

    انٹرنیٹ پر کچھ صارفین اس واقعے کو ویکسینیشن کے بعد کے ممکنہ ضمنی اثرات سے جوڑتے ہوئے بھی نظرآئے جبکہ کئی دوسرے لوگوں کا خیال ہے کہ یہ واقعہ نوجوانوں میں تناؤ کی سطح میں خطرناک حد تک اضافے کو اجاگر کرتا ہے۔

    ایک صارف نے کمنٹ کرتے ہوئے لکھا کہ "آج کے نوجوان مسلسل دباؤ میں ہیں، کام، مالی صورتحال، خاندان، اور یہ عوامل، طرز زندگی کی عادات کے ساتھ مل کر، دل کی صحت کے لیے خطرناک بن رہے ہیں۔

    اسی طرح ایک اور صارف نے شیئر کیا کہ "کوئی چھکا کیسے مار سکتا ہے اور اگلے ہی منٹ میں مر سکتا ہے؟ چھکا لگانے کے لیے آپ کو بہت طاقت کی ضرورت ہوتی ہے، اگر اس میں اتنی طاقت ہے تو وہ کیسے مر گیا؟”

    ایک صارف نے لکھا کہ "زندگی ہمیں یاد دلاتی ہے کہ یہ کتنی غیر متوقع ہے، فٹنس کی سطح بہتر ہو رہی ہے، لیکن تناؤ، دباؤ اور مخفی طبی حالات کی وجہ سے دل کی صحت کے لیے خطرات بڑھ رہے ہیں۔

  • بھارت کی جانب سے چھوڑا گیا سیلابی ریلا پاکستانی حدود میں داخل

    بھارت کی جانب سے چھوڑا گیا سیلابی ریلا پاکستانی حدود میں داخل

    لاہور (25 اگست 2025): بھارت کی جانب سے دریائے راوی میں چھوڑا گیا سیلابی ریلا پاکستانی حدود میں داخل ہو گیا ہے اور پانی کی سطح اچانک بلند ہو گئی ہے۔

    فلڈ فور کاسٹنگ ڈویژن کے مطابق کہ بھارت کی جانب سے دریائے راوی میں چھوڑا گیا سیلابی ریلا پاکستانی حدود میں داخل ہو گیا ہے اور دریائے راوی میں جسڑ کے مقام پر پانی کی سطح اچانک بلند ہو گئی ہے۔

    فلڈ فور کاسٹنگ ڈویژن کی جانب سے فراہم کی جانے والی اطلاع میں کہا گیا ہے کہ دریائے راوی میں جسڑ کے مقام پر پانی کی سطح 61 ہزار کیوسک سے بڑھ گئی اور اس وقت یہاں نچلے درجے کا سیلاب ہے۔ یہ سیلابی ریلا آج رات شاہدرہ سے گزرے گا۔

    دریں اثنا دریائے ستلج پر ہیڈ سلیمانکی کے مقام پر ایک لاکھ 181 کیوسک کا ریلا پہنچ گیا ہے اور یہاں درمیانے درجے کا سیلاب ہے۔ اس وقت وہاں سے ڈاؤن اسٹریم میں پانی کا اخراج 93 ہزار 522 کیوسک ہے۔

    دریائے ستلج ہیڈ سلیمانکی پر پانی کی سطح مسلسل بلند ہونے لگی ہے۔ پانی اطراف کے متعدد دیہات میں داخل ہو گیا ہے اور فصلوں کو بھی شدید نقصان پہنچا ہے۔ جس کے باعث یہاں پہلے سے سیلاب متاثرہ علاقوں میں لوگوں کو مشکلات کا سامنا ہے۔

    دوسری جانب ذرائع کا کہنا ہے کہ بھارت نے 24 گھنٹے میں پاکستان سے دوسری بار سفارتی رابطہ کیا اور دریائے ستلج میں سیلاب کی پیشگی اطلاع دی۔

    سفارتی ذرائع کا کہنا ہے کہ بھارت سے سیلاب سے متعلق معلومات سندھ طاس معاہدے کے تحت فراہم نہیں کیں بلکہ سفارتی روابط کو استعمال کرتے ہوئے بھارتی ہائی کمیشن اسلام آباد نے وزارت خارجہ سے رابطہ کرکے اس کی اطلاع دی جب کہ معاہدےکے طریقہ کار کے تحت بھارت ایسی معلومات انڈس واٹر کمشنر کے ذریعہ دیتا ہے۔

    مذکورہ صورتحال پر ترجمان دفتر خارجہ شفقت علی خان نے بتایا کہ بھارت نے گزشتہ روز سیلاب کی وارننگز سندھ طاس کمیشن کے ذریعے نہیں دی بلکہ سفارتی ذرائع سے فراہم کیں۔

