ARYNews.tv | Urdu – Har Lamha Bakhabar

Tag: بی آئی ایس پی

  • بی آئی ایس پی کے ساڑھے 14 ہزار روپے حاصل کرنے کا طریقہ

    بی آئی ایس پی کے ساڑھے 14 ہزار روپے حاصل کرنے کا طریقہ

    اسلام آباد (28 اگست 2025) بینظیر انکم سپورٹ پروگرام (بی آئی ایس پی) کے تحت ملک بھر کی مستحق خواتین اور خاندانوں کے لیے اگست 2025 کی قسط جاری کرنے کا اعلان کردیا ہے۔

    بے نظیر انکم سپورٹ پروگرام کے تحت پاکستان بھر میں مستحق خاندانوں کو باقاعدگی کے ساتھ ماہانہ مالی امداد فراہم کی جاتی ہے۔

    اگست 2025 کی تازہ ترین اپ ڈیٹ کے مطابق اس بار بی آئی ایس پی کیلیے اہل خواتین کو ساڑھے 14 ہزار روپے کی قسط فراہم کی جائے گی۔

    موصول رقم کیسے چیک کی جائے؟

    حکومت نے مستحقین کیلیے ادائیگی کی جانچ پڑتال کا عمل نہایت آسان بنا دیا ہے، جس کے مطابق درج ذیل طریقہ استعمال کیا جاسکتا ہے۔

    اپنے موبائل فون میں ایس ایم ایس ایپ کھولیں۔ قومی شناختی کارڈ (سی این آئی سی ) نمبر بغیر ڈیش کے ٹائپ کریں اور اسے 8171 پر بھیج دیں۔

    کچھ ہی دیر بعد بی آئی ایس پی کیلیے آپ کے اہل یا نااہل ہونے کا پیغام اور ادائیگی کی تفصیل موصول ہوجائے گی۔

    یہ طریقہ کار شفافیت کو یقینی بناتا ہے اور خاندانوں کو ادائیگی کیلیے مراکز جانے سے پہلے اپنی اہلیت جانچنے میں سہولت کبھی فراہم کرتا ہے۔

    اعلان شدہ رقم: 14,500 روپے

    بینظیر انکم سپورٹ پروگرام کے تحت اہل خاندانوں کو اعلان شدہ ساڑھے 14 ہزار روپے کی ادائیگی مرحلہ وار کی جا رہی ہے۔

    ساتھ ہی یہ ہدایت بھی دی گئی ہے کہ پہلے سے رجسٹرڈ افراد اپنی بائیومیٹرک تصدیق ضرور کرائیں تاکہ کسی تاخیر سے بچا جاسکے۔

    قسطوں کی وصولی

    حکام کے مطابق تین قسطوں کی فوری وصولی کے لیے اہل افراد اپنی بائیو میٹرک تصدیق کروائیں جس کے بعد یہ رقوم انہیں فراہم کردی جائیں گی۔

    اس تمام اقدام کا مقصد مالی امداد کو بغیر کسی غیر ضروری تاخیر کے مستحق خاندانوں تک پہنچانا ہے۔

    نااہلی کی وجوہات

    بینظیر انکم سپورٹ پروگرام میں کئی درخواست گزاروں کو نااہل قرار دیا جا چکا ہے جس کی بنیادی وجوہات درج ذیل ہیں۔

    رجسٹریشن کے دوران غلط شناختی کارڈ کی تفصیلات دینا۔ آمدنی کا پروگرام کے معیار سے زیادہ ہونا۔ بائیومیٹرک تصدیق مکمل نہ کرنا۔ رجسٹریشن اپ ڈیٹ نہ کرنا یا نظام میں ڈپلیکیٹ درخواستیں ہونا شامل ہیں

    ان افراد کو ہدایت کی گئی ہے کہ وہ دوبارہ 8171 کے ذریعے اپنی تفصیلات چیک کریں یا قریبی بی آئی ایس پی دفتر سے رجوع کریں۔

