لاہور (16 جولائی 2025):ماحولیاتی آلودگی کے باعث اب گاڑیاں بھی ایندھن کے بجائے الیکٹرک بن رہی ہیں آپ بھی ای ٹیکسی آسانی سے حاصل کر سکتے ہیں۔
ماحولیاتی آلودگی کے باعث اب دنیا بھر میں روایتی ایندھن کا استعمال کم سے کم کیا جا رہا ہے۔ ذرائع آمدورفت کے لیے پٹرول اور ڈیزل پر چلنے والی گاڑیوں کی جگہ اب الیکٹرک گاڑیاں آگئی ہیں۔
پنجاب میں بھی حکومت نے پہلی ای ٹیکسی سروس شروع کرنے کا منصوبہ تیار کر لیا ہے۔ یہ الیکٹرک گاڑیاں بلاسود آسان اقساط پر فراہم کی جائیں گی۔
اس حوالے سے وزیر ٹرانسپورٹ بلال اکبر خان کے زیر صدارت اسٹیئرنگ کمیٹی کا اجلاس ہوا، جسمیں ای ٹیکسی منصوبے کی پیشرفت پر تفصیلی بریفنگ دیتے ہوئے مختلف الیکٹرک گاڑیوں، ان کی قیمتوں اور تکنیکی معاملات کا جائزہ بھی لیا گیا۔
اجلاس میں الیکٹرک گاڑیوں کیلیے چارجنگ اسٹیشنز اور دیگر امور پر گفتگو ہوئی جب کہ منصوبے کو مزید بہتر اور کامیاب بنانے کیلیے مختلف تجاویز پر غور کیا گیا۔
اس موقع پر صوبائی وزیر ٹرانسپورٹ نے بتایا کہ پہلے مرحلے میں 1100 الیکٹرک گاڑیاں بلاسود آسان اقساط پر ای ٹیکسی منصوبے تحت فراہم کی جائیں گی۔
ان کا کہنا تھا کہ ای ٹیکسی اسکیم کیلیے بہت آسان شرائط رکھی جا رہی ہیں۔ یہ منصوبہ آئندہ چند ہفتوں میں بذریعہ اشتہار باقاعدہ عوام کے سامنے پیش کر دیا جائے گا۔