Tag: بے وفائی

انسانوں کی بے وفائی صرف دوسرے انسانوں کے لیے ہی نہیں بلکہ جانوروں کے لیے بھی جان لیوا ثابت ہوسکتی ہے جس کا حالیہ ثبوت یہ کتا ہے جسے اس کا مالک ایئرپورٹ پر چھوڑ کر چلا گیا۔

کولمبیا کے شہر بکارامنگا کے ائیرپورٹ پر اس کتے کو کئی روز سے دیکھا جارہا تھا جو آنے جانے والوں کو سونگھتا پھر رہا تھا۔ اس کے بعد وہ ایک کونے میں جا کر خاموشی سے بیٹھ جاتا۔

کتا جب یہاں آیا تو وہ خاصا صحت مند تھا۔ وہاں آںے والے مسافر اور ایئرپورٹ کا عملہ اس کے لیے کھانے کی چیزیں چھوڑ جاتا لیکن وہ انہیں نہیں کھا رہا تھا اور دن بدن لاغر ہوتا جارہا تھا۔

مزید پڑھیں: کتے کی زندگی کا مقصد اپنے مالک کو خوش کرنا

بعد ازاں اسے جانوروں کا خیال رکھنے والی ایک تنظیم کے حوالے کیا گیا جنہوں نے کتے کا بغور جائزہ لے کر بتایا کہ کتے کا مالک اسے یہاں چھوڑ گیا ہے اور کتا اس کی تلاش میں لوگوں کو سونگھتا پھر رہا ہے۔

ادارے نے کتے کو اپنی تحویل میں لے کر اس کے علاج اور غذا پر توجہ دینی شروع کی تاہم کتے کی حالت میں کوئی بہتری نہ آئی اور ایک وقت ایسا آیا کہ اسے چلنے پھرنے اور کھڑے ہونے میں بھی مشکل پیش آنے لگی۔

بالآخر کئی دن تک جان کنی کے عالم میں رہنے کے بعد کتا زندگی کی بازی ہار گیا۔ گو کہ ادارے کے طبی عملے نے اسے زندگی کی طرف واپس لوٹانے کے لیے بھرپور کوششیں کیں تاہم ان کی کوششیں رائیگاں چلی گئیں۔

جانوروں کے ڈاکٹر کے مطابق مرنے سے قبل کتا ڈپریشن اور شدید اداسی کا شکار تھا۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