کراچی : بینک کے اے ٹی ایم سے جعل سازی کے ذریعے رقم نکلوانے والے چینی باشندے کو پولیس نے ایک کارروائی میں حراست میں لے کر اسکیمنگ ڈیوائس برآمد کر لی ہے.
تفصیلات کے مطابق کراچی پولیس نے شبیر آباد میں کارروائی کرتے ہوئے شارع فیصل پر واقع نجی بینک کے قریب سے چینی باشندے کو گرفتار کر لیا ہے جو اے ٹی ایم اسکیمنگ ڈیوائس کے ذریعے صارفین کا ڈیٹا حاصل کر کے رقم نکال لیا کرتا تھا.
پولیس ذرائع کے مطابق ٹیپوسلطان روڈ کے قریب شبیر آباد سے حراست میں لیا جانے والا چینی باشندہ شو شاپنگ اپنے تین ساتھیوں کے ہمراہ بینک کے اے ٹی ایم میں داخل ہو رہا تھا کہ پولیس نے ملزم کو گرفتار کرلیا جب کہ اس کے تین ساتھی فرار ہوگئے جن کی تلاش کے لیے چھاپے مارے جا رہے ہیں.
اسی سے متعلق : اے ٹی ایم، جعل سازی سے بچنے کے ،لیے کیا احتیاط کریں؟
اے ایس پی شاہراہ فیصل نے میڈیا سے بات کرتے ہوئے بتایا کہ گرفتار کیا جانے والے چینی باشندے کو مزید تحقیقات کے لیے ایف آئی اے کے حوالے کیا جائے گا جس کے قبضے سے 6 لاکھ روپے نقد اور اے ٹی ایم اسکیمنگ ڈیوائس بھی برآمد ہوئی ہے.
واضح رہے کہ دو روز قبل کراچی کے ریڈ الرٹ زون کے قریب واقع زینب مارکیٹ کے ایک نجی بینک میں اسکیمنگ ڈیوائس لگاتے ہوئے دو چینی باشندوں کو حراست میں لیا گیا تھا اور اسی طرح ایک معروف شاپنگ مال میں موجود اے ٹی ایم میں ڈیوائس لگا کر ڈیٹا حاصل کرلیا گیا تھا۔
اے ٹی ایم میں ڈیوائس لگا کر صارفین کا ڈیٹا چوری کرنے اور بعد ازاں جعلی کارڈ بنا کر رقم نکلوانے کے پے در پے واقعات کے بعد حکومت نے بینکوں کے باہر تنصیب اے ٹی ایم کی سخت سیکیورٹی کردی ہے جب کہ بینک انتظامیہ نے بھی خفیہ کیمروں کے ذریعے اے ٹی ایم کی نگرانی کا عمل سخت کردیا ہے۔