    BISP

  • بی آئی ایس پی کے نام پر فراڈ کرنے والے 3 ملزمان گرفتار

    بی آئی ایس پی کے نام پر فراڈ کرنے والے 3 ملزمان گرفتار

    کراچی: ابرہیم حیدری پولیس نے کارروائی کرتے ہوئے بی آئی ایس پی کے نام پر فراڈ کرنے والے 3 ملزمان کو گرفتار کرلیا ہے۔

    پولیس نے بتایا کہ ملزمان موبائل ایسسریز کا کام کرتے تھے، ملزمان خود کو نمائندہ ظاہر کرکے شہریوں سے شناختی کارڈ حاصل کرتے تھے، ملزمان شناختی کارڈ سے امدادی رقم نکالتے اور ہزاروں روپے کٹوتی کرتے تھے۔

    بی آئی ایس پی فراڈ کے حوالے سے پولیس نے بتایا کہ ملزمان روزانہ کی بنیاد پر 50 سے زائد شناختی کارڈز کا اندراج کرتے تھے۔

    ملزمان سے متعدد شہریوں کے اصل شناختی کارڈز برآمد کرلیے گئے ہیں، اسی کے ساتھ ملزمان سے 3 موبائل فونز اور ایک ڈیوائس برآمد کی گئی ہے۔

    خیال رہے کہ اسلام آباد میں بھی سائبر فراڈ اور ڈیجیٹل منی لانڈرنگ میں ملوث نیٹ ورک بے نقاب ہوگیا، آپریشن گرے کے دوران 93 افراد کو گرفتار کرکے 12کال سنٹرز کو سیل کردیا گیا۔

    نیشنل سائبر کرائم انویسٹی گیشن ایجنسی نے (آپریشن گرے) کے نام سے ملک بھر میں غیر قانونی کال سنٹرز کے خلاف کارروائیاں عمل میں لائیں۔

    کارروائیوں کے دوران غیر ملکیوں کو بھی گرفتار کیا گیا، مختلف کال سینٹر مالیاتی فراڈ میں ملوث تھے، رقوم بیرون ملک بھجوائی جاتی تھی۔

    https://urdu.arynews.tv/cyber-crime-agency-arrests-17-suspects-involved-in-fraud-from-karachi/

  • بینظیر انکم سپورٹ پروگرام کے حوالے سے عوام کے لیے خوشخبری

    بینظیر انکم سپورٹ پروگرام کے حوالے سے عوام کے لیے خوشخبری

    اسلام آباد: حکومت نے بینظیر انکم سپورٹ پروگرام کا دائرہ کار بڑھانے کا فیصلہ کیا ہے، اس ضمن میں بی آئی ایس پی ہولڈرز کی تعداد ایک کروڑ تک لے جانے کا ہدف مقرر کیا گیا ہے۔

    ذرائع بی آئی ایس پی کے مطابق بی آئی ایس پی کارڈ ہولڈرز کی موجودہ تعداد 92 لاکھ کے قریب ہے، اب مزید 8 لاکھ افراد کو بینظیر انکم سپورٹ پروگرام میں شامل کیا جائے گا۔

    ذرائع کا کہنا ہے کہ اس سلسلے میں چاروں صوبوں کے مخصوص اضلاع میں ڈائنامک سروے جاری ہے، دور دراز علاقوں میں دفاتر قائم کیے جا رہے ہیں، اس ڈائنامک سروے میں بلوچستان کے لوگوں کو خصوصی رعایت مل رہی ہے۔

    ڈائنامک سروے کے ذریعے مزید لوگ بی آئی ایس پی میں شامل کیے جائیں گے، سروے میں مستحق خواتین اور ان کے بچوں کی رجسٹریشن جاری ہے، سندھ، بلوچستان کے دور دراز ایریاز میں موبائل رجسٹریشن وہیکلز بھجوائی گئی ہیں۔