    مزید پڑھیں : سندھ طاس معاہدہ معطل، بھارت کا پاکستانیوں کو فوری ملک چھوڑنے کا حکم

    ترجمان دفتر خارجہ کا کہنا ہے کہ بھارت پر لازم ہے کہ سندھ طاس معاہدےکی تمام شقوں پر مکمل عملدرآمد کرے۔ بھارت کا معاہدے کو یکطرفہ معطل رکھنا بین الاقوامی قانون کی سنگین خلاف ورزی ہے اور یہ اقدام جنوبی ایشیا میں امن و استحکام پر انتہائی منفی اثرات مرتب کر سکتا ہے۔

  • پاکستان کے یونیسیف سے رابطے رنگ لے آئے، بھارت کی جانب سے ویکسین کی فراہمی روکنے کا معاملہ حل

    پاکستان کے یونیسیف سے رابطے رنگ لے آئے، بھارت کی جانب سے ویکسین کی فراہمی روکنے کا معاملہ حل

    اسلام آباد : یونیسیف کے دباو پر سیرم انسٹیٹیوٹ آف انڈیا کے ہوش ٹھکانے آگئے ، بھارت کی جانب سے ویکسین کی سپلائی شروع کردی، یونیسیف پاکستان کوویکسین کی سپلائی رواں ہفتےشروع کرے گا۔

    تفصیلات کے مطابق بھارت کی جانب سے پاکستان کیلئے پولیو، خسرہ اور ٹائیفائیڈ سمیت مختلف ویکسین کی فراہمی روکنے کے معاملے پر پاکستان کے یونیسیف سے رابطے رنگ لے آئے۔

    وزارت صحت کے ذرائع کا کہنا تھا کہ پاکستان کی درخواست پر یونیسیف کی بروقت مداخلت کے بعد بھارتی کمپنی نے ویکسین کی سپلائی دوبارہ شروع کر دی ہے۔

    ذرائع نے بتایا کہ پاکستان نے ویکسین کی تاخیر پر یونیسیف سے رابطہ کیا تھا اور فوری فراہمی کی اپیل کی تھی، یونیسیف نے پاکستان کیلئے 27 ارب روپے مالیت کی ویکسین بھارت کی کمپنی سیرم انسٹی ٹیوٹ آف انڈیا (SII) سے خریدی تھی، جن میں پولیو، خسرہ، روبیلا، ٹائیفائیڈ، ہیضہ، بی سی جی، پینٹا ویلنٹ اور نمونیا ویکسین شامل ہیں۔

    ذرائع کے مطابق پاکستان کیلئے 17 ملین سے زائد ڈوز خریدی گئی ہیں، جن کی لاگت کا 60 فیصد حصہ یونیسیف جبکہ 40 فیصد پاکستان نے ادا کیا ہے۔ یہ ویکسین جولائی کے آغاز پر فراہم کی جانی تھیں، تاہم بھارتی کمپنی نے دانستہ تاخیری حربے استعمال کیے۔

    ذرائع نے کہا کہ کمپنی کو جب معلوم ہوا کہ خریداری پاکستان کیلئے ہے تو اس نے جان بوجھ کر ترسیل میں رکاوٹ ڈالی۔

    ذرائع کے مطابق کہ پاکستان کی درخواست پر یونیسیف نے معاملہ فوری طور پر حل کرایا اور ایس آئی آئی نے ویکسین کی فراہمی بحال کر دی ہے، ویکسین کی ترسیل رواں ہفتے پاکستان کو شروع ہو جائے گی۔

  • ایشیا کپ 2025، پاکستان اور بھارت میں سے کون فیورٹ؟ وسیم اکرم نے بتادیا

    ایشیا کپ 2025، پاکستان اور بھارت میں سے کون فیورٹ؟ وسیم اکرم نے بتادیا

    لاہور: پاکستانی کرکٹ ٹیم کے سابق فاسٹ بولر اور سابق کپتان وسیم اکرم نے کہا ہے کہ ایشیا کپ 2025 میں روایتی حریفوں کے درمیان دبئی میں خاصی گرما گرمی ہوسکتی ہے، کھلاڑی اور تماشائی نظم و ضبط کا مظاہرہ کریں اور اور حد پار کرنے سے گریز کریں۔

    عالمی شہرت یافتہ سابق فاسٹ بولر وسیم اکرم نے خبردار کیا ہے کہ دبئی میں ایشیا کپ 2025 کے دوران فضا خاصی گرم ہوسکتی ہے تاہم انہوں نے زور دیا کہ نہ کھلاڑی اور نہ ہی شائقین حد سے تجاوز کریں۔

