ARYNews.tv | Urdu – Har Lamha Bakhabar

Tag: بیوی

  • معمولی تکرار پر جھگڑا : بیوی کے شوہر پر چھریوں کے وار

    معمولی تکرار پر جھگڑا : بیوی کے شوہر پر چھریوں کے وار

    کراچی : شہر قائد نے بیوی نے گھریلو جھگڑے کے دوران تیز دھار آلے سے وار کرکے اپنے پینتالیس سالہ شوہر کو زخمی کردیا۔

    تفصیلات کے مطابق کراچی کے علاقے خمیسو گوٹھ میں معمولی تکرار پر بیوی طیش میں آگئی اور تیزدھار آلے سے وار کر کے اپنےپینتالیس سالہ شوہرخالد ولد محمد صالح کو زخمی کردیا۔

    پولیس حکام کا کہنا ہے کہ یہ واقعہ گھریلو جھگڑے کے باعث پیش آیا، زخمی شوہر کو اسپتال منتقل کرکے ضابطہ کارروائی کا آغاز کردیا ہے۔

    یاد رہے گذشتہ ہفتے کراچی میں سفاک بیوی نے شوپر کو قتل کرکے اس کے ٹکڑے کردیئے تھے اور واردات کے بعد آرام سے سو گئی تھی۔

    ، پولیس نے ملزمہ کو گرفتار کرکے مقدمہ درج کرلیا تھا، ایس ایس پی زبیر نذیر شیخ کے مطابق رباب نامی خاتون نے اپنے شوہر شیخ محمد سہیل کی لاش کے ٹکڑے کرکے مختلف کمروں میں پھینک دیئے تھے۔

    ملزمہ دوران گرفتاری اور دوران تفتیش نشے میں مدہوش تھی، اس نے اپنے ابتدائی بیان میں کہا ہے کہ مجھے انصاف نہیں ملا اس لیے میں نے یہ کام کیا۔

  • سعودی عرب: نکاح میں درج شرط سے روگردانی شوہر کو مہنگی پڑ گئی

    سعودی عرب: نکاح میں درج شرط سے روگردانی شوہر کو مہنگی پڑ گئی

    ریاض: نکاح میں درج شرط سے روگردانی شوہر کو مہنگی پڑ گئی، پڑھائی کی اجازت نہ دینے پر بیوی نے ’فسخ نکاح‘ کا دعویٰ دائر کر دیا۔

    تفصیلات کے مطابق سعودی عرب میں شوہر کی وعدہ خلافی کو دیکھتے ہوئے خاتون نے ’فسخ نکاح‘ کا دعویٰ دائر کر دیا، شوہر نے نکاح نامے میں درج شرط پر عمل نہ کرتے ہوئے اہلیہ کو پڑھائی مکمل کرنے سے روکا تھا۔

    سبق نیوز کے مطابق خانگی امور کے وکیل جعفر جمل اللیل نے بتایا کہ مکہ میں ایک خاتون نے اس کے ذریعے اپنے شوہر کے خلاف نکاح ختم کرنے کا دعویٰ دائر کیا ہے۔

    خاتون کا کہنا تھا کہ انھوں نے نکاح کے وقت یہ شرط عائد کی تھی کہ شادی کے بعد شوہر کو پڑھائی مکمل کرنے پر کوئی اعتراض نہ ہوگا، تاہم شوہر نے اہلیہ کو پڑھائی جاری رکھنے سے منع کر دیا۔

    خانگی امور کے وکیل جعفر کا اس حوالے سے کہنا تھا کہ خانگی قانون کے تحت نکاح نامے میں درج کی گئی شرائط پر عمل کرنا ضروری ہے، عمل نہ کرنا وعدہ خلافی کے زمرے میں آتا ہے۔

    وکیل کے مطابق قانونی طور پر فسخ نکاح کا دعویٰ ان صورتوں میں دائر کیا جا سکتا ہے اگر شوہر منشیات کا عادی ہو، طویل عرصے سے غائب ہو، خطرناک نفسیاتی مریض ہو، تشدد کرتا ہو، نان نفقہ ادا نہ کرتا ہو وغیرہ، نیز خلع کے برعکس فسخ نکاح کی بیشتر صورتوں میں معاوضے کا مطالبہ نہیں کیا جا سکتا۔

