Tag: بیٹی

سیاسی بالادستی کیلیے سنگ دل بیٹی نے اپنے شوہر کے ساتھ مل کر باپ اور سینئر کانگریس رہنما کو قتل کر دیا۔

زن، زر اور زمین کے لیے خون سفید ہوتے اور رشتہ داروں کا ایک دوسرے کا خون بہاتے تو سنا اور پڑھا تھا تاہم پہلی بار سیاسی بالادستی کے لیے ایک شقی القلب بیٹی نے اپنے شوہر کے ساتھ مل کر باپ کو ہی قتل کر دیا۔

قتل کا یہ افسوسناک واقعہ بھارتی ریاست تلنگانہ کے سوریاپٹ ضلع میں پیش آیا جہاں سیاسی بالادستی کی لڑائی میں بیٹی نے اپنے باپ کا ہی خون بہا دیا۔

بھارتی میڈیا کے مطابق میریل گاؤں میں کانگریس کے سینئر لیڈر اور ساق سرپنچ چکریا گوڑ کو بے دردی سے قتل کر دیا اور جب تحقیقات کی گئیں تو اس قتل کے پیچھے مقتول کی بیٹی اور داماد کا ہاتھ سامنے آیا۔

رپورٹ کے مطابق قتل کی واردات 17 مارچ کو ہوئی۔ پولیس نے تحقیقات کے بعد چکریا گوڑ کی بیٹی، داماد سمیت 13 افراد کو گرفتار کرلیا ہے۔

پولیس کی ابتدائی رپورٹ میں کہا گیا ہے کہ چکریا گوڑ کو گاؤں میں سیاسی اثر ورسوخ کے حصول کے لیے قتل کیا گیا۔ مقتول کے داماد نے ہی اپنے سسر کو اپنے سیاسی حریف کے طور پر دیکھنا شروع کر دیا تھا اور باقاعدہ منصوبہ بند سازش کے تحت یہ واردات انجام دی گئی۔

گاؤں میں بڑھتے ہوئے اختلافات کے نتیجے میں اس نے اپنی اہلیہ (چکریا گوڑ کی بیٹی) اور دیگر ساتھیوں کے ساتھ مل کر ان کے قتل کی منصوبہ بندی کی۔

مقتول چکریا گوڑ گزشتہ 30 سالوں سے گاؤں کی سیاست میں سرگرم تھے۔ وہ سرپنچ اور کوآپریٹیو سوسائٹی کے چیئرمین جیسے اہم عہدوں پر فائز رہ چکے تھے۔

بڑی بہن سے ماں کا زیادہ پیار چھوٹی کو برداشت نہ ہوا اور طیش میں آ کر اس نے اپنی ہی والدہ کو بے دردی سے قتل کر ڈالا۔

حسد زندگی میں زہر بھر دیتا ہے اور بعض اوقات تو یہ انسانی رشتوں کی پامالی کا سبب بھی بن جاتا ہے۔ ایسے ہی ایک افسوسناک واقعہ میں چھوٹی بیٹی کو اپنی ماں کو صرف اس بات پر بے دردی سے قتل کر کے اپنی جنت اجاڑ ڈالی کہ اس کی والدہ بڑی بہن سے زیادہ پیار کرتی تھی۔

بھارتی میڈیا کے مطابق یہ دلخراش واقعہ ممبئی کے علاقے قریشی نگر میں پیش آیا جہاں 62 سالہ صابرہ بانو اپنی چھوٹی بیٹی سے ملنے اس کے گھر گئیں تو ناہنجار بیٹی نے ماں کا استقبال کرنے کے بجائے چھرا گھونپ کر ماں کو قتل کر دیا۔

ملزمہ جس کی شناخت 41 سالہ ریشماں مظفر قاضی کے نام سے ہوئی نے بعد ازاں خود ہی تھانہ چونا بھٹی پہنچ کر گرفتاری پیش کر دی اور ماں کو قتل کرنے کے جرم کا اعتراف کیا۔

پولیس اہلکاروں نے فوری طور پر جائے وقوعہ کا دورہ کیا جہاں صابرہ خاتون مردہ حالت میں پائی گئیں۔ پولیس نے تصدیق کے بعد ریشماں کو تحویل میں لے اس کے خلاف تفتیش کا آغاز کر دیا ہے۔

پولیس کا کہنا ہے کہ صابرہ بانو اپنے بیٹے اصغر شیخ کے ہمراہ ممبرا کے علاقے میں رہتی تھیں اور جمعرات کے روز اپنی بیٹی سے ملنے قریشی نگر گئی تھیں۔

پولیس کے مطابق قتل کی وجہ حسد بنا ہے، کیونکہ ملزمہ ریشماں کا خیال تھا کہ اس کی والدہ بڑی بیٹی سے زیادہ پیار کرتی ہیں اور اس معاملے پر ان دونوں کے درمیان دیرینہ ناراضگی بھی چل رہی تھی۔ جس دن والدہ ملاقات کے لیے آئیں تو ماں بیٹی میں اسی معاملے پر تکرار ہوئی اور اس کے بعد بیٹی نے ماں کے پیٹ میں چھرا گھونپ دیا۔

پولیس نے ملزمہ ریشماں کی ذہنی صحت کا اندازہ لگانے کے لیے خاندان کے افراد اور پڑوسیوں کے بیانات ریکارڈ کرنا شروع کر دیے ہیں۔