  • پنجاب اور کے پی میں بی آئی ایس پی قسط کی ادائیگی شروع، شدید گرمی میں خواتین بے ہوش، لاٹھی چارج

    پنجاب اور کے پی میں بی آئی ایس پی قسط کی ادائیگی شروع، شدید گرمی میں خواتین بے ہوش، لاٹھی چارج

    چارسدہ/جھنگ: پنجاب اور خیبر پختون خوا میں بے نظیر انکم سپورٹ پروگرام (بی آئی ایس پی) کی قسط کی ادائیگی شروع ہو گئی، تاہم شدید گرمی میں عدم سہولیات کی وجہ سے خواتین رُل گئی ہیں، چارسدہ میں مصیبت زدہ خواتین پر پولیس نے لاٹھی چارج بھی کر دیا۔

    تفصیلات کے مطابق کے پی کے شہر چارسدہ میں بینک کا سسٹم بند ہونے سے بی آئی ایس پی کی امدادی رقوم وصولی کے لیے آنے والی خواتین رُل گئیں، شدید گرمی اور پینے کے پانی کی عدم دستیابی کی وجہ سے خواتین مشکلات کا شکار رہیں۔

    بابڑہ ہائی اسکول پر خواتین کو منتشر کرنے کے لیے بے رحم اور بے حس پولیس اہل کاروں نے لاٹھی چارج بھی کیا، جس پر ڈی پی او چارسدہ نے نوٹس لیتے ہوئے 2 پولیس اہل کاروں کو معطل کر دیا ہے۔

    ادھر پنجاب کے شہر جھنگ میں بینظیر انکم سپورٹ پروگرام میں رجسٹرڈ ایک لاکھ 90 ہزار سے زائد خواتین کو قسط کی ادائیگی کا سلسلہ شروع ہو گیا ہے، تاہم خواتین کے لیے قائم کیمپوں میں شدید گرمی اور بنیادی سہولیات نہ ہونے سے خواتین شدید مشکلات کا شکار ہیں، اور پہلے ہی روز 3 خواتین بے ہوش ہو گئیں۔

    خواتین کا کہنا ہے کہ کیمپوں میں پینے کا پانی تک نہیں ہے اور انھیں سارا سارا دن شدید گرمی میں دھکے کھانے پڑتے ہیں، خواتین نے مطالبہ کیا ہے کہ شاپس کا پرانا سسٹم بحال کیا جائے تاکہ وہ با عزت طریقے سے بینظیر انکم سپورٹ کی قسط وصول کر سکیں۔

  • ماضی میں بی آئی ایس پی کے 19 ارب روپے سرکاری ملازمین میں تقسیم کرنے کا انکشاف

    ماضی میں بی آئی ایس پی کے 19 ارب روپے سرکاری ملازمین میں تقسیم کرنے کا انکشاف

    اسلام آباد: پی اے سی کے اجلاس میں ماضی میں بی آئی ایس پی کے 19 ارب روپے سرکاری ملازمین میں تقسیم کرنے کا انکشاف ہوا۔

    تفصیلات کے مطابق پی اے سی کا نور عالم خان کی زیر صدارت اجلاس ہوا ، جس میں ماضی میں بی آئی ایس پی کے 19 ارب روپے سرکاری ملازمین میں تقسیم کرنے کا انکشاف سامنے آیا۔

    آڈٹ حکام نے بتایا کہ ایک لاکھ 43 ہزار افراد میں غیر قانونی طور پر رقوم تقسیم کی گئیں،گریڈ 17 اور اس سے اوپر کے 2500 افسران بھی رقوم بٹورتے رہے۔

    پی اے سی کو بریفنگ میں بتایا گیا کہ سرکاری ملازمین کئی سال تک رقوم وصول کرتے رہے، سال2011 سے غیر اہل افراد کو رقوم کی ترسیل کا سلسلہ شروع ہوا جبکہ سال 2019 میں پالیسی بننے کے بعد غیر مستحق رقوم کی فراہمی کا سلسلہ بند ہوا، بریفنگ