  • دوسری بیوی نے نام بدل کر شوہر کے خلاف زیادتی کا مقدمہ کر دیا

    دوسری بیوی نے نام بدل کر شوہر کے خلاف زیادتی کا مقدمہ کر دیا

    لاہور: ہائی کورٹ میں ایک شخص کی دوسری بیوی نے اپنا نام بدل کر شوہر کے خلاف زیادتی کا مقدمہ کر دیا۔

    تفصیلات کے مطابق لاہور ہائی کورٹ نے مبینہ بیوی کی مدعیت میں شوہر کے خلاف جنسی زیادتی کے مقدمے پر ٹرائل کورٹ کو حتمی فیصلہ سنانے سے روک دیا ہے۔

    لاہور ہائیکورٹ کے جسٹس سہیل ناصر نے عابد حسین نامی شہری کی درخواست پر سماعت شروع کی تو اُن کے وکیل میاں داؤد نے عدالت کو بتایا کہ درخواست گزار کے خلاف ان کی دوسری بیوی نے لڑائی جھگڑے پر جنسی زیادتی کا مقدمہ درج کرایا ہے جو بے بنیاد اور من گھڑت ہے۔

    وکیل نے بتایا کہ درخواست گزار نے گلناز بی بی سے دوسری شادی کی جو رجسٹرڈ بھی ہے، دوسری شادی میں سے 2 سالہ بیٹی معصومہ زہرہ بھی پیدا ہوئی، تاہم اختلافات پیدا ہونے پر بیوی نے اپنا نام گلناز سے سونیا بدل کر زنا جنسی زیادتی کا مقدمہ درج کرا دیا۔

    درخواست گزار کے مطابق تفتیش اور مدعیہ پر جرح کے دوران بیانات اور ثبوتوں میں واضح تضادات سامنے آئے، لہٰذا یہ عدالت درخواست گزار کے خلاف ٹرائل روکنے کا حکم دے۔

    عدالت نے سماعت کے بعد ٹرائل کورٹ کو مقدمے کا فیصلہ سنانے سے روک دیا، اور فریقین کو نوٹس جاری کر دیے۔

    دوسری جانب مدعیہ کے مطابق اسے 5 سال کی عمر میں داتا دربار سے اٹھا کر ملزم گھر لے آیا تھا، جب وہ 20 سال کی ہوئی تو ملزم اس کی شادی کروانے کے لیے کشمیر جانے کے بہانے اپنے گھر سے لے گیا، اور ایک جگہ قید کر کے زیادتی کرتا رہا جس سے اس کی بیٹی بھی پیدا ہوئی۔

  • واٹس ایپ اسٹیٹس کا معاملہ، بیوی کے فون کے بعد شوہر لا پتا ہو گیا

    واٹس ایپ اسٹیٹس کا معاملہ، بیوی کے فون کے بعد شوہر لا پتا ہو گیا

    حیدرآباد: بھارتی شہر حیدر آباد میں ایک ریلوے ملازم بیوی کے فون کے بعد لا پتا ہو گیا، بیوی نے واٹس ایپ اسٹیٹس پر لگی تصویر میں شوہر کو کسی اور عورت کے ساتھ دیکھ لیا تھا۔

    تفصیلات کے مطابق حیدرآباد کے علاقے پرشانت نگر میں ایک ریلوے ملازم 30 سالہ راکیش نے 18 اپریل کو اپنے موبائل فون پر ایک نوجوان خاتون کے ساتھ لی ہوئی تصویر کو واٹس ایپ اسٹیٹس پر رکھا تھا۔

    تاہم یہ اسٹیٹس ان کی بیوی نے دیکھ لیا، اور شوہر کو اس سلسلے میں فون کر دیا، راکیش نے فون پر بیوی سے کہا کہ وہ جلد گھر پہنچ رہے ہیں، گھر پہنچ کر اس پر بات کریں گے۔

    پولیس رپورٹ کے مطابق مذکورہ شخص اس کے بعد گھر نہیں پہنچا، اور 20 اپریل کے بعد ان کا موبائل فون بھی بند آنے لگا ہے۔

    خاتون نے پولیس اسٹیشن میں جا کر شوہر کی گم شدگی کی رپورٹ درج کرائی، خاتون کا کہنا تھا کہ ان کا شوہر لا پتا ہو گیا ہے، سیل فون بھی بند آ رہا ہے۔

