وقت کے ساتھ ساتھ پاکستان میں اب ڈیبِٹ اور کریڈٹ کارڈ کے استعمال میں خاطر خواہ اضافہ ریکارڈ کیا جارہا ہے، جس کی وجہ سے کچھ بدعنوان عناصر نے بھی دھوکہ دہی اور لوٹ مار کا بازار گرم کر رکھا ہے۔
سائبر کرائم میں ملوث لوگ سادہ لوح افراد کو مختلف بہانوں کے ذریعے ذاتی معلومات حاصل کرکے ان کے اکاؤنٹ کا صفایا کرجاتے ہیں اور جب تک لُٹنے والے کو خبر ہوتی ہے اس وقت تک بہت دیر ہوچکی ہوتی ہے۔
اس حوالے سے اے آر وائی ڈیجیٹل کے پروگرام گڈ مارننگ پاکستان میں ماہرِ امورِ بینکاری اور ٹرینر راشد اقبال نے بتایا کہ کس طرح ایک عام شہری ان دھوکہ باز عناصر کے چنگل سے بچ سکتا ہے؟
انہوں نے بتایا کہ سال 2017 اور 2018 سے بینکنگ شعبے میں جدید ٹیکنالوجی کا استعمال بڑھتا جارہا ہے، جس کا ناجائز استعمال بھی بہت زیادہ کیا جارہا ہے تاہم اس سے بچنے کا بھی طریقہ ہے۔
ان کا کہنا تھا کہ اس فراڈ میں ہوتا یہ ہے کہ صارف کے نام سے اس کی ڈپلیکیٹ سم نکلوالی جاتی ہے اور ہیکرز اس کے ذریعے اکاؤنٹ ہولڈر کی ساری معلومات حاصل کرلیتے ہیں۔
انہوں نے بتایا کہ ہیکر بار بار کال کرتا ہے تاکہ صارف کا ون ٹائم پاس ورڈ (او ٹی پی) حاصل کرسکے، لہٰذا کسی بھی نامعلوم نمبر سے آنے والی کال بالکل نہ اٹھائیں، اگر صارف نے کال ریسیو کرلی یا کاٹ دی تو دونوں صورتوں میں اس کا او ٹی پی ہیکر کے علم میں آجائے گا۔
راشد اقبال نے کہا کہ اس کا حل یہی ہے کہ فون کو بجنے دیا جائے اور جیسے کال ختم ہو اس نمبر کو بلاک کرکے متعلقہ ادارے اور اپنے بینک کی ہیلپ لائن کو مطلع کریں۔
