Tag: بھکاری

آمد رمضان کے ساتھ ہی ملک کے سب سے بڑے شہر کراچی میں بھکاری مافیا نے انٹری دے دی ہے اور جوق درجوق آمد کا سلسلہ جاری ہے۔

شہر قائد سخاوت کے حوالے سے پاکستان بھر میں مشہور ہے۔ ملک میں کوئی حادثہ، آفت ہو مدد میں کراچی والے پیش پیش رہتے ہیں۔ سب سے زیادہ فلاحی ادارے بھی شہر قائد میں ہیں۔ فقرا اور مساکین کے لیے روزانہ سب سے زیادہ دستر خوان بھی اسی شہر میں سجائے جاتے ہیں۔

رمضان میں کیونکہ سخاوت معمول سے زیادہ بڑھ جاتی ہے اس لیے پیشہ ور بھکاریوں کے لیے یہ مہینہ ثواب سے زیادہ پیسہ کمانے کا ہوتا ہے۔ ہر سال کی طرح رمضان المبارک آتے ہی کراچی میں بھی بھکاری مافیا نے انٹری دے دی ہے اور ملک کے مختلف علاقوں سے پیشہ ور گداگروں نے شہر قائد کا رخ کر لیا ہے۔

میڈیا رپورٹس کے مطابق اب تک تقریباً تین لاکھ سے زائد بھکاری شہر قائد میں داخل ہوچکے ہیں جب کہ ٹرینوں، بسوں اور پرائیویٹ گاڑیوں کے ذریعہ مزید بھکاریوں کی آمد کا سلسلہ جاری ہے۔

گداگر مافیا کے کارندے گلیوں، بازاروں اور فٹ پاتھوں پر قبضے بھی کر رہے ہیں۔ یہاں وہ انسانی ہمدردی کے لیے مختلف بہروپ اختیار کر کے سادہ لوح شہریوں کی جیبوں پر ڈاکا ڈالیں گے اور اصل حقداروں کا حق ماریں گے۔

واضح رہے کہ گداگاری کیخلاف سپریم کورٹ اور سندھ ہائی کورٹ کے واضح احکامات ہیں تاہم اس کے باوجود صوبائی حکومت اور مقامی حکام اس مسئلے پر قابو پانے میں ناکام نظر آتے ہیں۔

کراچی: ٹریفک سگنلز، چوراہوں اور شاہراہوں پر شہریوں کے لیے عذاب بننے والے بھکاریوں کیخلاف کریک ڈاؤن کا فیصلہ کرلیا گیا۔

کمشنرکراچی نے کہا کہ ٹریفک سگنلز اور دیگر مقامات پر پیشہ گداگروں کی بھرمار سے شہری پریشان ہیں، کمشنر کراچی نے ڈپٹی کمشنرز کو ہدایت کی ہے کہ پیشہ ورگداگروں کےخلاف مربوط کارروائی کی جائے۔

کمشنر کا کہنا تھا کہ ایسے عناصر اور عوامل کو تلاش کریں جو پیشہ ورگداگروں کے پیچھے کام کررہے ہیں، گداگری کو کاروباری نیٹ ورک بنانے والوں کو گرفتار کیا جائے۔

اس موقع پر ڈپٹی کمشنرز کی جانب سے گداگروں کے خلاف کارروائی سے متعلق بریفنگ دی گئی، لاوارث بھکاری بچوں کے لیے بحالی سینٹر بنانے کی تجویز پر غور کیا گیا۔

بڑی عمر کے بےسہارا بھکاریوں کیلئے بھی لائحہ عمل بنانے پر بھی غور کیا گیا، بریفنگ میں بتایا گیا کہ مختلف علاقوں میں کارروائیاں کرتے ہوئے 37 سے زائد پیشہ ور بھکاری گرفتار کیے گئے۔