آندھرا پردیش: بھارتی ریاست میں میاں بیوی نے خزانے کی تلاش کے لیے ایک گونگی بہری خاتون کو بھینٹ چڑھانے کی کوشش کی۔
غیر ملکی میڈیا کے مطابق چھپے ہوئے خزانے کے لیے ضعیف خاتون کی بلی دینے کی کوشش خاتون نے ناکام بنا دی، پولیس نے مقدمہ درج کر کے تفتیش شروع کر دی ہے۔
یہ چونکا دینے والا واقعہ 15 مئی کو آندھرا پردیش کے ضلع چِتور کے ایک گاؤں وڈیکندریگا میں پیش آیا تھا، گزشتہ روز معاملہ منظر عام پر آنے کے بعد پولیس نے متاثرہ خاتون کی شکایت پر مقدمہ درج کیا۔
پولیس کے مطابق 58 سالہ خاتون سروجماں جو سماعت اور قوت گویائی سے محروم ہے، نے شکایت درج کرائی کہ ان کے رشتہ داروں سیشدری اور ان کی بیوی سُباما نے مل کر کسی خزانے کی تلاش کے لیے ان کی بلی دینے کی کوشش کی۔
متاثرہ خاتون نے بیان دیا کہ میاں بیوی نے مجھے پوجا کے بہانے کچھ رقم کا لالچ دیا، اور چند دیگر افراد کے ساتھ مل کر دور کی ایک ویران جگہ پر لے گئے، پھر انھوں نے مجھے نہلایا اور جسم پر ہلدی لگائی، لیکن اس کے بعد جب میں نے سیشدری کے ہاتھ میں چھری دیکھی تو میرے اوسان خطا ہو گئے۔
خاتون کے بیان کے مطابق انھوں نے خطرہ محسوس کیا کہ انھیں کسی خزانے کی تلاش کے لیے بھینٹ چڑھایا جا رہا ہے تو وہ وہاں سے بھاگنے میں کامیاب ہو گئیں، اور گھر آ کر اپنے بیٹے کو مطلع کر دیا، بعد ازاں دونوں نے پولیس اسٹیشن جا کر رپورٹ درج کرائی۔
یہ بھی بتایا گیا کہ ضعیف اور معذور خاتون کے گھر والوں کو کچھ رقم دے کر معاملہ رفع دفع کرنے کی کوشش بھی کی گئی تاہم انھوں نے پولیس کو معاملے کی خبر کر دی۔
