Tag: بینک آف چائنا

اسلام آباد : بینک آف چائنا اور انڈسٹریل کمرشل بینک آف چائنا نے پانڈا بانڈز کے اجرا کیلئے پاکستان کو مکمل تعاون کی یقین دہانی کرادی۔

تفصیلات کے مطابق پاکستان کو پانڈا بانڈز کے اجرا کے لیے بینک آف چائنا اور انڈسٹریل کمرشل بینک آف چائنا کی مکمل تعاون کی یقین دہانی حاصل ہو گئی۔

ذرائع نے بتایا کہ پانڈا بانڈز کا اجرا تین مختلف مراحل میں کیا جائے گا، جس کے تحت 2028 تک ایک ارب ڈالر تک کے بانڈز جاری ہوں گے۔

وزیر خزانہ محمد اورنگزیب کو اس حوالے سے دونوں بینکوں کے حکام نے تعاون کی یقین دہانی کرائی، ملاقات میں پاک چین مالی تعاون کو مزید بڑھانے پر بھی اتفاق کیا گیا۔

پہلے مرحلے میں 25 سے 30 کروڑ ڈالر مالیت کے پانڈا بانڈز جاری کیے جائیں گے، جبکہ وزارت خزانہ نے اس سلسلے میں تیاریاں مکمل کر لی ہیں جو آخری مراحل میں ہیں۔

ذرائع کا کہنا تھا کہ موڈیز، فِچ اور ایس اینڈ پی گلوبل کی جانب سے پاکستان کی کریڈٹ ریٹنگ میں بہتری کے بعد بانڈز کے اجرا کے لیے سازگار صورتحال پیدا ہوئی ہے، جس سے پانڈا بانڈز کے اجرا کو سہولت ملے گی۔

ذرائع کے مطابق اسی لئے فیصلہ کیا گیا ہے کہ رواں مالی سال کی دوسری سہ ماہی کے دوران پانڈا بانڈز جاری کر دیے جائیں گے۔

اسلام آباد : چین نے نئے قرض کے معاہدے لئے پاکستان پر سخت شرائط عائد کردیں ، بینک سے 30 کروڑ ڈالر قرض ملنا تھا۔

تفصیلات کے مطابق وزارت خزانہ بینک آف چائنا اورانڈسٹریل اینڈ کمرشل بینک سے نئے قرض کیلئے معاہدہ کرنے میں ناکام رہی۔

ذرائع نے کہا ہے کہ بینک آف چائنااور انڈسٹریل اینڈ کمرشل بینک سے 60 کروڑ ڈالر کیلئے چین نے سخت شرائط عائد  کی، بینک آف چائناسے30 کروڑڈالراور انڈسٹریل اینڈ کمرشل بینک سے 30 کروڑ ڈالر قرض ملنا تھا۔

ذرائع نے بتایا کہ سخت شرائط میں نرمی کیلئے چائنیز کمرشل بینکوں کو درخواست کرنے کے باوجودپیشرفت نہ ہو سکی۔

چائنیز بینکوں کی جانب سے نئے قرض کیلئے چائنیز آئی پی پیز کی ادائیگیوں کے شیڈول کی شرط عائد کی گئی، 8 فیصد تک ہائی شرح سود پر قرض کیلئے بھی شرط عائد کی گئی تھی۔

ذرائع وزارت خزانہ کا کہنا تھا کہ حکومت پاکستان تقریباً گزشتہ 10ماہ سےچائنیز بینکوں سےقرضے کےحصول کیلئے مشاورت جاری رکھے ہوئے ہے، معاہدہ طے پائے جانے پر انڈسٹریل اینڈ کمرشل بینک کی پاکستان برانچ سے 30 کروڑ ڈالر رقم ٹرانسفر کی جانا تھی۔