Tag: بینک سے رقم

کراچی: شہر قائد میں اسٹریٹ کرائمز کے خاتمے یا کمی کے دعوے دھرے کے دھرے رہ گئے، بینک سے رقم نکالنے والا شہری گھر کے اندر ہی محض 40 سیکنڈ میں لٹ گیا۔

تفصیلات کے مطابق کراچی کے علاقے گارڈن میں ایک شہری بینک سے رقم نکالنے کے بعد گھر آیا تو لٹیروں نے اسے چالیس سیکنڈ کے اندر لوٹ کر رقم سے محروم کر دیا، جب کہ اس دوران شہری کی معصوم بیٹی حیرانگی سے یہ واقعہ دیکھتی رہ گئی۔

واردات کی سی سی ٹی وی فوٹیج اے آر وائی نیوز نے حاصل کر لی، ڈکیتی کا یہ واقعہ گارڈن تھانے کی حدود میں واقع ایک اپارٹمنٹ میں پیش آیا، جس میں 3 ملزمان 40 سیکنڈ میں واردات کر کے فرار ہو گئے۔

یہ بھی پڑھیں:  کراچی میں اسٹریٹ کرائم کی وارداتیں کم نہ ہوسکیں، رپورٹ جاری

فوٹیج میں ملزمان کو سڑک سے اپارٹمنٹ کے اندر داخل ہوتے بھی دیکھا جا سکتا ہے، اطلاعات کے مطابق متاثرہ شہری اردو بازار میں بینک سے رقم لے کر نکلا تھا، ملزمان نے بینک سے شہری کا تعاقب کیا، انھوں نے ماسک اور ہیلمٹ پہن رکھے تھے۔

ادھر پولیس نے ملزمان کی موٹر سائیکل کا نمبر بھی حاصل کر لیا ہے، تاہم اس کے باوجود پولیس ملزمان تک پہنچنے میں تاحال ناکام ہے۔

واضح رہے کہ گزشتہ ماہ کی رپورٹ ہے کہ کراچی میں شہریوں کو 5 ہزار سے زائد گاڑیوں، موٹرسائیکلوں اور موبائل فون سے محروم کیا گیا تھا۔

کراچی: سی ٹی ڈی انویسٹی گیشن نے اورنگی ٹاؤن کراچی میں کارروائی کرتے ہوئے بینکوں سے رقم لے کر نکلنے والے شہریوں کو لوٹنے والا 3 رکنی گروہ گرفتار کر لیا۔

تفصیلات کے مطابق شہرِ قائد میں بینکوں اور اے ٹی ایم سے رقم لے کر نکلنے والے شہریوں کو لوٹنے کی بڑھتی وارداتوں کے پیش نظر کاؤنٹر ٹیررازم ڈیپارٹمنٹ نے کارروائی کرتے ہوئے ایک گروہ کو گرفتار کر لیا۔

انچارج سی ٹی ڈی چوہدری صفدر نے میڈیا کو بتایا کہ گرفتار ملزمان میں بادشاہ خان،محمد یامین اور رحیم شامل ہیں، ملزمان سے 3 پستول برآمد ہوئے۔

انچارج سی ٹی ڈی کا کہنا تھا کہ دوران تفتیش ملزمان کی جانب سے متعدد انکشافات کیے گئے ہیں، بینک سے رقم لے کر نکلنے والے شہری ان ملزمان کا ہدف ہوتے تھے، گرفتار ملزم محمد رحیم گروہ کا سرغنہ ہے۔

یہ بھی پڑھیں:  کراچی: بلدیہ ٹاؤن میں لٹیروں نے امام مسجد کو لوٹ لیا

یاد رہے کہ دو دن قبل کراچی کے علاقے بلدیہ ٹاؤن میں دو مسلح ملزمان نے بینک سے نکلنے والے امام مسجد کو لوٹا اور انھیں 90 ہزار کی رقم سے محروم کر دیا۔

موٹر سائیکل سوار ملزمان نے بینک سے امام مسجد کا پیچھا کیا اور گھر کے پاس اترتے ہی انھیں گن پوائنٹ پر لوٹ لیا۔

اس سے دو دن قبل کورنگی میں بھی بینک سے رقم نکلوانے والے شہری کو گھر کے باہر لوٹ لیا گیا جس کی ویڈیو بھی منظر عام پر آ گئی تھی۔