    خاتون نے پولیس کو تفصیل بتاتے ہوئے کہا کہ انھوں نے واٹس ایپ اسٹیٹس پر اپنے شوہر کو ایک تصویر میں کسی اور عورت کے ساتھ دیکھا اور شوہر سے اس سلسلے میں پوچھنے کے لیے فون کیا، انھوں نے کہا کہ گھر پہنچ رہے ہیں لیکن وہ نہیں پہنچے۔

    پولیس نے خاتون کے شوہر کی گم شدگی کی رپورٹ درج کرتے ہوئے تحقیقات شروع کر دی ہے۔

  • بیوی کو قتل کرنے والے شوہر کو سزائے موت سنا دی گئی

    بیوی کو قتل کرنے والے شوہر کو سزائے موت سنا دی گئی

    کراچی: صوبہ سندھ کے دارالحکومت کراچی میں بیوی کو قتل کرنے والے شوہر کو عدالت نے سزائے موت سنا دی، عدالت نے 5 لاکھ روپے دیت کی رقم مقتولہ کے لواحقین کے حوالے کرنے کا حکم بھی دیا ہے۔

    تفصیلات کے مطابق کراچی کی ماڈل کورٹ میں شوہر کے ہاتھوں 55 سالہ بیوی کے قتل کیس کی سماعت ہوئی۔

    ملزم جبار پر اپنی 55 سالہ بیوی کو قتل کرنے کا جرم ثابت ہوگیا جس کے بعد عدالت نے ملزم عبد الجبار کو بیوی کو قتل کرنے پر پھانسی کی سزا سنا دی گئی۔

    عدالت نے ملزم کو اسلحہ رکھنے کے جرم میں 10 سال مزید سزا کا حکم بھی دیا جبکہ ایڈیشنل ڈسٹرکٹ اینڈ سیشن جج کامران عطا سومرو نے ملزم پر 5 لاکھ جرمانہ عائد کیا ہے۔

    عدالت نے حکم دیا ہے کہ 5 لاکھ کی رقم دیت کی صورت میں مقتولہ کے لواحقین کو دی جائے۔

  • کرونا ویکسین لگوانے پر سینئر ڈاکٹر کو بیگم کی سخت ڈانٹ پھٹکار

    کرونا ویکسین لگوانے پر سینئر ڈاکٹر کو بیگم کی سخت ڈانٹ پھٹکار

    نئی دہلی: بھارت میں ایک سینئر ڈاکٹر کو کرونا وائرس کی ویکسین اکیلے لگوانے پر بیگم کی سخت ڈانٹ پھٹکار سننی پڑگئی، بدقسمتی سے وہ اس وقت ٹی وی پر لائیو تھے چنانچہ انہیں پڑنے والی ڈانٹ لاکھوں افراد نے سنی۔

    بھارتی میڈیا کے مطابق کارڈیالوجسٹ ڈاکٹر اے کے اگروال اپنی گاڑی میں موجود تھے اور ایک ٹی وی چینل سے براہ راست گفتگو کر رہے تھے، اس دوران ان کی بیگم کا فون آیا۔

    ان کے فون اٹھاتے ہی بیگم نے پوچھا کہ کیا تم کرونا وائرس کی ویکسین لگوانے گئے تھے؟ ڈاکٹر اگروال نے کہا کہ میں پتہ کرنے گیا تھا انہوں نے کہا کہ (کاؤنٹرز) خالی ہیں لگوا لو، تو میں نے لگوا لی۔

    بیگم نے کہا کہ عجیب ہو تم ساتھ نہیں لے جاسکتے تھے، جس پر ڈاکٹر نے کہا کہ وہ سب کو پیر کی صبح لے جائیں گے۔ لیکن ان کی بیگم اس بات پر غصہ کرتی رہیں کہ وہ انہیں ساتھ لے کر کیوں نہیں گئے۔

    یہ گفتگو ڈاکٹر اگروال کے ٹی وی پر لائیو ہوتے ہوئے ہورہی تھی، ڈاکٹر نے کہا کہ وہ ابھی لائیو ہیں جس پر ان کی بیگم نے کہا کہ میں لائیو میں آکر تمہاری ایسی کی تیسی کرتی ہوں۔

    ڈاکٹر کی اس ویڈیو کو سماجی رابطے کی ویب سائٹ ٹویٹر پر ایک لاکھ سے زائد افراد نے دیکھا اور مختلف تبصرے کیے۔ ایک شخص نے لکھا کہ جب آپ ٹی وی پر لائیو ہوں تو کبھی بھی اپنی بیگم کا فون مت اٹھائیں۔

