انسداد منشیات فورس نے کراچی میں بڑی کارروائی کرتے ہوئے 700 کلوگرام آئس بیرون ملک اسمگل کرنے کی کوشش ناکام بنا دی ہے۔
اے آر وائی نیوز کے مطابق اینٹی نارکوٹکس فورس (اے این ایف) نے ساؤتھ ایشیا پاکستان ٹرمینل کراچی پر کامیاب کارروائی کرتے ہوئے بھاری مقدار میں بیرون ملک آئس اسمگل کرنے کی کوشش ناکام بنا دی اور ملزم کو رنگے ہاتھوں گرفتار کر لیا ہے۔
ترجمان اے این ایف نے بتایا کہ یہ منشیات ملائیشیا اسگل کی جا رہی تھی اور بُک کیے گئے کنٹینر سے 700 کلو گرام میتھ ایمفیٹامائن آئس برامد ہوئی ہے۔
یہ آئس کیلشیم کاربونیٹ کے ساتھ مکس کر کے اسمگل کی جا رہی تھی۔ ٹیم نے کنٹینر میں موجود کیلشیئم کاربونیٹ کے 854 بیگوں کی تلاشی لی جس میں 28 سے آئس برآمد ہوئی ہے۔
اے این ایف کا کہنا ہے کہ مذکورہ کنٹینر کراچی میں قائم نجی کمپنی کی جانب سے کوالالمپور کے لیے بُک کرایا گیا تھا۔ گرفتار ملزم کو مزید کارروائی کے لیے متعلقہ حکام کے حوالے کر دیا گیا ہے۔
