اسلام آباد: وزیر اعظم شہباز شریف کا کہنا ہے کہ گزشتہ حکومت کو عوامی تکالیف سے کوئی سروکار نہیں تھا، ہماری بھرپور کوشش ہے کہ معیشت کو مضبوط کیا جائے، مہنگائی میں کمی لائی جائے۔
تفصیلات کے مطابق وزیر اعظم شہباز شریف نے بارہ کہو بائی پاس منصوبے کا سنگ بنیاد رکھ دیا، 5.4 کلو میٹر طویل منصوبہ 4 ماہ کی ریکارڈ مدت میں مکمل کرنے کا ہدف رکھا گیا ہے۔
منصوبے میں 12 سو 50 میٹر طویل اوور ہیڈ برج بنایا جائے گا۔
وزیراعظم شہباز شریف نے اسلام آباد میں بارہ کہو بائی پاس منصوبے کا سنگ بنیاد رکھ دیا۔
بارہ کہو بائی پاس کے سنگِ بنیاد کی تقریب سے خطاب کے دوران وزیراعظم شہباز شریف نے کہا کہ بارہ کہو مری روڈ پر گھنٹوں ٹریفک جام رہتا ہے، اس منصوبے سے بارہ کہو میں ٹریفک کا رش ختم ہوگا۔ pic.twitter.com/J7x0bTRU86
— PML(N) (@pmln_org) September 30, 2022
تقریب سے خطاب کرتے ہوئے وزیر اعظم کا کہنا تھا کہ آج عظیم عوامی منصوبے کے سنگ بنیاد کی تقریب پر اکٹھے ہوئے ہیں، یہ عظیم عوامی منصوبہ 4 ماہ میں مکمل کیا جائے گا۔ این ایل سی سے گزارش ہے کہ اس منصوبے کو 3 ماہ میں مکمل کیا جائے۔
انہوں نے کہا کہ راولپنڈی کے عوام کے لیے این ایل سی کی یہ بہت بڑی خدمت ہوگی، اس روڈ پر بعض اوقات گھنٹوں ٹریفک جام رہتا ہے، اسلام آباد اور راولپنڈی کے باسیوں کے لیے بے شمار منصوبے بنائے گئے، اورنج لائن، گرین لائن، میٹرو بس اور فلائی اوور جیسے منصوبے دیے ہیں۔
وزیر اعظم کا کہنا تھا کہ گزشتہ حکومت کو عوامی تکالیف سے کوئی سروکار نہیں تھا، عوام کا دکھ درد ہوتا تو مسائل کا پہاڑ نہ ہوتا بلکہ مسائل حل ہوتے۔ گزشتہ حکومت نے دن رات جھوٹ بولا، ایک رواج قائم کیا کہ لوگوں کو دھوکہ دیتے جائیں۔
انہوں نے کہا کہ عمران نیازی دن رات جھوٹ بولتا ہے، میں نے زندگی میں اتنا غیر ذمہ دار اور جھوٹا آدمی کبھی نہیں دیکھا۔ آپ نے اسپتال بھی بنایا جو اچھی بات ہے۔
وزیر اعظم کا مزید کہنا تھا کہ ہماری بھرپور کوشش ہے کہ معیشت کو مضبوط کیا جائے، مہنگائی میں کمی لائی جائے۔