    ایک شخص نے ڈاکٹر اگروال کی ایک پرانی ویڈیو ٹویٹ کرتے ہوئے بتایا کہ اس سے قبل وہ ٹی وی پر براہ راست گفتگو کرنے کے دوران سر کا مساج بھی کروا چکے ہیں۔

  • دیر سے گھر آنے کے عادی شوہر کو بیوی نے بھیانک سزا دے دی

    دیر سے گھر آنے کے عادی شوہر کو بیوی نے بھیانک سزا دے دی

    نئی دہلی: بھارت میں 35 سالہ خاتون نے دیر سے گھر آنے کے عادی شوہر کو بھیانک سزا دے ڈالی اور کھولتا ہوا تیل اس کے چہرے پر انڈیل دیا۔

    بھارتی میڈیا کے مطابق یہ واقعہ ریاست مدھیہ پردیش میں پیش آیا، شیو کماری اور اروند کی شادی کو 4 سال ہوئے تھے اور شوہر روزانہ اجرت پر مزدور کرتا تھا۔

    شوہر کے دیر سے گھر آنے پر دونوں میاں بیوی میں بحث و تکرار معمولی کی بات تھی، اروند کے بھائی نے پولیس کو بتایا کہ واقعے کے روز بھی دونوں میاں بیوی میں بحث ہوئی لیکن بات بڑھنے سے قبل والدین نے بیچ بچاؤ کروایا اور بات ختم کردی۔

    تاہم شیو کماری غصے میں اندھی ہورہی تھی اور صبح 5 بجے اس نے گرم کھولتا ہوا تیل شوہر کے منہ پر انڈیل دیا۔ اروند کو بندیل کھنڈ میڈیکل اسپتال منتقل کیا گیا جہاں اس کا علاج جاری ہے، اروند کا چہرہ بری طرح جھلس گیا ہے۔

    پولیس نے اروند کے اہلخانہ کے بیانات کی بنیاد پر شیو کماری کے خلاف مقدمہ درج کرلیا ہے، پولیس کے مطابق ملزمہ کو اپنے کیے پر افسوس ہے تاہم اب معاملہ پولیس اور عدالت کے ہاتھ میں ہے۔

  • بیوی کو آگ سے بچاتے ہوئے شوہر نے جان دیدی

    بیوی کو آگ سے بچاتے ہوئے شوہر نے جان دیدی

    ابوظہبی: متحدہ عرب امارات میں بیوی کو آتشزدگی سے بچاتے ہوئے شوہر خود جھلس کر ہلاک ہوگیا۔

    اماراتی میڈیا کے مطابق واقعہ ریاست ام القوین میں پیش آیا جہاں ایک رہائشی عمارت میں آگ لگنے سے میاں بیوی جھلس گئے۔

    مکینوں نے بتایا کہ خاتون اپارٹمنٹ کی راہداری میں موجود تھی کہ اس دوران شارٹ سرکٹ کے باعث آگ بھڑک اٹھی تو چیخ و پکار سن پر کمرے میں موجود شوہر بھاگتا ہوا آیا اور بیوی کو بچاتے ہوئے خود جھلس گیا۔

    دونوں کو زخمی حالت میں مقامی اسپتال منتقل کیا گیا جہاں انہیں ابتدائی طبی امداد دی گئی تاہم شوہر کی حالت تشویشناک ہونے پر ابوظہبی منتقل کیا گیا۔

    man, save, wife, uae, apartment fire, dies, hospital

    32 سالہ انیل کا 90 فیصد جسم جھلس چکا تھا جس کے باعث بچنے کے امکانات انتہائی کم تھے، انیل کئی دن زندگی اور موت کی کشمکش میں مبتلا رہنے کے بعد گزشتہ روز دم توڑ گیا۔

    متاثرہ فیملی کا تعلق بھارتی ریاست کیریلا سے ہے اور ان کا 4 سالہ بچہ بھی ہے، خاتون تاحال اسپتال میں داخل ہے تاہم اس کی حالت خطرے سے باہر ہے۔

  • ’لالچ بری بلا ہے‘ شوہر نے بیوی کو موت کے گھاٹ اتار دیا

    ’لالچ بری بلا ہے‘ شوہر نے بیوی کو موت کے گھاٹ اتار دیا

    واشنگٹن: پیسے کی لالچ اور ہوس انسان کو اندھا کردیتی ہے ایسا ہی کچھ ہوا امریکا میں جہاں شوہر نے لائف انشورنس کی رقم حاصل کرنے کے لیے بیوی کو ہی موت کے گھاٹ اتار دیا۔

