کراچی: گورنر سندھ محمد زبیر نے کہا ہے کہ کراچی ملک کا معاشی حب ہے جو پورے ملک کی خوشحالی کا ضامن ہے۔
وہ گورنر ہاؤس کراچی میں ایوان صنعت و تجارت کے وفد سے ملاقات کر رہے تھے اور دورانِ گفتگو گورنر سندھ کا کہنا تھا کہ کراچی منی پاکستان ہے اور اس شہر کی ترقی پورے ملک میں خوشحالی کا سبب بنتی ہے۔
گورنر سندھ نے کہا کہ تاجراور صنعت کارمعیشت میں ریڑھ کی ہڈی کی حیثیت رکھتے ہیں اور کراچی معاشی حب بنانے میں تاجروں کا بڑا اہم کردار ہے جسے مزید بڑھانے کی ضرورت ہے۔
گورنر سندھ محمد زبیر نے تاجروں کے وفد کو ہدایت کی کہ کراچی میں صنعتوں کا پہیہ تیز رفتاری سے چلنے کو یقینی بنائیں جس کے لیے حکومت تاجروں اورصنعت کاروں کو ہرممکن مدد اور تعاون فراہم کرے گی۔
انہوں نے کہا کہ بزنس کمیونٹی میرے دل کے قریب ہے اور وزیرِ اعظم بھی تاجروں اورصنعتکاروں کواہمیت دیتے ہیں اس لیے تاجر حضرات اپنے آپ کو تنہا نہ سمجھیں۔
اس موقع پر تاجروں نے اپنی شکایات اور خدشات سے بھی آگاہ کیا جس پر گورنر سندھ نے یقین دہانی کرائی کہ چیئرمین ایف بی آر سے تاجروں کی شکایات کےازالہ کے لیےجلد اجلاس بلایاجائے گا۔