لاہور : پنجاب کے شہروں میں شرح خواندگی کے اعتبار سے درجہ بندی پر مبنی ایک رپورٹ کے مطابق صوبائی اضلاع میں شرح خواندگی کے لحاظ سے ضلع مری سب سے آگے ہے۔
یہ شہر خوبصورتی میں اپنی مثال آپ تو ہے ہی میں لیکن اعداد و شمار کے مطابق پنجاب کے اضلاع میں شرح خواندگی کے لحاظ سے بھی ضلع مری 84.8 فیصد کے ساتھ پہلے نمبر پر ہے۔
رپورٹ کے مطابق پنجاب کے41 اضلاع میں ضلع مری سر فہرست رہا، جبکہ صوبے کے10 ڈویژنل ہیڈ کوارٹرز یعنی راولپنڈی سرگودھا فیصل آباد گوجرنوالہ سیالکوٹ لاہور ساہیوال ملتان بہاولپور اور ڈیرہ غازی خان کے علاوہ دیگر 30اضلاع بھی مری سے پیچھے رہے۔
اگر مری سے باہر سے آنے والے غیر تربیت یافتہ اور غیر تعلیم یافتہ مزدوروں کو نکال دیا جائے تو یہ شرح 95 فیصد سے بھی زیادہ ہو جائے گی۔
تعلیمی حلقوں اور سوسائٹی کی جانب سے ان اضلاع میں تعلیمی ترقی میں کردار ادا کرنے والے اساتذہ، والدین اور طلبہ کو خراج تحسین پیش کیا گیا ہے جنہوں نے کم وسائل میں علم کی شمع روشن رکھی۔
انگریزوں کے دور حکومت میں تعمیر کیے گئے تعلیمی اداروں میں کئی نامور شخصیات نے تعلیم حاصل کی اور دنیا بھر میں پاکستان کا نام روشن کیا۔
مشہور ملی نغمہ جو ہر پاکستانی کی زبان پر ہوتا ہے ’اے وطن پاک وطن‘کو مری کے رہنبے والے پروفیسر کرم حیدری نے لکھا تھا اس کے علاوہ مری میں پہلا کالج بنانے کا اعزاز بھی پروفیسر کرم حیدری کو حاصل ہے۔
اس کے علاوہ پاکستان کی پہلی اور سابق خاتون وزیراعظم محترمہ بے نظیر بھٹو کا پہلا اسکول بھی مری میں واقع ہے جہاں انہوں نے 1958 سے 1961 تک ابتدائی تعلیم حاصل کی۔