    قانون کے مطابق بی آئی ایس پی سمیت سرکاری ملازمین کیش امداد کے مستحق نہیں۔

    جس پر پی اے سی نے سرکاری ملازمین سے ریکوری اور انکوائری کی ہدایت کر دی، بریفنگ میں بتایا کہ گریڈ17اور اوپر کے افسران کے کیس انکوائری کیلئے پہلے ہی ایف آئی اے کے پاس ہیں۔

    پی اے سی نے بی آئی ایس پی کی ٹیم کی بریفنگ پر اظہار عدم اطمینان کرتے ہوئے وزیراعظم اور متعلقہ وفاقی وزیر کو خط لکھنے کا فیصلہ کیا۔

    نور عالم خان نے بی آئی ایس پی کے ڈی جی کیش کی سخت سرزنش کی اور غیرسنجیدہ رویے پر پی اے سی اجلاس سے نکل جانے کی ہدایت کردی۔

  • نئے سال سے یوٹیلیٹی اسٹورز پر صرف بی آئی ایس پی کے رجسٹرڈ صارفین کو سستی اشیا ملیں گی

    نئے سال سے یوٹیلیٹی اسٹورز پر صرف بی آئی ایس پی کے رجسٹرڈ صارفین کو سستی اشیا ملیں گی

    اسلام آباد: حکومت کی جانب سے نئے سال سے مہنگائی کا نیا تحفہ مل گیا، یوٹیلیٹی اسٹورز پر اب صرف بے نظیر انکم سپورٹ پروگرام کے رجسٹرڈ صارفین کو سستی اشیا ملیں گی۔

    تفصیلات کے مطابق حکومت نے یوٹیلیٹی اسٹورز پر سب کو یکساں سبسڈی کی فراہمی ختم کرنے کا فیصلہ کیا ہے، یکم جنوری 2023 سے یوٹیلیٹی اسٹورز پر صرف ٹارگٹڈ سبسڈی دی جائے گی۔

    ذرائع یوٹیلیٹی اسٹورز کے مطابق وفاقی کابینہ نے ٹارگٹڈ سبسڈی دینے کی منظوری دے دی، سبسڈائزڈ اشیا صرف بے نظیر انکم سپورٹ پروگرام کے تحت ملیں گی، یوٹیلیٹی اسٹورز پر عام افراد کے لیے گھی، آٹا، چینی کی قیمتیں بڑھا دی گئیں، نئی قیمتوں کا اطلاق یکم جنوری سے ہوگا۔

    یوٹیلیٹی اسٹورز کے حکام کے مطابق بی آئی ایس پی کے تحت رجسٹرڈ افراد کے لیے چینی 70 روپے فی کلو دستیاب ہوگی، 10 کلو آٹے کا تھیلا 400 روپے، گھی 300 روپے فی کلو ہوگا۔

    عام شہریوں کے لیے یوٹیلیٹی اسٹورز پر گھی 75 روپے مہنگا ہوگا اور 375 روپے فی کلو دستیاب ہوگا، چینی 19 روپے مہنگی ہوگی اور 89 روپے فی کلو دستیاب ہوگی، 10 کلو آٹے کا تھیلا 248 روپے مہنگا ہوگا، اور 648 روپے کا ہوگا۔

    یوٹیلٹی اسٹورز پر چینی کی ماہانہ خریداری کی حد 5 سے کم کر کے 3 کلو مقرر کر دیا گیا، گھی کی ماہانہ خریداری کی حد 5 سے کم کر کے 3 کلو مقرر کیا گیا ہے، اسی طرح آٹے کی ماہانہ خریداری کی حد بھی 40 سے کم کر کے 20 کلو مقرر کر دیا گیا ہے۔

    بی آئی ایس پی میں رجسٹرڈ صارفین کے لیے سامان خریداری کی موجودہ حد برقرار رہے گی، اور ماہانہ 40 کلو تک آٹا خرید سکیں گے، جب کہ چینی اور گھی ماہانہ 5،5 کلو تک خرید سکیں گے۔

  • احساس، بی آئی ایس پی سینٹرز کے باہر سیاسی سرگرمیوں پر پابندی عائد

    احساس، بی آئی ایس پی سینٹرز کے باہر سیاسی سرگرمیوں پر پابندی عائد

    کراچی: احساس اور بے نظیر انکم سپورٹ پروگرام کے سینٹرز سے متعلق سندھ پولیس نے ہدایت جاری کی ہے کہ ان مقامات پر سیاسی سرگرمیاں نہ کرنے دیا جائے۔

    اے آر وائی نیوز کے مطابق کراچی میں سندھ پولیس نے احساس اور بی آئی ایس پی کے مراکز کے باہر مختلف جماعتوں کی سرگرمیوں پر پابندی عائد کر دی ہے، اس سلسلے میں آئی جی سندھ مشتاق احمد مہر نے صوبے بھر کے آپریشنل ڈی آئی جیز اور ایس ایس پیز کو خط لکھ کر مطلع کر دیا ہے۔

    خط میں ہدایت کی گئی ہے کہ ان سینٹرز کے اطرف کسی جماعت کو جھنڈا لگانے کی اجازت نہیں ہے، کوئی بھی تنظیم کسی فرد کی تصویر نہ لگائے اور اس پابندی پر عمل درآمد یقینی بنایا جائے۔

    احساس پروگرام: 5 دن کے دوران مستحقین میں28.5ارب تقسیم کیےگئے،اسد عمر

    خط میں یہ بھی کہا گیا ہے کہ اس پابندی کا مقصد کسی بھی ناخوش گوار واقعے سے بچنا ہے، اس لیے متعلقہ ڈی ایس پیز ہر سینٹر پر اپنی موجودگی یقینی بنائے، اور ضلعی ایس ایس پیز ان مراکز پر سوشل ڈسٹینسنگ کے ضابطے پر عمل درآمد کو بھی یقینی بنائیں۔

    خیال رہے کہ احساس ایمرجنسی کیش پروگرام کے ذریعے رقوم کی تقسیم کا سلسلہ جاری ہے، گزشتہ 5 دن کے دوران مستحقین میں 28.5 ارب تقسیم کیے جا چکے ہیں جب کہ اس دوران 23 لاکھ سے زائد مستحقین میں رقم تقسیم کی گئی ہے۔

  • بی آئی ایس پی سے مستفید ہونے والے سرکاری ملازمین کے خلاف قانونی چارہ جوئی کا عندیہ

    بی آئی ایس پی سے مستفید ہونے والے سرکاری ملازمین کے خلاف قانونی چارہ جوئی کا عندیہ

    اسلام آباد: بے نظیر انکم سپورٹ پروگرام سے مستفید ہونے والے سرکاری ملازمین کے خلاف قانونی چارہ جوئی کا عندیہ دے دیا گیا۔

    تفصیلات کے مطابق ذرایع نے کہا ہے کہ بی آئی ایس پی سے مستفید ہونے والے غیر مستحق سرکاری ملازمین کے خلاف قانونی چارہ جوئی کی جائے گی۔

    سماجی تحفظ اور غربت کے خاتمے کے بارے میں وزیر اعظم کی معاون خصوصی ڈاکٹر ثانیہ نشتر نے اس حوالے سے ایک انٹرویو میں کہا کہ متعلقہ سرکاری ملازمین کی تفصیلات ان کے شعبوں کو بھجوائی جائیں گی تاکہ ان کے خلاف قانونی چارہ جوئی کی جا سکے۔

    ثانیہ نشتر کا کہنا تھا کہ بے نظیر انکم سپورٹ پروگرام کو مزید شفاف بنایا جائے گا، حکومت نے خصوصی مہم میں ایسے 14 ہزار 730 سرکاری ملازمین کی شناخت کر لی ہے، مجموعی طور پر 8 لاکھ 20 ہزار 165 غیر مستحق خواتین کی شناخت ہو چکی ہے۔

    یہ بھی پڑھیں:  بے نظیر انکم سپورٹ پروگرام سے 8 لاکھ سے زائد افراد کو نکالنے کا فیصلہ

    دو دن قبل ڈاکٹر ثانیہ نشتر نے پریس کانفرنس میں کہا تھا کہ 10 سال قبل سروے کے ذریعے مستحقین کا تعین کیا گیا تھا، 10 سال میں لوگوں کے حالات بدل جاتے ہیں، حکومت نے فیصلہ کیا کہ پروگرام سرکاری ملازمین کے لیے نہیں ہے، اس لیے 8 لاکھ سے زاید خواتین کو نکالنے کا فیصلہ کیا گیا، یہ اقدام مستحق افراد تک مالی امداد پہنچانے کے لیے اٹھایا گیا۔

    ان کا کہنا تھا کہ غیر مستحق افراد کو 2011 سے ادائیگیاں کی جا رہی تھیں، ایسا شخص جس کے نام پر گاڑی ہو، پی ٹی سی ایل یا موبائل کا بل ایک ہزار سے زائد ہو، ایسے افراد اہل نہیں ہیں۔

  • احساس پروگرام ریاست مدینہ کے اصولوں کو مد نظر رکھ کر تشکیل دیا گیا: ڈاکٹر ثانیہ نشتر

    احساس پروگرام ریاست مدینہ کے اصولوں کو مد نظر رکھ کر تشکیل دیا گیا: ڈاکٹر ثانیہ نشتر

    اسلام آباد: وزیر اعظم کی معاون خصوصی برائے سماجی بہبود و غربت مٹاؤ مہم ڈاکٹر ثانیہ نشتر نے کہا ہے کہ احساس پروگرام ریاستِ مدینہ کے اصولوں کو مدِ نظر رکھ کر تشکیل دیا گیا ہے۔

    پریس کانفرنس سے خطاب کرتے ہوئے احساس پروگرام کی سربراہ ثانیہ نشتر نے کہا کہ یہ پروگرام پس ماندہ علاقوں کی ترقی کے لیے ایک اہم پروگرام ہے، جو بیواؤں، یتیموں، بے گھر افراد اور غریب طلبہ کے لیے لایا گیا ہے۔

    ڈاکٹر ثانیہ کا کہنا تھا کہ ایسی پالیسیاں لائی جا رہی ہیں کہ حکومت چھوٹی سطح پر ٹھیکے دے، ہماری کوشش ہوگی کہ اس سلسلے میں سیاسی تقرریوں سے بچا جائے، حساس پروگرام کا وقت کے ساتھ دائرہ بڑھایا جائے گا، ٹاؤن اور مارکیٹ کمیٹیوں میں سیاسی تقرریوں سے گریز کیا جائے گا، سماجی تحفظ کے بجٹ کو مسائل کے با وجود دگنا کریں گے۔

    ثانیہ نشتر نے کہا کہ سماجی تحفظ کے ادارے پہلے بکھرے ہوئے تھے، اب یہ ایک ڈویژن سے منسلک کر دیے گئے ہیں، اس اقدام سے سماجی تحفظ کے لیے ون ونڈو آپریشن کے پروگرام میں آسانی ہوگی۔

    انھوں نے کہا کہ حکومت کی کوشش ہے جو بھی ضرورت مند ہو اس کو ایک ہی جگہ جانا پڑے، مستحقین کی نشان دہی کے لیے ملک گیر سروے بھی جاری ہے، آیندہ سال تک سروے کے نتائج سامنے آ جائیں گے۔

    یہ بھی پڑھیں:  ڈاکٹر ثانیہ نشتر وزیراعظم کی معاون خصوصی مقرر

    بے نظیر انکم سپورٹ پروگرام کی چیئر پرسن ڈاکٹر ثانیہ نشتر کا کہنا تھا کہ بی آئی ایس پی کے جعلی میسجز بھیجنے والوں کے خلاف بھی کریک ڈاؤن کیا جا رہا ہے، مستحق افراد کے بینک اکاؤنٹ کھلنے کا سلسلہ اسی سال شروع ہو جائے گا۔

    انھوں نے بتایا کہ تحفظ پروگرام ان لوگوں کے لیے ہے جن پر اچانک کوئی آفت آ جائے، اس میں آسمانی آفت، بیماری اور کوئی مقدمہ بھی ہو سکتا ہے، تحفظ پروگرام میں مستحقین کو48 گھنٹے میں مدد فراہم کی جائے گی، معذروں کو وہیل چیئر اور دیگر آلات فراہم کیے جائیں گے۔

    ثانیہ نشتر نے کہا کہ سماجی تحفظ میں غریب اور بزرگ افراد کو حصہ بنایا گیا ہے، محنت کشوں کی فلاح کی بہت سی پالیسیاں احساس پروگرام کا حصہ ہیں، محنت کشوں کو بیرون ملک جانے سے پہلے ان کے حقوق سے آگاہ کیا جائے گا، وزیر اعظم کی ہدایت ہے باہر جانے والے محنت کشوں کی بائیو میٹرک تصدیق کی جائے۔

  • بے نظیر انکم سپورٹ پروگرام پورے ملک میں انقلاب لے کر آیا: بلاول بھٹو

    بے نظیر انکم سپورٹ پروگرام پورے ملک میں انقلاب لے کر آیا: بلاول بھٹو

    لاڑکانہ: پاکستان پیپلز پارٹی کے چیئرمین بلاول بھٹو زرداری نے کہا ہے کہ بے نظیر انکم سپورٹ پروگرام سندھ حکومت کا نہیں پورے پاکستان کا تھا، یہ پروگرام پورے ملک میں انقلاب لے کر آیا۔

    نو ڈیرو ہاؤس میں تقریب سے خطاب کرتے ہوئے بلاول بھٹو نے کہا کہ شہید بی بی کا نام ایئر پورٹ سے تو مٹا دیا اب اس پروگرام سے مٹانا چاہتے ہیں، شہید بے نظیر بھٹو نے سکھایا کہ پورے ملک کی خدمت کرنی ہے، وسیلہ روزگار جیسے پروگرام صرف پی پی پی شروع کر سکتی ہے۔

    چیئرمین پیپلز پارٹی نے کہا کہ ہم دعا کریں گے پی ٹی آئی کو عوام کی بھلائی کے پروگرام شروع کرنے کی توفیق ہو، عوامی خدمت کے تمام منصوبے پیپلز پارٹی نے ہی شروع کیے۔

    انھوں نے مزید کہا کہ سندھ کے مسائل کا حل کسی فرد واحد کے پاس نہیں، سندھ میں غربت کے خاتمے کے لیے خواتین کو بلا سود قرضے دیں گے، خواتین کو گھر بنانے کے لیے بھی قرضے دیے جائیں گے، خواتین کی ہر میدان عمل میں آنے کی حمایت کرتے ہیں۔

    یہ بھی پڑھیں:  منظور وسان کی وزیر اعظم عمران خان سے متعلق حیران کن پیش گوئی

    بلاول بھٹو نے کہا کہ پتا نہیں کیوں وزیر اعظم میرا نام لے لے کر تنقید کر رہے ہیں، خان صاحب تو خود نوجوانوں کو سیاست میں آنے کی دعوت دیتے ہیں، میرے سیاست میں آنے سے انھیں کوئی خطرہ نہیں ہونا چاہیے۔

    پی پی چیئرمین کا کہنا تھا کہ ڈپٹی وزیر اعظم شاہ محمود اور ڈپٹی وزیر اعظم جہانگیر ترین آپس میں لڑ رہے ہیں، ان کو ملک اور غریب کا احساس نہیں۔