اسلام آباد: حکومت نے دہشتگردوں کو سنائی جانےو الی سزائے موت پر فوری عمل درآمد کیلئے ملک بھر کی سینٹرل جیلوں میں پھانسی گھاٹ قائم کرنے کا فیصلہ کیا ہے۔
حکومت نے دہشتگردوں کی سزائے موت پر فوری عملدرآمد کے لئے ملک کی تمام سنٹرل جیلوں میں پھانسی گھاٹ تعمیر کرنے کا فیصلہ کیا ہے،جیل قوانین کے تحت اس وقت صرف ڈسٹرکٹ جیل ہی میں سزائے موت پر عملد رآمد کرایا جاتا ہے، لیکن موجودہ حالات میں دہشتگردوں کی سینٹرل جیل سے ڈسٹرکٹ جیل منتقلی کے دوران دہشت گردوں کے ساتھیوں کے حملوں کے پیش نظر سنٹرل جیلوں میں پھانسی گھاٹ بنانے کا فیصلہ کیا گیا ہے، جسکے لئے ٹھیکیداروں سے درخواستیں طلب کر لی گئی ہیں۔
ذرائع کا کہنا ہے کہ موجودہ جیل قوانین کے مطابق سزائے موت صرف ضلعی جیل میں دی جا سکتی ہے ، جس کے لئے سینٹرل جیل میں قید مجرم کو ضلعی جیل پہنچانا ضروری ہے، ملک کی بیشتر سینٹرل جیلوں میں سزائے موت کے ہزاروں قیدی بند ہیں جنہیں سزا پر عملدرآمد کیلئے ضلعی جیل پہنچانا قانون کی ضرورت ہے۔