    سابق آل راؤنڈر نے کہا کہ دنیا بھر کے کروڑوں لوگ بھارت اور پاکستان کے درمیان ہونے والے میچ سے لطف اندوز ہوتے ہیں، یہ مقابلے ہمیشہ دلچسپ ہوتے ہیں مگر ضروری ہے کہ کھلاڑی اور تماشائی نظم و ضبط قائم رکھیں اور حد پار نہ کریں۔

    وسیم اکرم کا کہنا تھا کہ دونوں ملکوں کے عوام اپنے اپنے وطن سے محبت کرتے ہیں لیکن حب الوطنی کا مطلب یہ نہیں کہ کھیل کو کھیل کے دائرے سے باہر لے جایا جائے، اگر بھارتی عوام اپنی ٹیم کی حمایت کرتے ہیں تو پاکستانی شائقین بھی ایسا ہی کریں گے، یہ بالآخر کھیل ہے اس سے زیادہ کچھ نہیں ہے۔

    پاکستانی سابق سپر اسٹار فاسٹ بولر کی جانب سے 14 ستمبر کو دبئی میں شیڈول روایتی حریفوں کے مقابلے میں بھارت کو پاکستان کے مقابلے میں فیورٹ قرار دیا۔

    اُنہوں نے کہا کہ پاکستان گزشتہ برسوں میں بھارت کے خلاف مستقل کامیابیاں حاصل نہیں کرسکا تاہم ٹی ٹوئنٹی فارمیٹ میں گرین شرٹس کے پاس مواقع رہے ہیں، پاکستان نے 2021 کے ورلڈ کپ اور 2022 کے ایشیا کپ میں بھارت کو ہرایا تھا۔

    کپتانوں کی تبدیلی، پی سی بی کا اہم بیان سامنے آگیا

    سابق کپتان کا مزید کہنا تھا کہ بھارت کی حالیہ عرصے کے دوران پرفارمنس بہترین رہی ہے اور فیورٹ کے طور پر میدان میں اترے گا، لیکن اصل فیصلہ اس دن ہوگا کہ کون سی ٹیم دباؤ کا بہتر طریقے سے سامنا کرنے میں کامیاب ہوتی ہے۔

  • بھارت نے 15 پاکستانی ماہی گیروں کو گرفتار کرلیا

    بھارت نے 15 پاکستانی ماہی گیروں کو گرفتار کرلیا

    سجاول : بھارتی بارڈر سیکیورٹی فورس نے 15 پاکستانی ماہی گیروں کو گرفتار کر لیا، گرفتار ماہی گیروں کا تعلق تحصیل جاتی کے گاؤں عمر بھریو کامرو سے ہے۔

    تفصیلات کے مطابق بھارتی بارڈر سیکیورٹی فورس (بی ایس ایف) نے ضلع سجاول سے تعلق رکھنے والے 15 پاکستانی ماہی گیروں کو کوری کریک کے قریب سے گرفتار کر کے ان کی انجن لگی کشتی قبضے میں لے لی، گرفتار ماہی گیروں کا تعلق تحصیل جاتی کے گاؤں عمر بھریو کامرو سے ہے۔

    ذرائع نے بتایا کہ بی ایس ایف نے کشتی سے 60 کلو مچھلی، 9 جال، موبائل فون اور دیگر سامان بھی ضبط کر لیا۔

    ذرائع کا کہنا تھا کہ گرفتار افراد میں حمزو ولد عبداللہ، عبدالغفور ولد آچر، احمد ولد خمیسو، فیاض ولد حسین، انصار ولد رمضان، عبدالجبار ولد عثمان، آدم ولد رمضان، زینل ولد میر محمد، سلیم ولد ابراہیم، اشرف ولد غنی، عرس ولد یعقوب، محمد بچل ولد غلام محمد، اسحاق ولد پنہل، کریم بخش ولد اوڈھو اور مشتاق ولد آچر بھریو شامل ہیں۔

    ان گرفتاریوں کے بعد بھارتی جیلوں میں قید ضلع سجاول کے ماہی گیروں کی تعداد بڑھ کر 48 ہو گئی ہے۔

    پاکستان فشر فوک فورم کے چیئرمین مہران علی شاہ، سینیئر وائس چیئرپرسن یاسمین شاہ اور وائس چیئرمین نور محمد تھہیمور نے اس اقدام کی شدید مذمت کرتے ہوئے کہا کہ بھارتی فورسز بین الاقوامی قوانین کی کھلم کھلا خلاف ورزی کر رہی ہیں۔

    انہوں نے مطالبہ کیا کہ گرفتار ماہی گیروں کو فوری طور پر رہا کیا جائے اور پاکستان و بھارت کے درمیان ماہی گیروں کی حفاظت کے لیے مستقل لائحہ عمل تیار کیا جائے۔