    تفصیلات کے مطابق اردو کی مشہور کہاوت ہے کہ ’’لالچ بری بلا ہے‘‘ اس میں کوئی شک نہیں کہ مال ودولت کی لالچ انسان کو غلط راستے کی طرف بھی لے جاتی ہے، امریکی ریاست کیرولینا میں لائف انشورنس کی رقم ہتھیانے کے لیے جوشوا نامی شوہر نے اپنی ہی بیوی کو موت کی نیند سلادیا۔

    غیر ملکی خبررساں ادارے کے مطابق اسٹیسی نامی بیوی کی موت 23 ستمبر 2018 کو ہوئی، جسے ابتدا میں طبعی موت قرار دیا گیا کیوں کہ مذکورہ خاتون دل کے مرض میں بھی مبتلا تھیں، تحقیقات کے بعد حیران کن انکشاف نے شوہر کو بے نقاب کردیا۔

    اسٹیسی کی موت آئی ڈروبس (آنکھوں میں ڈالنے والے قطرے) اور نیزل اسپرے (ناک کے ذریعے پھیپڑوں میں منتقل کرنے والی خاص آکسیجن) سے ہوئی، رپورٹس کے مطابق ان دواؤں کی مقدار 30 سے 40 فیصد بڑھا کر دی گئی جس سے موت واقع ہوئی، بیوی کی موت کے بعد شوہر نے ایٹوپسی(موت کی وجہ سے متعلق تحقیق) کرانے سے بھی انکار کردیا تھا۔

    تاہم اسٹیسی کی ماں کو اپنے داماد پر شک تھا اسی بنیاد پر انہوں نے کیرولینا کی انشورنس کمپنی کو واقعے کی تحقیقات کا کہا اور اسٹیسی کے موجود شدہ خون ٹیسٹ کے بعد حقیقت کھل کر سامنے آگئی اور ملزم پکڑا گیا۔

  • پنشن وصول کرنے کے لیے خاتون نے 11 سال شوہر کی لاش فریزر میں چھپائے رکھی

    پنشن وصول کرنے کے لیے خاتون نے 11 سال شوہر کی لاش فریزر میں چھپائے رکھی

    اوٹاہ: امریکا میں 75 سالہ خاتون 11 سال تک اپنے شوہر کی لاش فریزر میں چھپا کر اس کی پنشن وصول کرتی رہی۔

    امریکی ریاست اوٹاہ میں پولیس کو معمول کے ویلفیئر چیک کے دوران، جس میں اکیلے رہنے والے اور بزرگ افراد سے ان کا حال چال دریافت کیا جاتا ہے، ایک گھر سے 75 سالہ خاتون مردہ حالت میں ملیں۔

    پولیس نے لاش کو سرد خانے بھجوا کر جب گھر کی چیکنگ کی تو ان کی حیرت کی انتہا نہ رہی جب فریزر سے خاتون کے شوہر کی لاش برآمد ہوئی۔ خاتون نے اپنے شوہر کے بارے میں مشہور کر رکھا تھا کہ وہ ناراض ہو کر انہیں چھوڑ کر کہیں چلا گیا ہے۔

    پولیس اس بارے میں تحقیق کر رہی ہے کہ آیا خاتون نے اپنے شوہر کو قتل کیا یا وہ کسی وجہ سے انتقال کر گیا اور خاتون نے اس کی لاش فریزر میں چھپا دی۔

    پولیس کے مطابق خاتون نے یہ حرکت ممکنہ طور پر اپنے شوہر کی پنشن وصول کرنے کے لیے کی۔ 11 سال کے عرصے کے دوران خاتون نے 1 لاکھ 77 ہزار ڈالرز حاصل کیے۔

    پولیس کو گھر سے ایک خط بھی ملا جو شوہر کی جانب سے لکھا گیا تھا اور اس میں درج تھا کہ ’میری موت میں میری بیوی کا کوئی ہاتھ نہیں‘۔ پولیس کا کہنا ہے کہ ممکن ہے خاتون نے خود ہی یہ خط لکھ رکھا ہو۔

    پولیس نے مکان کو سیل کر کے کیس کی تفتیش کا آغاز کردیا ہے۔