بین الاقوامی مارکیٹ سونے کی قیمتوں میں اضافے کا تسلسل جاری ہے جس کی وجہ سے مقامی صرافہ بازاروں میں سونے کی فی تولہ قیمت تاریخ کی بلند ترین سطح ساڑھے تین لاکھ روپے تک پہنچ گئی۔
اے آروائی نیوز کے مطابق عالمی مارکیٹ میں سونے کی قیمت میں 19 ڈالر کا اضافہ ہوا جس سے فی اونس سونے کی قیمت 3 ہزار 329 ڈالر کی بلند ترین سطح پر پہنچ گئی۔
عالمی منڈی میں سونے کی قیمت میں اضافے کے بعد ملکی سطح پر سونے کی قیمت میں بڑا اضافہ دیکھنے میں آیا۔
آل پاکستان جیمز اینڈ جیولرز ایسوسی ایشن کے مطابق آج سونے کی فی تولہ قیمت میں 2000 روپے کا اضافہ ہوا جس کے بعد سونے کی فی تولہ قیمت 3 لاکھ 50 ہزار روپے کی بلند ترین سطح پر پہنچ گئی۔
اسی طرح 24 قیراط 10 دس گرام سونا پہلی بار 3 لاکھ کی سطح پر پہنچ گیا، دس گرام سونے کی قیمت بھی 1715 روپے اضافے کے بعد 3 لاکھ 68 روپے ہوگئی۔
پاکستان میں گزشتہ روز فی تولہ سونے کی قیمت میں 8 ہزار 600 روپے کا اضافہ ہوا تھا جس سے نئی قیمت 3 لاکھ 48 ہزار روپے کی سطح پر پہنچ گئی تھی۔
پاکستان میں آج ڈالر اور دیگر کرنسیوں کی قیمت
واضح رہے کہ سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔
اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدے ہیں۔
پاکستان میں گزشتہ برس سونے کی قیمت کے تعین کے طریقہ کار میں تبدیلی کی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔
