بھارتی فلمی صنعت میں بلدیو راج چوپڑا کو ایک ستون مانا جاتا ہے۔ ہمہ جہت بلدیو راج نے عام روش سے ہٹ کر فلمیں بنائیں جنھیں سنیما بینوں نے بہت پسند کیا۔ فلم ساز اور ہدایت بلدیو راج 2008ء میں آج ہی کے دن چل بسے تھے۔ ان کی عمر 94 برس تھی۔
بی آر چوپڑا 1914ء میں لدھیانہ میں پیدا ہوئے تھے۔ ان کا بچپن اور جوانی لاہور میں گزری۔ ابتدائی تعلیم حاصل کرنے کے بعد انھوں نے لاہور یونیورسٹی سے انگریزی لٹریچر میں ایم اے کیا۔ تقسیمِ ہند کے بعد بی آر چوپڑا بھارت چلے گئے تھے جہاں دہلی میں قیام کے بعد ممبئی منتقل ہوئے۔
بی آر چوپڑا کو شروع ہی سے ادب کا شوق تھا۔ وقت کے ساتھ ان کی فنونِ لطیفہ میں دل چسپی بڑھ گئی اور فلم ان کا خاص موضوع بنی۔ اس زمانے میں انگریزی لٹریچر پڑھنے کے ساتھ وہ انگریزی ماہ نامے میں فلموں پر تبصرے لکھنے لگے اور اس طرح صحافت کا آغاز کیا۔ ادب کی تعلیم نے انھیں تخلیقی شعور دیا تھا اور بی آر چوپڑا نے فلموں کا تنقیدی جائزہ لینا شروع کردیا۔ وہ اس زمانے میں بننے والی فلموں اور ان کے اسکرپٹ کی کم زوریوں اور خامیوں پر تبصرہ کرنے لگے جس نے انھیں فلمی نقّاد کے طور پر شہرت دی۔ ان کی یہ قابلیت اور تنقیدی بصیرت ممبئی اُس وقت خود اُن کے کام آئی جب بی آر چوپڑا نے بھی فلم سازی اور ہدایت کاری کا آغاز کیا۔
دیکھا جائے تو فلم نگری سے ان کا تعلق ایک فلمی صحافی کے طور پر بنا تھا، لیکن 1955ء میں انھوں نے بی آر فلمز کے نام سے باقاعدہ فلم کمپنی قائم کر لی تھی۔ اس سے قبل وہ دو فلمیں بنا چکے تھے۔ بی آر چوپڑہ تخلیقی ذہن کے مالک اور محنتی ہی نہیں تھے بلکہ انفرادیت کے قائل بھی تھے۔ انھوں نے اس زمانے میں بھی عام ڈگر سے ہٹ کر کام کیا۔ ان کی روایت شکنی اور انفرادیت نے انھیں باکمال فلم ساز بنا دیا۔ بی آر چوپڑا نے فلم انڈسٹری کے تقریباً ہر شعبہ میں طبع آزمائی کی۔ فلمیں بنانا، ہدایت کاری، فلمی کہانیاں لکھنا اور اداکاری بھی کی۔
1949ء میں بی آر چوپڑا نے ’کروٹ‘ سے فلم سازی کا آغاز کیا تھا جو فلاپ فلم ثابت ہوئی۔ 1951ء میں ان کی بطور ہدایت کار فلم ’افسانہ‘ سامنے آئی اور یہ ان کی پہلی کام یاب فلم بھی تھی۔ جب انھوں نے بی آر فلمز قائم کیا تو اس کی سب سے پہلی فلم ’نیا دور‘ تھی۔ فلم بینوں نے اسے بہت سراہا اور اس فلم نے کام یابی کا ریکارڈ قائم کیا۔ ان کی زیادہ تر فلموں میں سماج کے لیے کوئی پیغام ہوتا تھا۔ انھوں نے ’باغبان اور بابل‘ جیسی فلموں کی کہانی بھی لکھی۔ ان کی فلم ’نیا دور‘ کا موضوع اس وقت کی فلموں کی روش سے بالکل مختلف تھا اور یہ تھا نئے مشینی دور میں مزدور اور مالک کا رشتہ۔ بی آر چوپڑا فلم ’گھر‘ میں بطور اداکار بھی جلوہ گر ہوئے۔ ان کی ہدایت کاری اور پروڈکشن میں کئی کام یاب فلمیں بنی ہیں جن میں ’نکاح‘، ’انصاف کا ترازو‘، ’پتی پتنی اور وہ‘، ’ہمراز‘، ’گمراہ‘، ’سادھنا‘ اور ’قانون‘ شامل ہیں۔
بھارت کے اس معروف فلم ساز اور ہدایت کار کے دل سے لاہور اور یہاں جیون کے سہانے دنوں کی یاد کبھی محو نہ ہو سکی۔ وہ ابتدائی زندگی کے بارے میں بتاتے ہیں ’ہم لوگ پہلے گوالمنڈی میں رہا کرتے تھے، لیکن 1930ء میں میرے والد کو جو کہ سرکاری ملازم تھے چوبرجی کے علاقے میں ایک بنگلہ الاٹ ہوگیا، جب میں نے گورنمنٹ کالج لاہور سے انگریزی ادب میں ایم اے کیا تو انھی دنوں والد صاحب کا تبادلہ امرتسر ہوگیا۔ میں کچھ عرصہ لاہور ہی میں مقیم رہا کیوں کہ میں آئی سی ایس کے امتحان کی تیاری کر رہا تھا۔ بعد میں جب مجھے فلموں میں دل چسپی پیدا ہوئی تو میں نے ماہ نامہ سِنے ہیرلڈ کے لیے مضامین اور فلمی تبصرے لکھنے شروع کر دیے۔ ایک وقت ایسا آیا کہ میرا قیام تو والدین کے ساتھ امرتسر ہی میں تھا لیکن فلمی رسالے میں حاضری دینے کے لیے مجھے ہر روز لاہور آنا پڑتا تھا۔ رسالے کا دفتر مکلیوڈ روڈ پر تھا، چنانچہ کچھ عرصے بعد میں نے بھی اس کے قریب ہی یعنی نسبت روڈ پر رہائش اختیار کر لی۔ فلمی رسالے میں نوکری کا سلسلہ 1947ء تک چلتا رہا، جب اچانک فرقہ وارانہ فساد پھوٹ پڑا اور مجھے انتہائی مایوسی اور دل شکستگی کے عالم میں اپنا پیارا شہر لاہور چھوڑنا پڑا۔‘
بھارت میں بی آر چوپڑا کو فلم نگری اور سرکاری سطح پر کئی اعزازات سے نوازا گیا۔ 1998ء میں انھیں دادا صاحب پھالکے ایوارڈ دیا گیا۔ اس سے قبل انھوں نے فلم فیئر ایوارڈ بھی حاصل کیا تھا۔
