Tag: بہو

بھارت میں حوا کی بیٹی کے ساتھ ایک اور غیر انسانی سلوک سامنے آیا ہے جہاں من پسند جہیز نہ ملنے پر سسرالیوں نے بہو کو جان لیوا وائرس ایڈز کا انجکشن لگا دیا۔

بھارت میں جہاں اقلیت کے ساتھ ہندو خواتین بھی ظلم کا شکار ہیں اور وہاں آئے دن جہیز اور دیگر معاملات پر خواتین کو قتل، زندہ جلانے سے واقعات سامنے آتے ہیں۔ اب ایسا خوفناک واقعہ پیش آیا ہے جس نے سننے والوں کے دل دہلا دیے ہیں۔

بھارتی میڈیا کے مطابق یہ غیر انسانی واقعہ ریاست اترپردیش میں پیش آیا جہاں سونال سائنی نامی خاتون کو اس کے سسرالیوں نے صرف اس وجہ سے ’’ایڈز متاثرہ انجکشن‘‘ لگا کر زندہ درگور کر دیا کہ اس کے والدین نے منہ مانگا جہیز نہیں دیا تھا۔

رپورٹ کے مطابق متاثرہ خاتون کے والد نے اپنے داماد اور اس کے گھر والوں کے خلاف مقدمہ درج کرایا ہے۔

متاثرہ خاتون کے والد کا کہنا ہے کہ انہوں نے 2023 میں اپنی بیٹی سونال سائنی کی شادی اتراکھنڈ کے رہائشی ابھیشیک سے کی تھی اور شادی کے موقع پر دلہے کے خاندان کو جہیز میں ایک کار اور 15 لاکھ روپے نقد ادا کیے تھے۔

مقدمہ کے مدعی کے بتایا کہ داماد اور سسرالیوں نے کچھ عرصہ بعد بیٹی کو میکے بھیج کر ایک گاڑی اور 25 لاکھ روپے کا مطالبہ کر دیا۔ پنجایت کی مداخلت کے بعد لڑکی کو واپس اپنے سسرال میں بھیج دیا لیکن سسرالیوں نے مطالبہ پورا نہ ہونے پر ان کی بیٹی پر ذہنی اور جسمانی تشدد کیا۔

سونال کے والدین نے کہا کہ ان کی بیٹی کو سسرالیوں نے ایڈز (ایچ آئی وی) سے آلودہ انجکشن لگا کر زندہ درگور کر دیا ہے۔ بیٹی کی طبعیت خراب ہونے پر جب اس کا ٹیسٹ کرایا تو ایچ آئی وی پازیٹو آیا جب کہ داماد کا ٹیسٹ نگیٹو آیا۔

لڑکی کے خاندان نے پولیس کو شکایت درج کرائی، لیکن لڑکے کے خلاف کوئی کارروائی نہیں کی گئی۔ یہ شکایت جب مقامی عدالت میں پہنچی تو عدالت کے حکم پر پولیس نے ابھیشک اور اس کے گھر والوں کے خلاف جہیز کے مطالبے، ہراسیت، تشدد اور اقدامِ قتل سمیت کئی دفعات کے تحت مقدمہ درج کر لیا ہے۔

نئی دہلی: اترپردیش کی عدالت نے شوہر کی غیر موجودگی میں بہو کو سسرال میں رہنے کی اجازت دینے سے متعلق درخواست کو مسترد کردیا۔

بھارت کی الٰہ آباد ہائیکورٹ کی لکھنؤ بنچ نے اپنے فیصلے میں کہا کہ شوہر کی غیر موجودگی میں ساس سسر اپنی بہو کو سسرال آ کر رہنے کے لیے مجبور نہیں کر سکتے یعنی کہ شوہر کی غیر موجودگی میں ضروری نہیں ہے کہ بیوی سسرال میں ہی رہے۔

محمد ہاشم نامی شخص نے ایک درخواست دائر کرتے ہوئے عدالت سے یہ خواہش کی تھی کہ ان کی بہو کو سسرال میں رہنے کا حکم جاری کیا جائے۔

 شکایت میں کہا گیا تھا کہ گزشتہ دو سال سے ان کی بہو کو اس کے والدین نے یرغمال بنا کر مائیکہ میں رکھ لیا ہے جبکہ ان کا بیٹا کویت میں ملازمت کرتا ہے۔

جسٹس شمیم احمد نے اپنے فیصلہ میں کہا کہ شوہر کی غیر موجودگی میں ساس سسر اپنی بہو کو سسرال میں آ کر رہنے کے لیے مجبور نہیں کر سکتے چونکہ مسلم قانون کے تحت شادی ایک معاہدہ ہے اور اس میں بیوی کی حفاظت، اس کی ضرورتوں کو پوری کرنے کی ذمہ داری شوہر کی ہے اس لیے بیٹے کی عدم موجودگی میں ساس سسر کسی بات کے لیے بہو کو مجبور نہیں کر سکتے۔

بنچ نے واضح طور پر کہا کہ شادی کے بعد شوہر کویت میں کما رہا ہے اور بیوی اپنے والدین کے ساتھ رہ رہی ہے تو ایسے میں یہ نہیں کہا جا سکتا کہ بہو کویرغمال بنا کر رکھا گیا ہے۔

 عدالت نے یہ بھی کہا کہ ممکن ہے شوہر کی غیر موجودگی میں بیوی سسرال میں رہنا پسند نہیں کرتی ہو۔