کینیڈا کی سرزمین پرسکھ رہنما کے قتل پر پانچ اہم ممالک کی انٹیلی جنس ایجنسیاں بھارت کے خلاف ایک پلیٹ فارم پر آگئیں اور ہردیپ سنگھ نجر کے قتل کے الزامات کو انتہائی سنجیدہ قرار دے دیا۔
تفصیلات کے مطابق کینیڈا کی سرزمین پرسکھ رہنما کے قتل میں بھارت کےملوث ہونے پر دنیا بھر میں تشویش کی لہر دوڑ گئی اور بین الاقوامی سطح پر بھارت کے خلاف گھیرا تنگ ہونے لگا۔
پانچ اہم ممالک کی انٹیلی جنس ایجنسیاں بھارت کے خلاف ایک پلیٹ فارم پر آگئیں اور سکھ رہنما ہردیپ سنگھ نجرکے قتل کے الزامات کو انتہائی سنجیدہ قرار دے دیا۔
امریکا، برطانیہ، آسٹریلیا اور نیوزی لینڈ نے تحقیقات کا مطالبہ کردیا، کینیڈین حکام کا کہنا ہے امریکا کے ساتھ مل کرمعاملےکی تحیقات کر رہے ہیں، مناسب وقت پر شواہد سامنے لائیں گے۔
امریکی محکمہ خارجہ نے بھارت سے کہا ہے کہ وہ تحقیقات میں تعاون کرے جبکہ آسٹریلوی وزیراعظم نے صورتحال کوتشویشناک قراردیا۔
برطانوی وزیرخارجہ جیمزکلیورلی نے کہا ہردیپ سنگھ کے قاتلوں کو انصاف کا سامنا کرنا پڑے گا۔
ہردیپ سنگھ کے بیٹے نے قتل میں بھارت کے ملوث ہونے کو شرمناک قرار دیتے ہوئے کہا ہے کہ وقت کیساتھ سچ سامنے آہی جاتا ہے۔
کینیڈا اور بھارت کے درمیان سفارتی تناؤ بڑھ گیا ہے، جس کے بعد کینیڈا نے شہریوں کو بھارت سفر کرنے پر احتیاط برتنے کی ہدایت کی ہے، جبکہ کینیڈا کی جانب سے ہند تجارتی مذاکرات پہلے ہی غیرمعینہ مدت تک ملتوی کردیے گئے ہیں۔
